بالدوست! تئی گوں جنگولیں سنگتاں اِشتاپیں رَوَگ تنیگا باور نہ بیت کہ شُما چہ مارا گِستا ءُ جتائیں دوارے رپتگے کہ واتر کدی نہ بَہ اِت، بلے اے انچیں راھے کہ دوست ءُ ھمراہ شھید بَہ اَنت۔ چی ءَ کہ اے راہ ءَ دیمونی دَیَگ ھژدری اِنت، اگاں کُجام راج چہ دیمونی دَیَگ ءِ دگ ءَ پد بِہ کِنز اِیت گُڑا پہ آئی ھِچّ نہ مان اِیت نیکہ منتگ۔۔۔۔۔۔۔۔۔
بالدوست! اے گپّ ءَ من شر زان آں کہ شُما پہ راج ءِ آیوکیں باندات ءَ وتی سر ءُ ارواھانی کُربانی داتگ، بلے اے گپّ ءَ ھر ھما دِل زانت کہ نزّیکیں بیل ءُ ھمبلانی سِدگ چینچو گْران ءُ مُشکِل اِنت۔
بالدوست! پمشکا من گْوش آں کہ منی ھمراھی ءَ بازیں دِلے چہ اندر ءَ شُمئے اِشتاپیں رَوَگ ءَ تھزد کُتگ۔ شُمئے مھروانیں نیادانی پتّر تنیگا نوک ءُ تاجگ اَت کہ چہ مئے دوار ءَ شُما لڈّ اِت ءُ دِگہ گِستائیں دوارے بُندر کُت، بلے شُمئے یاتانی انگریں دپتر مئے زِردانی اندر ءَ پچ ءُ مُدام گوں سوچوکیں زھیراں باھند کنت۔
بالدوست! ما داں زندگ اِیں شُمے بُرتگیں پند ءُ داتگیں دیمونی ءَ ھچبر بے ھیال کُت نہ کن اِیں، چی ءَ کہ شُما پہ ماتیں گُلزمین ءِ واستا ندْر بوتگ ئِے۔ ءُ وش بھت ھما اَنت کہ وتی ماتیں بلوچستان ءِ پہ آجوئی ءَ ندْر بَہ اَنت۔
بالدوست! تو گوں وتی ڈیھ پھاز ءُ کُنگُریں ھمراھاں دُژمِن پْروش دات کہ مارا مَرگ کبول اِنت، بلے پاکستان ءِ کاسگ چٹّانی دیم ءَ سِلاہ ءِ چگل دَیَگ کبول نہ اِنت۔
پمشکا بالدوست من ءَ تئی گوں سنگتانی اے داتگیں دیمونی ءِ داستان ءِ وانگ ءَ پد ھانُلیں سرڈگار ءِ شے مُرید ( رزا جھانگیر ) گیر اتک کہ آئی دوھزار سینزدہ ءَ کیچ ءِ دمگ آپسر ءَ بی این ایم ءِ کلّانھیں سنگت اِمداد بُجیر ءِ ھمراھی ءَ دُژمِن ءِ شِل سریں تیر سینگ ءَ جاہ دات اَنت بلے گوں وتی ھانُلیں سرڈگار ءَ بے وپاھی نہ کُت، ءُ انچو تو گوں وتی جوانمردیں راجی آجوئی ءِ جنگولاں۔۔۔۔۔۔۔۔۔۔۔۔۔۔
بالدوست! اے ھبر ءَ منی ھمراھی ءَ تئی کُلّیں بیل ءُ سنگت زان اَنت کہ تو وتی مات ءِ لاڑُک ءُ یکُّوئیں بچّ اِت ئِے، بلے وھدے ترا ماتیں گُلزمین ءَ گْوانک جت گُڑا تو اے نہ چار اِت کہ من مات ءِ یکُّوئیں بچّ ءُ لاڑیں گْوھارانی دُرّ ءِ دانگ آں، بلکیں تو ماتیں گُلزمین ءِ گْوانک ءَ وتی گام دیم ءَ شھار دات اَنت ءُ راج ءِ نام ءَ گوں سنگتاں ھمے کلوہ نبیس اِت کہ دیمونی دَیَگ ءِ دگ ءِ زاتی زِندمان ءِ ھِچّ چارگی نہ اِنت۔۔۔۔۔۔۔۔چی ءَ کہ گُلامی اگاں توانمند ءُ مُھکم بوت گُڑا باندا پہ تو ھِچّ پش نہ کپ اِیت۔۔۔۔۔۔۔۔۔۔۔، گھتر ھمیش اِنت کہ مرچی گُلامی ءِ سانکلانی بوجگ ءَ سراں سوگات بِہ کن دانکہ آیوکیں پدریچ تئی سر ءَ نازاں بِہ بیت ءُ ھمے راہ ءَ پند بُرّگ ءَ جاڑی بِہ بیت۔۔۔۔۔۔۔۔۔
بالدوست! تئی ھمراھی یلیں ساجد جان ھم یک دلیر ءُ بھادُریں ءُ سرمچارے اَت، آ مرگ ءِ گُڈّی ساھت ءَ تیر وارتگ اَت بلے راج ءِ نام ءَ ھمے کلوہ دَیَگ ءَ اَت ما پہ شُمئے وشیں باندات ءِ واستا اے تیراں وتی بالاد ءَ پیوست کنگ ءَ اِیں، پشکا چہ مئے رَوَگ ءَ پد وتی ھما راجی جنگولاں چہ دُور ءُ گِستا مہ بَہ اِت کہ آ پہ شُمئے آجوئی ءَ اے کوہ ءُ تلاراں کپتگ اَنت ءُ چہ زِند ءِ ھر وشّیاں زِبھر۔۔۔۔۔۔۔۔۔۔۔۔
