زندگیں مُردَگ | میجر مجید

0
184

کمبری دَورے پد ءَ کارین ءُ ما جاناں پھل
مکھیں ماتانی مھر ءُ دوستی ءِ شِیراں کنیں
سید ھاشمی
سید پہ بلوچ ءِ کْوھن ءُ اھدی دَور ءَ زر اِیت ءُ گِیر کار اِیت کہ بلوچ ءَ چِہ وڑ ءَ وتی اھدی دیمروی ءِ مانزمانی کُتگ ءُ گیرت داریں زندے گْوازینتگ۔ وتی چاگرد ءِ رھشونی کُتگ۔ بلوچاں وتی دود ءُ ربیدگانی پاسداری کُتگ۔ وتی زندمان ماں بلوچی رھبنداں گْوازینتگ۔ زوراک ءِ زوراکی ءِ دیم ءَ چو کوہ ءَ مِک بیتگ۔ مھر، تپاکی ءُ راجمانی زند ءِ اڑ ءُ جنجالانی ڈُبّہ وتی کوپگاں زُرتگ۔ وتی ننگ ءُ ناموس ءِ پھازگ ءِ ھاتر ءَ وتی سرانی سودا اِش جتگ۔ چہ لگوریں زند ءِ بدل ءَ مرگ اِش پہ شرپ گْورامباز کُتگ۔ راجے کہ وھدے نا تپاک بیت راج ءِ اندر ءَ پْرشت ءُ پْروش کَیت۔ گُڑا راج نزور ءُ کمتوان بیت۔ برے برے چہ ھمے نزوریاں راج درس زیر اِیت ءُ وت ءَ مھکم تر کنت ءُ دیمروی کنت۔
من چوش ھم نہ گْوشاں کہ مروچی راجپھاز نزور اَنت یا راجپھاز نیست۔ مرچی ھم راجپھاز ءُ سرمچار ھست کہ وتی سر اِش کپن بستگ اَنت ءُ گوں بکشو ءَ جیگ پہ جیگ اَنت۔ دژمن اِش آسیگ کُتگ۔ دژمن بے وار ءُ سر بتگ اِنت۔ دژمن ءَ مرچی لٹ ماں سر ءَ وارتگ۔ راجپھازاں وتی گلزمین ءَ آشوب ءِ بھار گوں وتی زگریں ھوناں آپ داتگ۔
بلے دومی نیمگ ءَ کہ چار ئے لھتیں سیاسی ءُ پارلیمانی کچیمبک ھم ھست اَنت۔ کہ روچے یک درگاھے ءَ میلانک اَنت۔ لھتیں ماں سِند ءَ لال شھباز کلندر ءِ باھوٹ اِنت۔ لھتیں ماں پنجاپ ءَ بُلّے شاہ ءِ درگاہ ءَ سوالیگ اِنت۔ وتی نِھاد اِش ھم سک ارزان کتگ۔ روچے یک پٹّی یے وتی گُٹّ ءَ لوپ کن اَنت۔ بلوچ ءِ ازت ءُ ننگ ءُ ناموس اِش لیلام کُتگ. پہ جماداری، زرّ ءُ مال ءِ ھاتر ءَ یزیدی لشکر ءِ چائوش ءُ دزبوج ءُ پیشکار جوڑ بیتگ اَنت۔ بلوچ گْوش اِیت
چہ کچیمبکی کرگزی نیاداں
گھتر اِنت دَمبانی شریداری
بلوچ ءِ راجی شائر ءُ کواساں دائم ءَ وتی جوانیں اھد ءِ رندگیری کُتگ۔ وتی پدریچ ءَ را گْوستانکی ھوالہ ءَ جوانیں ءُ ازت داریں زندے گوازینگ ءِ سکین اِش داتگ۔ چوش کہ شائرے گْوش اِیت
وش اِت اَنت اھدی دور بلوچانی
سبز اِت اَنت تَلّ ءُ سنج اِت اَنت تازی
کورد اِت اَنت مُلّائی دپ ءِ شھجو
چاکری ھاریں گورم ءَ چرت اَنت
چککگ ءُ چکّاسگ سگارانی
دست جنگ ڈالشاھیں بروتانی
وتی پدریچ اِش سکین داتگ۔ بلوچ شائران، دانشوراں، کواساں باجو ءُ الّھار ءُ راج دژمن ایر جتگ ءُ وتی راجپھازانی ءُ سرمچارانی ءُ ازت پھازاں آ وڈّم داتگ۔
سید گْوش اِیت
میریانی پْرشتگیں بان ءُ رَبَد مئے سنگر اَنت
چہ بدیں ھوناں سگارانی زِھاں سوھاں کنیں
بلوچ راجی راجمان ءُ پلسپہ کسے ءَ اے موکل ءَ نہ دنت کہ یکّے بلوچ راج ءِ مڈّیانی یا گلزمین ءِ سودا ءَ بہ جنت۔ بلوچ مکّھیں ماتاں ماں راجپھازی جنگاں وتی بچ دست ماں بڈّ ءَ جتگ ءُ جنگ ءِ پڑ ءَ روان داتگ۔ بلوچ مات ءُ گوھاراں مرچی ھم راجپھازیں جنگ ءَ سرین بستگ ءُ گوں دژمن ءَ دیم پہ دیم اَنت۔ شھید مجید لانگو ءِ مات ءَ میر کمبر ءِ مات ءِ رندپد نوک کُتگ۔ شھید ڈاکٹر ھالد ءِ مات ءَ دودا ءُ بالاچ ءِ مات زندگ کتگ۔ شھید بانک کریما ءُ شھید شاری ءَ بانڑی ءُ مریم ھاشی ءِ گْوستانک رژنا کُتگ۔ چشیں درور بلوچ گْوستانک ءَ سک باز اِنت۔ ھمے واست ءَ بلوچ ءَ گْوشتگ کہ "کمان پہ پُشت رَوت” بلوچ شائر ءُ دانشور ءُ کواساں زلم ءُ زوراکی ءِ پلّامرزی نہ کُتگ۔ ملا پازل گْوش اِیت
مُلکاں تاراج ءُ شاھاں ماں گْورگِنداں کن اِت
دیم ءَ گوں ناراست ءُ نگیگیں سَنداں کن اِت
چمّاں گوں ڈاوائی کمندیں کاڑاں کن اِت
پہ تپاک مچ بہ اِت ءُ وتی سِنگ ءَ گْران کن اِت
بزاں کہ بلوچاں پنت دیگ ءَ اِنت کہ گلامی ءَ وشّاتک مہ کن اِت۔ آجوئی ءَ امباز کن اِت۔ زالم ءُ زوراکاں تمپ ءُ تاراج کن اِت۔ زوراک ءِ ھلاپ ءَ یک دست ءُ تپاک بہ بہ اِت۔ منی تنگویں بیلاں! اے بلوچ کواس ءُ زانوگرانی پنت ءُ پلسپہ اِنت۔ راج پہ واری گار نہ بیت راج پہ لگوری گار بیت۔
تپاکی آجوئی ءِ مانزمان اِنت
بلوچستان آجو بات

***

LEAVE A REPLY

Please enter your comment!
Please enter your name here