پشتونخوا ملی عوامی پارٹی کے چیئرمین محمود خان اچکزئی نے زیارت میں پارٹی کی ضلعی کانفرنس سے خطاب کرتے ہوئے کہاکہ بین الاقوامی طاقتوں کے مفادات اور اجارہ داری قائم کرنے اور رکھنے کے جنگ کی وجہ سے ہمارا خطہ ایک بار پھر اس سے اٹھنے والے طوفان کے زد میں ہے۔ اس دفعہ غلطی کی گنجائش نہیں، میں خصوصاً پشتونخوا ملی عوامی پارٹی کے کارکنان، پشتون بلوچ، ملک کے سیاسی قوتوں بشمول اسٹیبلشمنٹ کو خبردار کرنا چاہتا ہوں کہ بہت محتاط اور چوکس رہنے کی ضرورت ہے۔
افغانستان اور پشتونوں کا خطہ چالیس سال سے بین الاقوامی طاقتوں کے مفادات کے جنگ میں تباہ ہوگیا ، افغانستان مختلف ممالک کی مداخلت اور جنگ کا مرکز رہا ، دہشتگرداور دہشتگردی افغانوں پر مسلط کی گئی اور افغان مسلط کردہ دہشتگردی کے شکار ہوتے چلے آئے ہیں ،آج ایک مرتبہ پھر پشتونخوا وطن میں دہشتگردی کے واقعات تواتر سے جاری ہیں ، پارٹی یہ کہتی ہے کہ اس سرزمین کو غیروں کی جنگ کا آماجگاہ نہ بنائیں،چھوٹی غلطی بڑی تباہی کا پیش خیمہ ثابت ہوسکتا ہے ۔
محمود خان اچکزئی نے کہا کہ پشتون کسی کے ایک انچ زمین کے دعویدار نہیں لیکن اپنی سرزمین کا انچ زمین کسی کو نہیں چھوڑ سکتے نہ ہی اپنے وسائل پر کسی کو زور زبردستی قبضہ کی اجازت دے سکتے ہیں، بلوچ ہمارے بھائی ہمارے دوست ہیں ہم انہیں کہتے ہیں کہ آپ کسی اور کے کہنے پر ہمارے وسائل پر ڈاکہ نہ ڈالیں۔ پشتون بلوچستان میں برابری کی سطح پر رہنا چاہتے ہیں اورہر شعبہ زندگی میں برابری چاہتے ہیں ہم دو بھائیوں کی حیثیت سے ملکر اپنے حقوق کیلئے مشترکہ طور پر بہترین سیاسی جدوجہد کرسکتے ہیں ۔ ہم باہمی اتحاد سے سیاسی جد وجہد کے ذریعے امن قائم رکھنے اور اپنے حقوق و مفادات کا تحفظ یقینی بنا سکتے ہیں۔ ہمیں بشمول اسٹیبلیشمنٹ کو کسی کے مفادات کے جنگ میں فریق نہیں بننا چاہیے۔
