کوہنگءِ ہرچ جاہءِ سرا
شہیدیں یلانی زگریں ہون
بنت شپ چِراگ دائم بلنت
نازینک ماتانی اشاں
تاوان نہ بنت، گار نہ بنت
27مارچ پہ بلوچ راجءَ، پہ بلوچ گلزمینءَ، پہ کلیں انسانیت، آجوءُُ مہذبیں ءُُ انسان دوستیں راجاں سیاہیں روچے زانگ بیت۔ اے ہما سیاہیں روچ اِنت کہ انسان دژمن، آزاتی دژمن، سامراجی قوتاں بلوچ گلزمین پہ زورء شمشیر ءُُ پندل سازی ءُُ بلوچءِ سداں سالءِ آجوئیءَ پُل اِت۔ بلوچ گلزمین 1666بگر تاں 27مارچ 1948ءَ آزات ءُُ وت واکیں ڈیہے بیتگ۔ بازیں عہداں ریاستء قلات انگریزءِ زیرء اثر بیتگ، اے درچءَ بازیں منّاک نامہ گوں انگریزءَ بیتگ، بلے ریاستء قلات وتواک بیتگ۔ انچو کہ اندگہ دنیاءَ بازیں وتواکیں ملک آ وہدءَ انگریزءِ زیرء اثر بیتگ انت۔ ریاستء قلاتءِ سَے اسٹیٹ بیتگ انت۔ مکران، خارانءُُ لسبیلہ۔ اے سئیں اسٹیٹ قلاتءِ صوبہ بیتگ انت۔ قلات اسٹیٹءَ وتی قومی فیصلہ وت کتگ انت۔
وہدے ہندوستانءُُ پاکستانءِ آجوئیءِ اعلان بیتگ، یک روچے پیش قلات اسٹیٹءِ مکمل آجوئیءِ جار چہ آل انڈیا ریڈیوءَ شنگ بیتگ، بزاں بلوچستان 11اگستءَ، پاکستان 14اگستءَ ءُُ انڈیا 15اگستءَ آجو بیتگ۔ چونائیءَ ہندوستان آجو بیتگ کہ پاکستانءِ آ وہدءَ وجود نہ بیتگ، بلے انگریز ءُُ انگریزءِ ایجنٹ محمدعلی جناحءَ اسلامءِ نامءِ سرا پاکستانءِ لوٹ کتگ کہ اے شومیں ملک تاں روچ ء مروچی مہلوکءِ سرا چِٹّی اِنت۔
4اگست 1947ءَ خان قلاتءُُ محمدعلی جناحءِ نیامءَ ماں دہلیءَ گندونندی دیوانے بیتگ، اے دیوانءِ نیامءَ وائسرائے ہند ءِ قانونی مشیر لارڈ رزمے، نوابزادہ لیاقت علی خان، قلات اسٹیٹءِ وزیراعظم محمداسلم خانءُُ آئیءِ قانونی مشیر سلطان احمد خان ساڑی بیتگ انت۔ اے کانفرنسءِ منّاک نامہ 11اگست 1947ءَ وائسرائے ہندءَ ماں آل انڈیا ریڈیوءَ شنگ ءُُ تالان کت کہ مناک نامہ اے وڑا اَت:
”حکومتء پاکستان ریاستء قلاتءَ یک آزاد ءُُ وتواکیں ریاستے تسلیم کنت۔“ ہمے منّاک نامہ ءَ 11اگست1947ءِ شپءَ آل انڈیاریڈیوءَ نشر کت کہ ہمے اعلان روچء مروچی راجدپتری ریکارڈءِ بہرے۔ ریاستء قلات ءِ بیرکءِ رنگ سبز ءُُ سُہر بیت۔
آجوئیءِ جار
