رجانک کار
میجر مجید
اَپس مئے لوگ ءِ پانکو اِنت
پِسّ ءُ زہگ ءِ سوال ءُ جواب
زہگ:
منی ابّا کُجا باریں برئے مارا؟
منی ڈیھ ہُولّ کتگ ڈُنگاں
مئے مڈی پُل کتگ دُزاں
زمین روک اِنت منی ماتیں
چہ آزمان ءَ سْرپنت دُمبال
منی شہکوراں جَلہار اِنت
منی مات ءُ گُہار ماہیں
شپاد ءُ سر درا گَردنت
فلسطین دُژمن ءِ تیرانی آماچ اِنت
پِت ءُ بُرات تنگویں مئے راج
کُنٹ ءُ زمزیل انت ماں زندان ءَ
منی ابّا کُجا باریں برئے مارا؟
پِسّ:
مہ تْرُس بچّیگ منی او پِل ءُ سوگاتیں
اے دنز ءُ مُج، اے لُوڑ ءُ گرد تیرانی
زِری نود اَنت منی ڈیھ ءِ
سمین ءُ کوش ءُ ساچان اَنت
من ہمبازاں اے سْیاہ گْواتاں
پہ من اے پُلیں سوگات اَنت
آ کوہ ءِ دُومّگ ءُ تاپ دیم
کنت مئے دژمن ءَ اندیم
منا زیریت گْور ہمبازاں
منی ھاک انت، منی مات اِنت
زہگ:
چہ ما پد ہلک ءُ بازاراں
مئے شرّیں کاپَر ءُ کُلّاں
مئے ہنکین ءُ دوار جاہاں
مئے ہپت پُشتی میراساں
کئی باہوٹ کنئے ابّا؟؟
پِسّ:
مئے جاہ ءُ دوار پُلّیں
ابد مان اَنت ہمے ڈول ءَ،
اے سَول ءِ ساہگ ءَ سارتیں
ہمُود ناپگ منی کَلّ اِنت
زہگ:
گُڑا تو اَپس چیا تہنا یلہ داتگ؟
پِسّ:
اپس مئے لوگ ءِ پانکو اِنت
اگاں لوگ ءَ مہ بیت پانکو
اگاں ہلک ءَ مہ بیت ہلکو
مہ بیت راج ءَ کہ راجکارے
مہ بیت میشاں شپانک مَلّیں
مہ بیت گوکان ءَ گوّالے
مہ بیت بَگّ ءَ را بگّ جتّے
شگالی بنت رمگ ہاریں
وڑالی بنت دوار مِسکیں
وڑالی بنت دوار مِسکیں
