دنیا نا تحریک آتے ٹی برز شیف ہر جاہا مسونے ، دُن افک کہ آزادی ، ہندو اڑزانی اٹ رسینگانے ، تحریک نا بڑز شیفی ، جہدکار آتا شہادت توں آوار آوار ، جہدکار آتا کمزروی ، بے ایمانی ، بہا مرنگ مسونے ، بلئے اراڑے کہ شہادت اسے آن کمی مسونے او کمزوری ہورے ئسکاں مسونے ، بلئے اراڑے کہ جہد کار آک شہادت نا خلیساں کہ جہدے یلہ کرینو او جدوجہدے ہچ فرق تمتانے او جہدکار نا پیش تمِنگ اونا کڑد خواری تا موت مسونے بس داکان مُستی ہین ہچ اس متنے ، جہدے شہادت آک مظبوط کیرا کمزور کپہ سا ، ہندا وڑ شہادت آک اینو بلوچ راجے کمزور کتہ نو ، مظبوط کرینو تا ۔
ای ہمو استار نا باروا نبشہ کرنگ اٹی اُٹ کہ او شام ئنا تہاری تا مُخے پرغیسہ راجے روشنی بخشہ ، دا ہمو استار ئے کہ مسافر تے کسر تیاں رد مرنگ کیں الیتو ، دا ہمو استارے مہگیر نا مونا ئنا ہلنگ کیں توبے تو آوار تما ، ہمو سختی تے تینا جانا جلا ، بلئے بلہ مہگیر نا موناں اینگ متو ، گڑا ہمو استارے نا پنِنگ کنے توریک نُمے توریک ، مُچا مخلوق ئے توریک ، کہ ارافتے کے ٹپ جلا ، تینے پنھ کرے ۔
ڈاکٹر منان ، تعریف نا مہتاج افک ، او لوز آتا مہتاج افک ، ڈاکٹر منان اسے دم دپہروکو ، جہد کار اسک ، کہ دم دتہو کا ، شکایت کتہ وکا کہ پِلاں جاہا بلوچ قومی توار سر کرنگ مفک ، اوڑے مشکل آک زیادہو اوڑے دشمن نا دو مَچے مُستی ئے ، یا کہ او ماحول دون افک کہ ننتو آوار بریر ، او دا گڑائے ہُتا وکہ ، او قومی آزادی نا تُغے حقیقت ئٹی بدل کرنگ کیں ، نن تے دے کرے ، تاں آخر دم ئسکاں ، تینا قول ، تینا ہیت آتا زیا اسک ، تینا فرض پورہ کرینگ اٹی اسک آزاد دے ٹِک اسے نا خواہش ئٹی اسک ۔
ڈاکٹر منان نا ابید بلوچ سیاست کپی ئے ، پورہ افک ، ہندو ننا رہبر غلام محمد کہ شہید فدا احمد نا سوچ ئے ، اسے راستو کسر ئس جوڑ کرے ، راج او ورناتے کے اڑزان کرے ، ہمو دروشُم اٹ منان غلام محمد نا جہدے مونا درے ، بلوچ نا تاریخ ئے اگہ خوانس ، گڑا خنتاں دِتر پِٹک ، خڑینک پٹہ پِک ، بلوچ نا بے سخاوتی ، نا خاخر ننے اسکاں سرے ، دا ہمو خاخرے کہ ہزارآن سال لگوک مسونے ، اینو اِسکان ، ہمو قصہ ، ہمو دڑد ، ہمو درپہ دری ارے۔
بلوچ نا قسمت بلکہ بروکا وخت ئٹی جوان مرے ، ہمو وخت آ جوان مریک ، کہ بلوچ اسے جاہا مرے ، بلوچ ہر وخت تینتو بد سخاوت مسونے ، دا کنے خبرے ، نے خبرے ، ہر بلوچے خبرے ، ہندا بد سخاوتی ، تین پہ تینی نا نُکس ، ہندا ای ای ہندا نی نی ، بلوچ نا بل آ کمزوری یے ، جنگی سنگر آن ہلیس تا جدید دور ئنا سیاست اسکا ، ہندا تقسیم برجم مسونے ، ارے ، ہندا رنج ہندا بد سخاوتی ایلم تا دشمنی اسے روشنو چراغ ئس کُنگ ، او شہید فدا احمدے ، وخت اس منان نا قصہ بریک غلام محمد آوار غلام محمد نا قصہ بریک فدا احمد آوارے ۔