12اگست1947ءَ خان قلات میراحمد یار خانءَ یک بلاہیں مُچی یےءِ دیما بلوچستانءِ مکمل آجوئیءِ جار جت۔ خان قلاتءَ خداءِ شکر گِپت کہ مروچی قلات اسٹیٹءَ مکمل آجوئی رستگ۔ آجوئیءَ چہ پد خان قلاتءَ دو بلاہیں واکداریں قومی ادارہ جوڑ کت ءُُ گشت ءِے کہ دوئیں ادارہ فیصلہ سازی ءُُ قانون سازی کت کننت۔ چوش کہ دیوانء خاص، دیوانء عام۔۔ ءُُ دیوانانی نشست بزاں سیٹ چو اے وڑا بہر ءُُ بانگ ءِے کت انت:
1۔ سراوان 6نشست
2۔ جہلاوان 6نشست
3۔ مکران 10نشست
4۔ تحصیل قلات 4نشست
5۔ہندوانی 1نشستے
6۔ عالم دینانی 5نشست
7۔ نامزد 5نشست
8۔ ہندو تاجرانی5نشست
ریاست ء قلات یک وتواکیں ریاستے منگ بیت۔ نی محمدعلی جناحءَ چاراِت کہ پاکستان ابید بلوچستانءَ ملکے بیت نہ کنت، گُڑا محمدعلی جناحءَ انگریزءِ پُشت پناہیءَ قلات اسٹیٹءِ خلافءَ پندل سازی ءُُ مکاری بندات کت ءُُ اسلامءِ نام کارمرز کت کہ بلوچ مسلمان انت، ما ہم مسلمانیں، گُڑا پرچا سلامءِ نامءِ سرا ما اِشاں رَد مہ دئیں ءُُ گوں وتا ہوار مہ کنیں۔ جناحءَ دلیل دات کہ وہدے ما یک بیں ما گیشتر مہکم بیں، گوں خان قلاتءَ نزیکی ءِ جہد ءِے کت ءُُ بدبحتیءَ اے وہدءَ قلات اسٹیٹءِ وزیراعظم اسلم خان پنجاپی یے ات, اے مرد ہم غدار بیت۔ بلوچ اسٹیٹءِ خلافءَ گوں جناحءَ ساز ءُُ باز ءِے کُت۔ اسٹیٹءِ اندری حال بُودءِے محمدعلی جناحءَ دات انت، بلے خان قلاتءَ الحاق قبول نہ کت۔ خانءَ گُشت قلات اسٹیٹءَ دو بلاہیں اِدارہ اَست، اے دوئیں اِدارہانی دیما من الحاقءِ جیڑہءَ ایر کناں۔ خان قلات ماں ڈاڈرءَ اے دوئیں دیوان بزاں دیوان ء خاص ءُُ دیوانء عامءِ مشترکہ اجلاسے لوٹائینت، دوئیں دیواناں فیصلہ کت کہ گوں پاکستانءَ الحاق کنگ مہ بیت۔ یک ہمساہگیں ملکےءِ حیثیتءَ گوں پاکستانءَ دوستانہ رشتہ جوڑ کنگ بیت باکے نیست۔ ہمے پیغام یا فیصلہ، خان قلاتءِ براتءَ کہ اے وہدءَ مکرانءِ گورنر جنرل اَت، پہ جناحءَ سر کُت۔ گوں اے فیصلہءَ محمد جناحءَ گُشئے سُہر سریں تیرے ماں دلءَ لگ اِت۔چونائیءَ محمدعلی جناحءَ وتی شیطانی سازش قلات اسٹیٹءِ خلافءَ چہ روزء اولءَ بندات کتگ اتنت۔ محمدعلی جناحءَ چیرءُُ اندری گوں قلات اسٹیٹءِ سئیں اسٹیٹاں چوش کہ مکران، خاران ءُُ لسبیلہءِ نواباں وتی سازءُُ باز کت۔ اے سئیں نواباں لبّ ءُُ لالچ دات ءُُ بہا زُرت انت۔
