پاکستان تحریک انصاف (پی ٹی آئی) کی حکومت نے ڈیجیٹل ڈیموکریسی کی حکمت عملی کے لیے 23 رکنی کمیٹی بنانے کا فیصلہ کرلیا۔
پاکستانی وزیر اعظم کے فوکل پرسن ڈاکٹر ارسلان خالد کے مطابق ڈیجیٹل میڈیا کے لیے وزارت اطلاعات و نشریات میں ڈیجیٹل میڈیا ونگ کی تشکیل کے لیے رواں مالی سال کے بجٹ میں 4 کروڑ 27 لاکھ روپے مختص کیے گئے تھے۔
انہوں نے بتایا کہ مذکورہ رقوم کابینہ کی منظوری کے بعد مختص کی گئی۔
علاوہ ازیں میڈیا رپورٹ کے مطابق حکومت کے زیر انتظام ڈیجیٹل میڈیا ونگ سوشل میڈیا پر حکومتی فیصلے کا دفاع کرے گا اور حکمراں جماعت پی ٹی آئی پر ہونے والی تنقید کا جواب دے گا۔
اس ضمن میں ارسلان خالد نے میڈیا رپورٹس کو مسترد کردیا۔
انہوں نے بتایا کہ ڈیجیٹل میڈیا ونگ کا مینڈیٹ اس سے کہیں زیادہ وسیع ہے۔
وزیراعظم کے فوکل پرسن نے کہا کہ ‘حکومتی اقدامات کی مانیٹرنگ کے علاوہ ڈیجیٹل میڈیا ونگ سوشل میڈیا ڈیموکریسی کے لیے کام کرے گا، جعلی خبروں کے تدارک پر اپنی توجہ مرکوز کرے گا’۔
انہوں نے مزید بتایا کہ ڈیجیٹل میڈیا اسٹریٹجی کی بہترین کارکردگی سمیت مہم کی تشہیر کے لیے ڈیجیٹل میڈیا ونگ فرائض انجام دے گا۔
ڈاکٹر ارسلان خالد نے بتایا کہ حکومت اپنے شعبہ جات کے لیے سوشل میڈیا پالیسی مرتب کرچکی تھی اور مذکورہ ونگ اس پالیسی پر عملدرآمد کو یقینی بنائے گا۔
23 رکنی ڈیجیٹل میڈیا ونگ میں ایک جنرل منیجر، ایک ڈیجیٹل میڈیا کنسلٹنٹ، پانچ ڈیجیٹل کمیونیکشن افسر، 3 ویڈیو ایڈیٹرز، دو ویڈیو گرافر، ایک فوٹو گرافر، 4 گرافک ڈیزائنرز، پانچ مشمول مصنفین اور ایک ڈیجیٹل فیڈ منیجر شامل ہوں گے۔
دستیاب دستاویزات کے مطابق جنرل منیجر، پریس انفارمیشن ڈپارٹمنٹ میں کام کریں گے اور پی آئی ڈی کے تحت کام کرنے والے تمام سرکاری محکموں کے لیے ڈیجیٹل میڈیا حکمت عملی پر عمل درآمد کے ذمہ دار ہوں گے۔
تمام وزارتوں کے تحریری مواد کے نظم و نسق کے علاوہ اس حکمت عملی میں ڈیجیٹل اشتہارات کی تشکیل کے ساتھ حکومت کے سوشل میڈیا اکائونٹس کی تصدیق بھی شامل ہوگی۔
دوسری جانب ڈیجیٹل کنسلٹنٹ سرکاری پروگراموں اور اعلانات کی کوریج کو یقینی بنانے کے لیے پی ٹی وی اور میڈیا ہائوسز کے ڈیجیٹل ڈیسک کے ساتھ رابطے کی ذمہ داری بھی ادا کرے گا۔
5 ڈیجیٹل کمیونیکشن افسران وزارت خزانہ، غربت کے خاتمے اور صحت، اطلاعات، خارجہ اور داخلہ امور کی وزارتوں میں کام کریں گے۔
وزارت خارجہ میں کام کرنے والے مواصلات افسر کو بھی سیاحت کے فروغ کا کام سونپا جائے گا۔
وزیر اعظم کے فوکل پرسن نے بتایا کہ بھرتی عوامی ہوگی اور اس ہفتے ایک اشتہار بھی دیا جائے گا۔
