اے منی مُدامیگیں آدّت اَت کہ سُھب ءِ سر ءَ مھلہ کُوپے سْیاہ چاہ گوں سِرتگیں نگنی چُنڈے ءَ برے بور ءُ برے مہ ور، پہ کار ءِ شوھاز ءَ چارراہ ءِ سر ءَ وت ءَ سر کن کہ اُود ءَ منی رنگ ءَ بازیں مزور پہ کار ءِ اُمیت ءَ دانکہ نیمروچ ءَ میلانک بیت۔ برے کار رس اِیت، برے گوں ھُشکیں دستاں چادر ءَ کُوپگ ءَ چنڈّ ءُ گِس ءَ واتر بو، زھگ گوں اُمیتیگیں دِلے چانٹ ءِ دپ ءَ رھچار کہ پِت کَیت ءُ مئے ھورکیں شکم ءَ چُنڈے سِرتگیں نگن نسیب بیت، بلے۔۔۔۔۔۔۔۔۔۔
نیزگاری ءِ دُرشک ءُ آسشانیں ساھگ ءَ زند ءِ چاریں روچ تھتران اِتاں کہ یک سُھبے ءِ سر ءَ مھلہ من گوں وتی ھمساھِگ لشکران ءِ ھمراھی ءَ دِرکّ بست پہ چارراہ ءَ دانکہ کارے نسیب بِہ بیت ءُ زھگانی ھورکیں شکم ءِ دوزھیں آس کمیں تھم بِہ بیت، وھدے من ءُ لشکران دِہ دِہ ءَ چارراہ ءِ نزّیک ءَ سر بوت اِیں۔۔۔۔۔۔گِنداں مئے ھند ءِ نامی ئیں لبزانکار ءُ شائِر ، ایردستیں راج ءِ توار اِشکند زھیر گوں وتی داداں نِشتگ ءُ آیانی بھا کنگ ءِ جار ءَ جَنَگ ءَ اِنت۔۔۔۔۔۔۔۔۔۔
من کہ اِشکند زھیر گوں وتی اِشکندیں واھگاں دیست۔۔۔۔۔۔، دِل ءِ کلّگ ءَ بے تاھِیری یے رُست ءُ دوزھیں گُژن ءِ جناوریں دْروشم سھرا بوت۔ من گوں وتی بے تواری ءَ اِشکند زھیر ءِ کش ءَ نِشت آں ءُ پہ ھلوت گْوشت، واجہ اے چونیں کارے تو کنگ ءَ ئے۔۔۔۔۔۔؟ اے داد کہ ترا چہ سرکار ءُ اے دِگہ چاگِردی ءُ لبزانکی گلانی نیمگ ءَ رستگ اَنت پہ بھا کنگ ءَ نہ، بلکیں اے تئی بود ءُ لائکی ءِ زندگیں منّانک اَنت، زان ءَ جیڑہ چی اِنت کہ تو پہ اِیشانی بھا کنگ ءَ در کپتگ ئے۔۔۔۔۔۔۔۔۔۔
کسانیں بے تواری ءَ پد اِشکندیں زھیر ءَ گوں گُلگُیں چّماں دِرّائینت ءُ گْوشت، ورناہ! پہ ایردست ءُ گُلامیں راج ءِ پُسّگ ءَ تِلاہ ءِ دادے بِہ بیت ھِچّ مانا نہ دار اِیت۔۔۔۔۔۔۔۔۔۔۔، وائے پہ گُژن ءِ جپ جپیں آس ءَ کہ بالاد ءِ بند بنداں روک اِنت، بلے اے گُلامی ءِ داد اِنت کہ من ءَ مجبُورے کُتگ پہ دادانی بھا کنگ ءَ، اگاں نا مرچی گُلامی مہ بوت اِیں من ءُ تو دوئیں اے چارراہ ءِ پانگ نہ اِت اِیں۔۔۔۔۔۔۔۔۔۔۔
چہ واجہ اِشکند زھیر ءِ اے زپت ءُ کُچلیں دانکانی اِش کنگ ءَ پد من ءَ سما کپت کہ من گُلامے آں، ءُ منی ماتیں گُلزمین درآمداں کْوزہ کُتگ ءُ مارا وتی جِند ءِ سیراپیں سرڈگار ءِ سر ءَ ھِچّ وڑیں بِستارے نیست۔
وھد دیم ءَ کِنزان اَت کہ گرم ءِ ٹاک ءَ میتگ ءِ مسیت ءَ جارے شِنگ اِت ءُ من ءَ باور کنگ ءَ نہ اَت، بلے باوری ھبرے اَت کہ اِشکند زھیر ءَ زھر وارتگ ءُ وتکُشی کُتگ۔ مرچی بیگاہ ءِ ساھت شش ءَ ھُدامُرزی ءِ نماز جنازہ بیت وت ءَ چہ نیکی ءِ سواب ءَ بے بھر مہ کن اِت۔۔۔۔۔۔۔۔۔۔۔۔
من کہ مُلّا ءِ دانکانی گُڈّی رِد اِش کُت، سک زھر اتک ءُ من ھمے پیسلہ کُت کہ واجہ اِشکند زھیر ءِ نماز جنازہ ءَ نہ رو آں، چی ءَ کہ من چہ واجہ ءِ زِند ءِ جنجالاں آشنا اِت آں بلے زِند ءَ ھِچّ کُت نہ کُت، گُڑا نوں آ مُرتگ چے زانت کہ منی نماز جنازہ ءَ کَے اتکگ ءُ چنکّے پِرّیتکگ یا نہ۔۔۔۔۔۔۔۔۔۔۔۔
بلے! واجہ اِشکند زھیر ءِ گوھریں دانک منی مجگ ءَ مُدام چو سمگ ءَ چُونڈگ ءَ اَت کہ ” اے گُلامی ءِ داد اَنت، اگاں نا من ءُ تو دوئیں سُھب ءِ سر ءَ مھلہ اے چارراہ ءِ پانگ نہ اِت اِیں”۔۔۔۔۔۔
پمشکا من گوں واجہ ءِ اے ھبر ءَ تِپاک آں کہ گُلامی اگاں مہ بوت اِیں گُڑا ما مرچی وتی جِند ءِ سیراپیں سرڈگار ءِ چو بیوس ءُ لاچار نہ بوت اِیں، بلکیں مئے زِند پہ لاچای ءُ مرگ ھم پہ لاچاری۔۔۔۔۔۔۔، گُڑا ما کُجام اُمیت ءَ بِہ نِند اِیں کہ اے زُوراکیں ھاکم مارا گورگیں سُھبے شکسا اِیت۔۔۔۔۔۔۔۔۔۔۔۔، بلکیں پہ گورگیں سُھب ءِ سمبھینگ ءَ گوں ھما یاگی ئیں بچّاں پند بُرّگی اِنت کہ پہ مئے آکبت ءِ واستا چہ زِند ءِ ھر سکّی ءُ وشیاں سرگْوستگ اَنت۔۔۔۔۔۔، اگاں نا مئے باندات گُڑا بانداتے نہ بیت کہ ما کمرزانی بستگ ءُ مُپتیں بٹاک درشان کن اِیں۔۔۔۔۔۔۔۔۔۔۔