چدو پد حکومتء پاکستانءَ خاران، بیلہ ءُُ مکران اسٹیٹءِ چہ قلات اسٹیٹءَ جتائیءِ جار جت کہ اے عمل قلات اسٹیٹءِ خلافءَ بلاہیں پندلے ات کہ ملکءِ اندرونی جیڑہانی تہا دخل اندازی یے ات، قلات اسٹیٹءِ دستورءِ خلاف ات۔ اے عمل محمدعلی جناحءَ پہ قلات اسٹیٹءِ کمزور کنگءِ ہاترا کتءُُ بیہار دات کہ اگاں تو گوں پاکستانءَ الحاق نہ کنئے، گُڑا تئی سئیں اسٹیٹ چہ تو جتا بنت۔ حالانکہ انگریزءِ دورءَ ہم خاران، لسبیلہ ءُُ مکران قلات اسٹیٹءِ ماتحت بیتگ انت، بلے پاکستانءَ انگریزءِ ہمراہیءَ خاران، مکران ءُُ لسبیلہءَ را جتائیں حیثیت دات۔ سردار ء پنجگور ءُُ سردارء تمپ نواب بائی خان گچکیءِ ماتحت کت انت ءُُ نواب بائی خان ءَ را امیرء مکران یا والیء مکران ءِ لقب دات۔ ادا حکومتء پاکستانءِ سازش سوبمند بیت ءُُ اے سئیں نواباں بزاں نواب بائی خان گچکی، نواب ء خاران میر حبیب اللہ خان، جام لسبیلہ جام غلام محمدءَ را ہر ماہ 30کلدار چہ حکومتء پاکستانءِ نیمگا پنڈگ دات۔ اے سئیں قومی غداراں بلوچستان گوں محمدعلی جناحءَ 30ہزار کلدارءَ بہا کت کہ روچ ء مروچی بلوچ راج ءُُ بلوچ راجدپتر اشاں لعنت دنت، مروچی ہم ہمے کارءَ لینگاٹ، ربال، کاسگ چٹءُُ پارلیمنٹءِ پُجاری کنگا انت، بلے اے کُلیں پندل ءُُ مکراں قلات اسٹیٹءِ وزیراعظم اسلم خان ہوار اَت کہ پنجاپی یے ات۔ ہمے ہاترا اَنور صاحب خان گوشیت:
دوستے کہ بہ بیت سد دژمنءِ کارءَ کنت
بالاچ مدام کوہءَ ہِیکانی شکارءَ کنت
اے وئیلءَ چہ پد قلات اسٹیٹءَ دیوانء عام ءُُ دیوانء خاصءِ مشترکہ دیوانے طلب کت۔ اے دیوانءَ قلات اسٹیٹءِ قوم پرست ممبر ءُُ ورناہاں قلات ءِ وزیراعظمءِ خلافءَ زہرشانی درشان کت، چہ قلات اسٹیٹ ءَ لوٹ کت کہ وزیراعظمءِ سرا غداریءِ کاروائی بہ بیت کہ وزیراعظمءَ جناحءِ لوٹءِ پدءَ قلات اسٹیٹءِ خلافءَ پندل سازی کتگ۔ بلوچ ممبرانی زہرشانیءَ پد 10مارچ 1948ءَ نوابزادہ اسلم خان چہ قلات اسٹیٹ ءِ مزن وزیریءَ در کنگ بیت، بلے اے مردءِ پندل سازی سوبمند بیت کہ قلات ریاستءِ آ سئیں اسٹیٹ مکران، خارانءُُ لسبیلہ چہ قلاتءِ ریاستءَ سندگ بیت انت۔ ہمے درچءَ خان قلات ءَ ہم وتی اولی اسٹیٹمنٹ بدل کت ءُُ پاکستانءِ چیراَندری حمایت کت۔ خان قلاتءَ محمدعلی جناحءِ گوشگءِ پدءَ قلات نیشنل پارٹیءِ سروک ءُُ جہدکار بندیگ کت انت۔ چوش کہ میر غوث بخش بزنجو، مولانا محمدعمر، مولانا عرض محمد، میرگل خان نصیر، ملک فیض محمد یوسفزئی، اے ایم کٹی، ملک عبدالرحیم خواجہ خیل، سردار بہادر خان، حاجی بہرام خان لہڑی، میر لال بخش مینگل، سید احمد شاہ ہاشمی، ملک پناہ ءُُ دگہ بازینے ریاست ء قلاتءَ چہ نوکریءَ در کت۔ خان قلات میراحمد یار خانءَ گوں پاکستانءَ الحاقءِ جار جت کہ اے کلیں عمل ریاستء قلاتءِ دستورءِ خلاف اتنت، پرچا کہ قلاتءِ دوئیں ایواناں الحاقءِ خلافءَ وتی فیصلہ داتگ ات۔ خان قلات میراحمد یار سک لگور بیت۔ پہ نہ منّوکیں دلے 27مارچ 1948ءَ گوں پاکستانءَ الحاقءِ منّگ نامہءِ سرا دستخط ءِے کت کہ اے روچ بزاں 27مارچ پہ بلوچ راجءَ سیاہیں روچے۔ بائد انت تاں کہ بلوچ راج آجو نہ انت، اے سیاہیں روچ بزاں 27مارچءَ ہرسال بداریت ءُُ زہرشانی درشان بہ کنت ءُُ میان اُستمانی مہلوکءَ اے روچءِ درگتءَ سرپد بہ کنت کہ بلوچءِ آزات ءُُ وتواکیں ریاست بہ زورء شمشیر چہ بلوچءَ پُلگ بیتگ۔ اے روچ بزاں 27مارچ ماں بلوچ راجدپترءَ سیاہ تریں روچ انت۔27مارچ 1948کہ بلوچ ریاست غلام دارگ بیت۔ اے وہدی خان قلاتءِ برات شہزادہ عبدالکریم خان مکرانءِ گورنر اَت ءُُ کیچءَ جاہ منند اَت، عبدالکریم خان ءَ پاکستانءِ اے زوراکیءِ خلافءَ بغاوت ءِ جار جت۔ عبدالکریم خان غیرت داریں بلوچے ات، قوم دوستے ات، آئیءَ بلوچ گلزمینءِ گوں پاکستانءَ زبردستی الحاق قبول نہ کت۔ اندگہ بلوچ ٹک ءُُ بولکانی قوم دوستیں ورناہاں 5ہزار بلوچءِ سلاہ بندیں لشکرے تیار کت، سرلٹھءِ کوہ وتی بُنجل کیمپ کت ءُُ پاکستانءِ یزیدی لشکرءِ خلافءَ وتی سلاہ بندیں جہد بندات کت۔ اے جنگءَ زورگیرءِ لشکر سک باز تاوان بار بیت۔خان عبدالکریم خانءَ چہ کابلءِ سرکارءَ مدت ءُُ کمکءِ لوٹ کت، بلے افغانستانءَ اے لوٹ قبول نہ کت۔ زورگیرءَ مسٹر ڈی۔ وائی۔ فل دیم دات کہ گوں عبدالکریم خانءَ گپ ءُُ تران بہ کنت، خانءَ زورگیرءِ اے ہبر قبول کت۔ اشاں خان عبدالکریم خانءِ لوٹءِ پدءَ وتی منگ نامہے تیار کت، خان عبدالکریم خانءَ صلح نامہء سرا دستخط کت کہ اے صلح نامہءِ مانزمان مسٹر ڈی۔ وائی۔ فل اَت۔ مسٹر ڈی۔ وائی۔ فل قلاتءِ ریاستءِ دومی وزیراعظم ات، وہدے غداریءِ بُنیادءَ نوابزادہ اسلم خان چہ وزیراعظمیءَ کشّتگ ات، گُڑا مسٹر ڈی۔ وائی۔ فل ریاستء قلاتءِ وزیراعظم گچین کنگ بیتگ ات۔ وہدے خان عبدالکریم خان گوں وتی سرمچاراں ہربوئیءِ کوہءَ سر بیت، دژمنءَ خان عبدالکریم خان گوں یک سد سرمچارءَ دزگیر کت ءُُ وتی قول ءُُ قرار ءُُ منگ نامہ پروشت انت۔
4دسمبر1948ءَ خان عبدالکریم خان ءُُ آئیءِ اندگہ سروکیں سرمچار ءُُ کماندارانی ماں مچھ جیلءَ سزا بندگ بیت انت۔