شہید ڈاکٹر منان جان ئے ہندا گڑا سخت توراکا کہ بلوچ نا طاقت انتے ونڈے ، راج انتے زنچِک ما زنچِکے ، دشمنے انتے گَل ہیتک ، او ہر وخت ، ہندا گڑائے پاریکہ کہ کُل آوار مریر ، ہر پِڑا دشمن نا خلاف آ جہد کیر ، دروغ انگا قصہ ، دروغ انگا الزام آتا توجہ تفس ، تینا اصل مقصدے پوہ مریر ، اوڑکیں ہم کوپہ مریر ، ارا وخت آ ہم کوپہ مریرآ گُڑا دشمن کمزور مریک ،او ہر وخت ہندا گڑاکے جہد کریکا ، تاں آخر ئسکان ہندا جہد ئٹی اسک ۔
اودے دا ہیت جوانی ئٹ خبر اسک کہ ، نن اگہ دا جدید دور ئٹی اسے مُشت متون گڑا ننے ننا ہنوکا غلطیک پدا نقص ہیتیرا ، ننے پدا کمزور کیرا ، بلوچ نا طاقت ئے پدا ونڈ کیرا ، ننا قربانیک زیاہ ٹی کارہ۔ نن اگہ دا جہد ئٹی پدا تینا مسُتانا قصہ ئے دوارہ تکرار کریں ، گڑا ننے دا طاقتے پدا دوٹی کرنگ کیں بلؤ وخت ئس لگیک ، بلوچ نا جہدکار آ فرزند آتا وطن نا مہر او احساساتے توں گوازی کرنگ یقینّ بربادی او تباہی اسے نا نیماغا کائک۔
وطن لمہ ئے ، لمہ نا مہرئنا مٹ پین ہچ مفک ، اگہ لمہ وطن آ مصیبت اس کہ بریک لمہ نا حقی آ چُناتا سینہ کُلاں مُہٹ دشمن نا سُمتے جلیک ، ڈاکٹر منان ئے سیاست دان اسے آن ابید نن ہوُرین گڑا او اسے ہندونو جہد کارو سنگت اسے کہ ، تینا آخری سُم یے ، تینے خلیک دا دنیا غان رخصت مریک ، بلئے دشمن نا دوٹی تینے تِفک ، پارٹی نا رازاتے تینتو آوار آوار گُلزمین نا مِشتے ٹی آوار دیک ۔
ڈاکٹر ہمو رہشون مسونے کہ دے او نن کرینے ، اونا بس ہندا مسونے کہ جہد مرے جہد سلیپ ، جہد ئٹی ارا فرض اونا مسونے او تینا زمہداری تا پورو کرنگ کیں ، ہر وخت لگوک مسونے ، داغ تروکا باسونی آہڑی آ دے تیتانے ، سوُ تڑوکا یخ انگا شام تیتانے ، سفر کرینے ، برز شیف تیتانے ، تینا مریضی ئے تینا کمزوری نا وجہ جوڑ کتانے ، برز شیف ، مش ڈوک آ تا تہٹی پند کرینے ، تولیسا بش مریسا ، مُستی ہنانے پدی چک خلتنے ۔
شہید منان تینا عام زندگی ٹی اسے ڈاکٹر اس اسک ، او تینا انچُکی ٹی باز سختی او سوری خنا ، اونا لمہ (دُربی بی )او وخت کہ وفات کرے منان باز چُنک اسک ، لمہ نا وفاتی آ پد باز بزہ مس ، باوہ نا مہر لمہ نا مہر انا وڑا مفک ، دا اسے حقیقت او گپ اسے ، ہندا وڑ اٹ منان جان ہم تینا لمہ نا مہر آن مہروم مس ، اونا زند باز بدل مس ، سخت خوار ءُ بزہ مس ۔ بلئے خوانا ، اول ماسٹری نا نوکری اس رسینگاتا ، ماسٹر اسک اوکان پد ڈاکٹری کیں خوانا ، ایم بی بی ایس ڈاکٹر اس مس ۔
ڈاکٹر منان ہندا وڑ تینا جہدے آخری دم ئسکان زندہ تخا تینا زمہ داری ئے اُستان دتو ، پارٹی نا کاریم اٹ بلوچستان نا شہر مستونگ آ ہنا ، ہموڑے فوج بس اودے اونا ہمراہ ، شہید اشرف ، شہید حنیف ، شہید ساجد ، شہید بابو نوروز تو January 30 2016 نا دے آ شہید کرے ، اونا شہیدی ئے دژمن تینکیں اسے کامیابی اس سمجھا ، بلئے شہید زندہ ئے اونا فکر زندہ ئے ، وطن آزاد مریک ۔
***
