موتک لچّہ
بلوچ راجی کماش ءُ آشوب ءِ سرھیل نمیرانیں میر جُمّا ھان ءِ یات ءَ
میجر مجید
گوں کھریں سوزمان ءُ بْرتکگیں ارماناں شُت ئے
مادنیں کشکے کشّ اِت، چہ دیواناں شُت ئے
راج پُرسیگ کُت ڈیھ بلوچانی سرجمیں
گوں وتی شھدیں تْرانگاں جُنزان ءَ شُت ئے
تو نمیران ئے، دپتراں راج ءِ زندگ ئے
انچو کہ بَشّی کوکر ءَ گْرندان ءَ شُت ئے
کِشتگیں آشوب ءِ نِھال آپ دات تْرونگلیں
چو مَھپَلی نوداں کوچگاں شَنزان ءَ شُت ئے
بَسرہ ءُ بَگداد ، لیبیا تاں شام ءِ ھَلکَواں
مِسر ءُ لبنان ءُ جُھدانی آزمان ءَ شُت ئے
پُلّیں تَگران داں کُروچی ءِ کَلّگ ءَ
کَید ءُ زمزیل ءُ سانکلاں پْروشان ءَ شُت ئے
ڈِیل نہ کُت ایرجیگ ناشر ءِ رِپک ءُ پَندلاں
توکل ءَ مردی گوں ھمبلاں رُمبان ءَ شُت ئے
بزّگیں راج ءُ پُلّیں آشوب ءِ سرکماش
دھر ءِ زوراکاں پادلپاشان ءَ شُت ئے
تاں جھان ھست اِنت نام تئی مان اِیت تنگویں
مھر ءُ دوستی ءُ تپاکی جمبراں گْوران ءَ شُت ئے
گیر کَیت دائم تئی شکّل ءُ شھدیں گپّ ءُ تْران
اَمبر ءُ مسک ءُ چوھواں دْرنزان ءَ شُت ئے
پنت ءُ گُپتار گوھریں، نکش اَنت دپتراں
لال ءُ مُروارِد لُولُواں ریچان ءَ شُت ئے