1۔ خان عبدالکریم خان ءُُ بلوچستانءِ راجی شاعر محمد حسین عنقا 10سال کید۔
2۔ مولوی افضل زگر مینگل۔ ملک محمد سعید، میر عبدالواحد کرد 7سال کید۔
3۔ میرمحمدخان رئیسانی 3سال کید۔
4۔ صوبہ دار عبدالرحمن سمالانڑانی 3سال کید۔
5۔ مولوی عبدالرحمن، مولوی فقیرمحمد، مولوی اللہ یار، مولوی محمد اسماعیل، مولوی فتح محمد، ہریکے 5سال کید۔
6۔ ٹکّری محمد وفا شاہوانی، ٹکری پسند خان، ٹکری صمد وفا لانگو، ہریکے یک سالے کید۔
7۔ ٹکری فتح محمد، محمد عمر، مینگل خان، ہریکے یک سالے کید 50ہزار جرمانہ۔
سنگتاں! ماں بلوچستانءَ اولی سلاہ بندیں جہد خان عبدالکریم خانءَ بندات کتگءُُ دژمنءَ را سک باز تاوان داتگ، بلے بازیں نہ وشیں جاورانی سببءَ اے جہد اوشتءِ ہرجان بیتگ، بلے جہد ہلاس نہ بیتگ۔ بلوچ طوفانءُُ آہِرّاں چیرترّینتگ، پاد لپاش کتگ، بلے ولگوج کُت نہ کتگ۔ جہدءَ وہد ءُُ پاس ءُُ حالاتانی حوالہءَ مدام سر چِست کتگ۔ زورگیرءِ کُلیں زُلم ءُُ زوراں بلوچءِ نیشنلزمءِ فلسفہ ہلاس کت نہ کتگ۔ بلوچءِ لوٹ ہما وہدی ہم آجوئی بیتگ، مروچی ہم آجوئی اِنت۔ باندا ہم آجوئی بیت۔
دومی سلاہ بندیں مزاحمتی تحریک نواب نوروز خانءِ سرکماشیءَ بندات بیت۔ نواب نوروز خانءَ ہم وتی لشکرے جم کت ءُُ ماں میرگٹّءِ کوہاں وتی فراری کیمپ جوڑ کت، اے جنگءَ ہم دژمنءَ سک باز تاوان وارت۔ اے جنگءَ کساس دو سے سالءَ داشت ءُُ دژمن سک بے وار بیت، پدا دژمنءَ پندل سازی کت ءُُ قران شریف سرءَ کت ءُُ قول کت کہ شمے لوٹاں سرکار قبول کنت، چہ کوہاں ایر کپ اِت۔ نواب نوروز خانءِ برات زتک ءُُ زامات سردار دودا خان اے پندلءَ ہوار اِتنت، وتی جندءِ ناکوءَ رد دات ءُُ چہ کوہءَ ایرگیتکءُُ دودا خانءَ وتی دیم پُرین کت، وہدے کہ نواب نوروز خان چہ کوہءَ ایر کپت، زورگیرءَ دزگیر کت ءُُ قرانءِ سوگند پروشت۔ مروچی شما گنداِت کہ ہما قرانءَ دژمن شر گپتگ۔
نواب نوروز خان پیراں سالی زورگیرءَ ماں حیدرآباد جیلءَ بند یگ کت۔ 15.7.1960ءَ ہپت سرمچاریں سنگت گوں نواب صاحبءِ زہگےءَ پاہو دات۔ 25.12.1965ءَ نواب صاحبءَ ماں حیدرآباد جیلءَ وفات کت، بلے جُنز ہلاس نہ بیت۔ اے وئیل ءِ خلافءَ جنرل شیرو مریءَ پیپلز لبریشن آرمی ءِ نامءَ بلوچ لشکرے جوڑ کت۔ اے سلاہ بندیں لشکرءَ 1965تاں 1969ءَ سلاہ بندیں جنگ داشت۔
