ماھو۔۔۔۔!!
باز روچ اِنت منی تھانگ ءَ یک جنگے بندات بیتگ من نہ لوٹ آں کہ تئی بارو ءَ بہ جیڑ آں بلے مُدام جیڑ آں۔۔۔۔۔۔۔ھر موسم گْوش ئے تئی اکس ءَ کشّ اِیت ءُ روت ، برے ھَورانی موسم ءَ جمبر مورشنزگاں بندات کن اَنت تْرمپ گْوش ئے تئی زیمرچکیں گپ ءُ ھبر اَنت۔۔۔۔۔۔اے زِمستان ءِ سارتیں شپ گْوش ئے تئی نرمیں دستانی گرمی اَنت کہ من ءَ تاھیر بکشاینت۔۔۔۔۔۔۔برے تاکچنڈ ءِ موسم ءَ درچکانی کپتگیں تاکاں پاد لگتمال کن اَنت گُڑا گُمان بیت تئی پادانی پادبرمش اَنت کہ منا تئی آھگ ءِ گُمان ءَ دَیَگ ءَ اِنت۔۔۔من تئی زھیرانی گپ گپّیں آس ءَ روکاں۔۔۔منی تھانگ ءِ بندات بیتگیں جنگ منی وس ءَ چہ ڈنّ اِنت۔ منی لبز ءُ مارِشت من ءَ دْروھگ ءَ اَنت۔۔ من ھچ گْوشت نہ کن آں۔۔۔۔۔۔من ھچ نبشتہ کُت نہ کن آں بس ابیتکی ءِ چادر ءَ مانپوشاں ءُ ھما دمان ءِ وشیں ساھتاں وتی پنجگاں بند کن آں کہ من ھمود ءَ تئی ھمرائی ءَ گْوازینتگ اَنت۔
ماھو!
وھد، سْیادی، مارِشت دْرست بدل بَہ اَنت بَلے مُوسم پد ءَ واتر بنت گوں گْوستگیں یاتانی وشبوھاں تھنائی ءِ ساھتاں دل ءِ دروازگ ءَ جن اَنت ءُ گْوستگیں وھد ءِ لھتیں وشیں دمانانی یاتاں پِرّین اَنت۔ ھمے یاتانی وشبو پد ءَ من ءَ ھما ھلک ءَ بَر اَنت کہ آ ھلک بلوچستان ءِ بھر اِنت ءُ بلوچستان منی ارواہ ءِ بھر۔۔۔۔۔۔ چینچو سال اِنت من درانڈیھ ءِ زِند گْوازینگ ءَ آں بلے انگت بلوچستان ءِ ھما میتگ ءِ ھر نِدارگ منی ارواہ ءِ سرا نَکش اِنت ، چو سَرپتگیں گلاب ءِ وشبو ءَ منی باتِن ءَ شنگ اِنت۔
ماھو!
مروچی بے تواری کِساس ءَ چہ گیش کپتگ ءُ سارتی کم ترّ اِتگ۔ اے ساھتاں من وتی کبر دْروشمیں کْوٹی ءَ کُرشی (کُرسی) ءِ سر ءَ نشتگ آں ۔سُھر چَکیں پلاسٹک ءِ ٹیبل ءِ سر ءَ چاہ اِیر اِنت ۔۔۔اے چاہ من ءَ گرماگ ءِ ھما روزردانی وھد ءَ تھت ءِ سر ءَ نِندگ ءُ چاہ ورگ ءِ ترانگاں گیج اَنت کہ جھل گْوات ءِ دنز ءُ گُباریں ساھتاں وارتگ اَت۔
اے شھر ءَ کہ من نشتگ آں اے شھر ءَ دنز ءُ گُبار نیست۔ اِد ءَ کِشک ءُ دگاں ھم دنز نیست ، بلے اِد ءَ دِل دَنزین اَنت ءُ چم ھم دنز ءُ گُباراں پُوشتگ اَنت ھچ چیز میم نہ بیت۔۔۔۔۔۔۔
ماھو!
ھما میتگ ءَ کہ من نشتگ اِت آں اُودے ھر چیز زیبا اِت اَنت۔ مچکدگ، کوہ، کَور، جمبر، ھَور، نود، دِرین ءُ بچکند۔۔ میتگ ءَ ھردیں ھَور ءَ گْورتگ ءُ شیپاں آپ آورتگ اَت گُڑا زندگی ءَ چو سنج ءِ رنگ ءَ وتی دْرستیں رنگ شنگینتگ اِت اَنت۔۔ ھرکس گوں شیدائیں دِلے ھمے اَبرمی رنگانی تہ ءَ گار بُوَگ لوٹ اِت۔ میتگ ءَ سُھب ءِ سر ءَ کُچکّانی چانگگ، کروسانی بانگ ءِ توار ءُ لھم لھم ءَ سارتیں گْوات ءِ ھمرائی ءَ بالی مُرگانی توار ءَ ھمک بے چاڑیں دِل تاھیر ءُ کرار بکشات اَنت۔۔
ماھو!