مرچی ساجد جان راستے کہ جسمانی دْروشم ءَ مئے مْیان ءَ ساڑی نہ اِنت، بلے آئی ءِ دیمونی ءِ کِسّہ ءَ آیوکیں پدریچ وان اِیت ءُ وتی سر ءَ پھر بند اِیت کہ منی راج ءِ ورناھاں وتی ورناھی ءِ بھاریں روچ پہ مئے آجوئیں آکبت ءَ کُربان کُرتگ اَنت۔۔۔۔۔۔۔۔۔۔۔
ءُ ھمے رنگ ءَ شھید ساجد جان ( سمیر جان ) ءِ مھر ءَ من کدی شموشت نہ کن آں، چی ءَ کہ من کُجام وھد ءَ کہ دُچار کپتگاں آئی دپ چہ کندگ ءُ مزاک ءَ سرّیچ بوتگ ءُ ھمے گْوشتگے کہ ما مرگ ءِ وھد ءَ ھم بچکند اِیں ءُ ملکموت ءَ امباز کن اِیں، ساجد جان ءَ وتی اے گْوشتگیں ھبر سابِت کُت ءُ مارا پیشداشت کہ ملکموت ءَ گوں دیم پہ دیم ءَ چوں جنگ کن اَنت۔۔۔۔۔۔۔۔۔
ھمے رنگ ءَ ھمّل جان ( اکبر بلوچ ) ھم یک مھروان ءُ ملنگ تبیں ورناھے اَت، آئی بازیں سکّی ءُ سُوری یے گوں وتی اے کسانیں اُمر ءَ دیستگ اَت، بلے مُھکمیں آجوئی ءِ توکل ءِ دیم ءَ اے کُلیں جیڑہ، اڑ ءُ جنجال چو برپ ءَ آپ بوت اَنت ءُ آ پہ سِتک ءُ اِیمان وتی راجی آجوئی ءِ مارِشتانی جنگل ءَ بیگواہ اَت۔۔۔۔۔۔۔۔۔۔۔
پمشکا پمّا راج ءِ ورناھاں ھمّل جان ءِ زِندمان یک سبکّے کہ دربرگ لوٹ اِیت، چی ءَ کہ آ مئے چمّانی دیم ءَ بوتگ ءُ ما نزّیک ءَ دیستگ۔۔۔۔۔۔۔۔۔۔
انچوش! ملّ مِڑوکیں تاھِیر جان ءِ بھادُری وتی اندر ءَ یک سِکین بکشوکیں درونتے، چی ءَ کہ آئی گوں وتی کسان اُمری ءَ جنگ ءِ پِڑ ءَ دُژمِن باز رند ءَ آسیگ کُتگ ءُ پْروش داتگ، بلے اے رندی آئرا ماتیں گُلزمین ءِ مھراں گْورجتگ اَت پمشکا پہ اِشتاپی آ ماتیں گُلزمین ءِ ھنج ءَ پہ واب کپگ ءَ اُبینگ اَت۔۔۔۔۔۔۔۔۔۔
تاھِیر جان! من ترا نزّیک ءَ دیستگ اَت، بلے نہ زانت کہ تو چو پہ اِشتاپی ءِ امبازاں سر گِپتگ ئے ءُ مارا ابیتکی ءِ دامُن ءَ چگل دئے، بلے شُمئے مُدام تاجگ ءُ مارا اے سرپدی ءَ دے اَنت کہ راج ءِ پانکجی ءِ جنگ ءَ سرانی دیمونی دَیَگ ھژدری اِنت۔۔۔۔۔۔۔۔
بالدوست! ھمے رنگ ءَ تئی ورنائیں سنگت ءُ ھمراہ سگار جان ءُ اتا جان ھم شُمئے ھمراھی ءَ دُژمِن ءَ را اے باور کنائینت کہ گُلامیں سرڈگار ءِ آجوئی ءَ اُمر ءِ مزن بُوَگ ھژدری نہ اِنت، بلکیں گُلامی ءِ بگیر ءَ جُھد ءُ جنگ ءَ ھوار آجوئی ءِ مارِشت ءُ سسّا الّمی اِنت۔۔۔۔۔۔۔۔۔۔۔
پمشکا آیاں گوں وتی رِتکگیں ھون ءِ ھر تْرمپ ءَ اے سابِت کُت ءُ پیشداشت کہ آجوئی ءِ جُھد ءِ کِشار ءِ سبزینگ ءَ ھون دَیَگ چینچو الم اِنت۔۔۔۔۔۔۔۔۔۔۔۔۔۔
گُڈّی ءَ من گوں واجہ اتا شات ( عطاشاد ) ءِ شَیر ءَ وتی نبشتانک ءَ گْونڈ گِراں، چی ءَ کہ بالدوست تئی ءُ تئی کُنگُریں سنگتانی بالاد منی اے چاریں دانکانی مھتاجی نہ اَنت، بلے اے منی پرز اَت یک بلوچ زھگے ءِ بِستار ءَ من پورا کنگ ءِ جُھد کُتگ۔۔۔۔۔۔۔۔۔
تو پہ سرانی گُڈّگ ءَ زند ءِ ھیالاناں کُشئے
پہ سِندگ ءَ داشت کنئے پُلّاں چہ بو تالانی ءَ
***