تنگویں بیلاں! اے جہدانی اوشتءِ مستریں سبب ایش ات کہ مُہکمیں ادارہ نیست ات، جہدانی سرکماش وت واک اتنت کہ جہدءَ بہ دارنت یا دیما بہ برنت، کس ادارہانی پابند نہ ات، ادارہ نیست ات۔ دومی سبب جہدءَ ماس پارٹی ہم نیست ات، آجوئیءِ جہدءِ واستا ماس موبلائزیشن المی انت، بلے وہدے بلوچءَ اے نزوری مار اِت، بلوچ رہشون، بلوچ ورنا گل بزاں کہ B.S.Oءَ نیشنل عوامی پارٹیءِ بُن ہشت ایر کت ءُُ بی ایس او ءُُ میرغوث بخش بزنجوءِ جہداں سردار خیربخش مری، سردار عطااللہ مینگل، شہید نواب اکبرخان ءُُ اندگہ قوم دوستیں مہلوک NAPءِ پلیٹ فارمءَ یکجا کت انت۔
NAPءَ ماں صوبہ سرحدءَ گوں مفتی محمد خان ءُُ ماں بنگالءَ مجیب الرحمنءِ عوامی لیگءَ اتحاد کت۔ 1970ءِ الیکشناں اے سئیں پارٹی سوبمند بیت انت، بلے زورگیرءَ ووٹءِ تقدس پادمال کت، مجیب الرحمن حکومت جوڑ کنگءِ دعوت نہ دات، حالانکہ مجیب الرحمن ءِ مستریں پارٹی ات، زورگیرءَ دوست نہ بیت، پرچا کہ بنگالی یے ات۔ بنگالیاں وتی آجوئیءِ جہد بندات کت ءُُ انڈیاءِ کمکءَ بنگلہ دیش آجو بیت۔ بلوچستان ءِ تاریخءِ تہا اولی گشتاں زورگیرءَ پہ دلء ناکام بلوچستانءِ قوم پرست پارٹی NAPءَ را حکومت کنگءِ دعوت دات۔1.5.1972ءَ سردار عطااللہ مینگلءِ سروکیءَ بلوچستانءَ NAPءِ سرکار جوڑ کت۔ سردار عطااللہ مینگل وزیراعلیٰ بیت، میرغوث بخش بزنجو گورنر ءُُ میرگل خان نصیر وزیرء تعلیم، بلے زورگیرءَ اے کارست دوست نہ بیت انت، 9ماہءَ پد زورگیرءَ NAPءِ سرکار پروشت، عراق سازش کیس NAPءِ سرا لڈّ اِتءُُ NAPءِ توامیں لیڈرشپ ماں حیدرآباد جیلءَ بندیگ کت۔ سردار خیربخش مری ہمے واستا گوشیت کہ پاکستانءِ پارلیمنٹءِ روگ منی مستریں ردی بیتگ۔ پارلیمنٹءِ تجربہ بلوچءَ کت، بلے بے سوب بیت۔ مروچی لہتیں ناسرپد گل انت صادق سنجرانی سینیٹ ءِ چیرمین جوڑ بیتگ۔ بلوچ ءِ نسل کُشیءِ لائسنس واجہءَ رستگ۔ صادق سنجرانی ءَ پہ بلوچءَ مُرپُلو گون نیست۔ بلوچءِ سرا زُلم ءُُ زور گیش بیت۔ چہ لینگاٹاں جوان تریں مردمے فوجءِ دستءَ کپتگ ہما زہم کہ لینگاٹاں پہ بلوچءَ جتگ اے مرد ہم ہما تلوارءَ جنت۔
