کودکیں شھیدانی نام ءَ | میجر مجید

رملچّہ


چمّانی ارس شیپ گر اَنت
گْوار اَنت چو بشّی جمبر ءَ
توپانے کار اَنت ماں زر ءَ
چو نُوھ ءِ توپان ءِ وڑ ءَ
بلّے جھان بیت چیر ءُ سر
پاھار دلانی چست بنت
آشوب ءِ دْرچکے ناڑ جنت
آجوئی ءِ پُلّے رُد اِیت
آزمان، زمین ءُ ماہ ءُ روچ
استال اد ءَ کوردیم بنت
اجگیں کشار ھم رون بنت
سیاہ ءُ تھار اِنت مُشتری
چہ کِرداں بدیں بنیادم ءِ
پُسّگ ھوا ءِ دُتّکیں
میّت ماں چار راہ ءِ سر ءَ
لوٹ اِیت ھکّاں چہ ترا
اے ھون واریں رستر اَنت
اے بے گناھیں کودکاں
چہ مادر ءِ کُٹّ ءَ پُل اَنت
پُلّاں گَڑ اَنت گوں گْروھگاں
آریپیں پِت ھم بے وس اَنت
بْرات تنگھیں چو پِیلّ ءَ جُش اَنت
شُومّیں یزید ءِ لشکر ءَ
دھر ءِ دو پادیں نَرھر ءَ
چہ ما پُل اِت لجّ ءُ میار
چمّانی دیم ءَ بْرھنگ اَنت
مئے مکّھیں مات ءُ گْوھار
پاد ءَ کہ آپ پِرگْوست سر ءَ
دستان بند ئے کئی گْور ءَ
کس پہ دگر زھم نہ جنت
کَیت کِژنَوے ریچ اِیت پہ تو
زور ءَ بہ دے باسکاں وتی
سوب وت تئی پاداں کپ اِیت
نی کَئی اُمیت ءَ نشتگ ئے؟
چو جِدّی گُلام دست بستگ ئے
راجاں گُلیں پدمنتگ ئے
سَیل کن وتی راجدپتر ءَ
مُھکم کن راج ءِ سنگر ءَ
چو سرمچاریں کُنگر ءَ
چو کہ نوابیں اکبر ءَ
مامو مری شیر ء نر ءَ
چو ھالدیں رھدربر ءَ
بیا دژمن ءِ دیم ءَ در ءَ
سنگ ءَ بہ دے جنگ گوں سر ءَ
پْروش دے لگوریں لشکر ءَ
پْروش دے لگوریں لشکر ءَ