زندگی وشیانی دگ ءِ مُساپِر اَت کہ پد ءَ نہ وشیں جاورانی وڈالاں زردیں موسمانی کُٹ ءَ واب کپت۔ من ءَ شر یات اِنت زِمستان ءِ ھما سارتیں شپ ھر کس پہ اِیمنی ءَ وش واب اَت۔ شپ ءَ وتی گیشتریں سپر جتگ اَت ءُ دیم پہ مُرادیں روچ ءِ نیمگ ءَ جُنزان اَت کہ اناگہ ءَ بوٹ پادیں مردماں میتگ وتی انگیراں کُت ءُ تیرانی توار ءَ سرجمیں بازار جکسینت۔ پد ءَ ھر کس پہ دیمے تچگ ءَ اَت۔۔۔ لھتیں تیرانی میار بوت ءُ پہ ابد زندگ بیت اَنت۔۔۔ لھتیں برگ بوت کہ روچ ءِ مروچی دژمن ءِ زِندان ءِ تھاریں کُوٹیاں بلوچ بُوَگ ءِ سزا ءَ ورگ ءَ اِنت۔۔ لھتیں چو منی پیم ءَ درانڈیھ بوت اَنت۔۔
ماھو!
پد ءَ میتگ مٹ اِت۔۔ ھما وانگجاہ کہ ما کسانی ءَ ونتگ اَت ھمے وانگجاہ ءَ گوں چینچو یات بندوک اَت اَنت بوٹ پادیں سپاھیاں وتی بُنجل جوڑ کُت۔۔ ھما ماسٹر کہ مُدام زندگی، آجوئی، ایمنی ءُ تپاکی ءِ درس ئِے دات ھمے سپاھیاں روچ رھمانی جت ءُ شھید کُت۔۔ھر نیمگ ءَ چیزانی تب بدل بوت۔۔ جُتائیانی دراجکشیں موسمے بندات بوت، بلے بزگرانی بزگی ھلاس نہ بوت۔۔ دِرتّہ پُچّی ءُ شُدلاپی ھلاس نہ بوت۔ ھمُک گس ءَ چہ یکّے بیگواہ بوھان بوت۔ تیر سُپتگیں لاش ءِ ھر روچ کوہ، کَور، جنگل ءُ مچکدگ ءَ گِندگ بوت۔۔ھما مچکدگ ھم ویران بوت کہ گرماگی لوار سوچکیں موسماں میتگ ءِ مردماں نِشت ءُ ھشتاں چوکی لیب کُت ءُ کندگ ءُ مسکرا کُت۔۔
ماھو!
میتگ تُرسے ءَ وتی امبازاں زُرتگ اَت ءُ ھر کس تُرس آماچ اَت۔ ھمے تُرس ءَ من ءَ چہ میتگ ءَ، چہ ڈیھ ءَ دُور درانڈیھ ءِ تھاریں کُوٹی ءَ ابیتکی ءُ تھنائی ءِ امبازاں دَور دات۔ نی من انچیں شھرے ءِ بے تواریں دمکانی تہ ءَ ھُشک ءُ ویرانیں درچکی تاکے ءِ پیم ءَ آں کہ ھرکُجا گْوات کش اِیت من ءَ ھما نیمگ ءَ بارت۔۔ درانڈیھ ءِ بے رائیں مُچّی ءَ منی زندگی لگت داتگ۔ابیتکیں سُھب اِنت ءُ گریتگیں نیم روچ۔۔بے کَیپیں بیگاہ اِنت ءُ ویرانیں شپ۔۔۔دگہ ھچ نہ منتگ پہ من۔۔ بس گْوستگیں وھد ءِ ساھگ ءَ لھتیں یات اَنت کہ منی بے وابیں چمّانی تہ ءَ پَش کپتگ اَنت۔ اے واب مُدام من ءَ پُرس اَنت کہ رولہ ءِ وھد ءَ دْرست وتی گِس ءَ واتر باں۔۔۔۔۔۔۔تو باریں کدی واتر بَہ ئے۔۔۔۔۔۔۔۔؟؟