تنگویں بیلاں! انچو کہ NAPءِ سرکار ختم بیت۔ بلوچستان وتی زہرشانی درشان کت ءُُ سرکارءِ ہمے کارستءِ خلاف ءَ بلوچاں وتی مزاحمتی سلاہ بندیں تحریک بندات کت، اے تحریکءَ ہم مہکمیں ادارہ نیست ات، پرچا کہ NAPءِ کُلیں رہشون ءُُ جہدکار بندیگ بیت انت، لہتیں دراں ڈیہہ بیت، جنگ بندات بیت، بلے اے جنگءَ گیشتر مریءُُ مینگلاں بہر زرت ءُُ قربانی دات ءُُ بی ایس اوءِ چیزے ورنا ہم سلاہ بندیں جنگءَ گون ات، بلے مکران اے جنگءَ گون نہ ات، پرچا کہ کسءَ سرپدی نیست ات، میڈیا ءُُ رسانکدر نیست ات، بلے وہدے کہ ضیاالحق ءَ مارشل لا جت، زلفقار بھٹو ءِ سرکار پروشت، بھٹو ماں جیلءَ بندیگ کت، گُڑا ضیاالحقءَ ماں بلوچستانءَ عام معافیءِ اعلان کت ءُُ بلوچ رہشون چہ حیدرآباد جیلءَ آجو بیت انت۔ ضیاالحقءَ ہم چہ کُلیں بلوچ راجءَ پہ جارء بادشاہی معافی لوٹ ات۔ ہمے وڑا اِے سلاہ بندیں جہد ہم اوشت آماچ بیت، بلے ہلاس نہ بیت۔
تنگویں بیلاں! مروچیگیں آجوئیءِ جنز چہ 2000ءَ بندات بیتگ ءُُ روچ پہ روچ جوانیں رنگ ءُُ دروشمےءَ دیمروی کنان انت، پرچا کہ اے جہد ادارہاں گون انت، فردانی دستءَ نہ انت، اے جہد بازیں پٹ ءُُ پول، چار ءُُ بچارءَ پد بندات بیتگ۔ مروچیگیں دورءِ لوٹءُُ گزرانی بنیادءَ جوڑ کنگ بیتگ۔
سردار حیربخش مری دابیں بامردے، ڈاکٹراللہ نزر، میر عبدالنبی بنگلزئی، استاد واحد کمبر، ڈاکٹر خالد، شہید غلام محمد، شہید ڈاکٹر منان، شہید بالاچ مری، سلیم بلوچ، کماندار استاد اسلم، سنگت بشیر زیب، شہید کمبر چاکر، شہید لالہ منیر، سنگت ڈاکٹر دین محمد ءُُ دگہ بازیں جہدکار ءُُ رہشونانی گندو نندءَ چہ پد اے سلاہ بندیں جہد بندات بیت۔ ڈاکٹر اللہ نزر ءَ آزاتی لوٹوکیں وانندہ گل بزاں کہ بی ایس او اآزات جوڑ کت۔ شہید غلام محمدءُُ آئیءِ نظریاتی سنگتاں بی این ایم جوڑ کت۔ نواب مریءَ حق توار پارٹیءِ بُن ہشت ایرکت، ہمے دابءَ بلوچ آجوئیءِ جنز ادارہانی دستءَ شت، چہ فردانی دستءَ لگشت، تاں روچء مروچی جنزءِ واگ ادارہانی دستءَ انت۔ من اے گشگ لوٹاں کہ جنز وتی گُڈی منزلءَ سر بیت، اوشتءِ ہرجان نہ بیت، پرچا کہ اے جنز اِدارہانی دستءَ انت ءُُ پدا کُلیں بلوچ راجءِ مدت ءُُ کمک جہدءَ ہمراہ انت۔
تنگویں بیلاں! من ڈنی ملکاں جہمنندیں کُلیں بلوچاں دزبندی کناں کہ وتی جہداں تیز بہ کن ات۔ چوش کہ بلوچستان فری موومنٹءِ سرکماش واجہ حیربیارمری، ڈاکٹر مصطفی ءُُ فیض بلوچ، ورلڈ بلوچ آرگنائزیشن ءِ سروک، میر جاوید مینگل، نورالدین مینگل،باول مینگل، بی یو اےءِ پاگواجہ مہران بلوچ، بلوچستان ریپبلکن پارٹیءِ رہشون واجہ براہندگ بگٹی، شیرمحمد بگٹی، بی این ایم ءُُ بی ایس اوءِ جہدکار حمل حیدر، بانُک کریمہ بلوچ، ڈاکٹر ظفر بلوچ، ڈاکٹر نسیم بلوچ، میرکچکول ایڈوکیٹ، تاج بلوچ، ڈاکٹر ناگمان، ورنائیں جہدکار لطیف جوہر ءُُ اندگہ قوم پرستیں سنگت چوش کہ عبداللہ سیاہو بلوچ، صمد بلوچ، ڈاکٹر نصیربلوچ، شبیر بلوچ، ڈاکٹر بدل خان بلوچ، بانُک نائلہ قادری، واجہ صدیق آزات، واجہ اکبربارکزئی، واجہ رحیم بندوی، واجہ غلام رضا حسین بُر، واجہ اسمائیل امیری، واجہ جمشید امیری، ڈاکٹر تاج بریسی ءُُ دگہ بازیں سنگت ءُُ دوزواہءُُ اندگہ بلوچ رہشون بلوچءِ راجی جیڑہءَ میان استمانی ہلکواں سر بہ کننت۔ من ادا گوں بی این ایم ءُُ بی ایس اوءِ سنگتاں دزبندی کناں کہ مئے راج شنگ ءُُ شانگیں راجے، اے راج چنئگ ءُُ کمایگ لوٹیت، من شمارا درور دات کہ بی ایس او ءَ 1970ءَ نواب حیربخش مری، نواب اکبر خان بگٹی، سردار عطااللہ مینگل، میر غوث بخش بزنجو یکیں پترءِ سرا نادینت انت ءُُ تپاک کت انت، مروچی کار سک آسان انت، میڈیا ءُُ رسانکدر اَست، بس ایمانداریں جہدے لوٹیت، گوستگیں روچاں بلوچ ورلڈ آرگنائزیشنءِ فری بلوچستان پوسٹر مہم سک باز سوبمند بیت۔ اے درگتءَ شمے کلیں سنگتانی جہد ستا کرزنت۔ اے فری بلوچستان پوسٹر مہم ءَ دژمن سرین پروش کت۔
تنگویں بیلاں! بلوچ راج ہما وہدءَ سوبمند بیت کہ وتا یک مہذبین ءُُ سرپدیں راجےءِ بستارءَ دنیاءِ دیما ثابت بہ کنت، گُڑا دنیا تئی نیمگا چاریت، تئی جیڑہانی بابتءَ پٹ ءُُ پول کنت، اے ہما وہدءَ بیت کہ بلوچ تپاک بہ بیت، یک دست بہ بیت، بلوچ وتی جیڑہاں گوں تپاکیءَ دیما بہ بارت، دگہ ملکانی سرا بیسہ مہ کنت، دگہ ملکانی حمایت تئی حقءَ بہ بیت جوان تر اِنت، بلے ہر ملکے وتی کٹ ءُُ نپاں چاریت، تئی جہد بہ بیت کہ ڈنی ملک تئی جُنزءَ، تئی لوٹءَ سرپد بہ بنت۔
اے گلزمین ءِ مہر ہون ءِ شانگ اِنت
اے جنگ آجوئیءِ سُہریں بشانگ انت
اے گلزمین ءَ ہرنَپَس نشانگ انت
ءُُ ہرچ کس نشانگ انت
(منظوربسمل)
(من وتی اے نبشتانکءِ سرجم کنگءَ چہ واجہ گُل خان نصیرءِ کتاب ”تاریخِ بلوچستان“، ڈاکٹر نصیردشتیءِ کتاب "The Baloch Conflict with Iran and Pakistan” ءُُ سنگت چاوش بلوچ ءِ کتاب ”بلوچ جہدء آزادی“ءَ چہ کُمک زُرتگ۔ واجہانی منتءَ گِراں)
تپاکی آجوئیءِ مانزمان انت
بلوچستان آجو بات
٭٭٭
