چو تُنّیگیں کپوتے ءَ آپ ءِ شُھازگ ءَ بے سوب بوتگ آں، ءُ سرجمیں جنگل ءَ تْرمپے آپ نہ گوایت ءُ ساہ چہ بالاد ءِ بنداں سِدان ءُ مرگ ءِ کنڈگ ءَ سر اِنت۔ کُجام دیم ءَ کہ چمّاں شانک دیاں آسشانیں کِشک ءُ منی تُنّیگیں بالاد، سپر ءُ کُنٹگداریں دگ۔
وھدے کہ من جُنزگ بِنا کُت سپر دْراج کشّ بُوھان بوت ءُ پادانی تْراولان دپ پَچ کُت۔ واہ ءُ زاریاں جھاں جکسینت ءُ نوکیں جُستے سرکشّان اَت۔۔۔۔۔۔۔۔
بلے کَے اِنت کہ تْراولیں پادانی زیماں درمان بِہ کنت ءُ بِہ گْوش اِیت جُنز کہ تئی سُھردپیں مِنزل دیم ءَ پیداک اِنت۔
پمشکا اے جُست باتِن ءَ مُدام ھمے پسّو ءَ پُولگ ءَ اِنت کہ کسے ھست منی تُستگیں اُوست ءَ مُھکم بِہ کنت ءُ کُنٹیں گاماں دیم ءَ جُنزگ ءِ ھاٹیگ بِہ شکسا اِیت، اے گِیمُرتگیں دل ءِ گَماں کمیں کمتِر ءُ شادِھانی بیٹ سر ءِ شون ءَ بِہ دنت۔ کسے ھست کہ من ءَ تسلّا بِہ دنت ءُ دانکہ دیمتر ءِ جُنزگ ءِ واھگ گیش وتئی رپتار ءَ تْرند تِر بہ کنت۔۔۔۔۔۔، بلے بژن کہ نہ گنداں من چوشیں دوزواھے اے زند ءِ تھاریں جنگل ءَ۔۔۔۔۔۔۔۔، بس نپسا نپسی اِنت ءُ ھرکس ءَ گْوش ئے کانٹ رُودینتگ پہ دومی ءِ سینگ ءِ جِکّ دَیَگ ءَ۔
بلے! چے بہ کنت مردُم، چی ءَ کہ اے نہ کُٹوکیں سپر ءَ درد مُدام چو ساھِگ ءَ ھمراہ اَنت، مئے نِزوریں کوپگاں انچو سما بیت کہ اے گْرانیں بار پہ زور لڈّگ بوتگ کہ بلکیں نیمراہ ءَ دمتُوس بیت ءُ ساہ دنت، بلے وھدے کہ بار کوپگاں بیت گُڑا جُنزگی اِنت، چی ءَ کہ ھر وڑ ءُ ھر پیم اِنت منی کوپگان اِنت۔ منی میار اِنت۔
اگاں مِنزل ستر بیمّناک ءُ تُرسناک اِنت بلے جُنزگی اِنت، ءُ جُنزگ زِندگی اِنت۔ ءُ جوریں بد چونیں رِپک ءُ پندل بِہ ساز اَنت، بلے جزماں کہ منی مِنزل ءَ سر بُوَگ پہ من ھژدری اِنت۔ چی ءَ کہ اے بار من ءَ کوپگان اِنت، گُڑا اے بار مِنزلے الم لوٹ اِیت۔پمشکا من ءَ پہ وتی مِنزل ءِ سر بُوَگ ءَ گام دیم ءَ شھار دَیگی اَنت ءُ گُشاد گُشاد ءَ جُنزگی اِنت۔ اے تْراولیں پادانی زیم من ءَ وت ءَ درمان کنگی اَنت، وت ءَ وت تسلّا دَیَگی اِنت، ءُ بے ھاٹیگیں بالاد وت سِکت بکشگ ءُ جُنزگی اِنت۔۔۔۔۔۔۔
ھمے رُژن ءِ اُمیت ءَ زِندگی ساہ کشّ اِیت ءُ وت ءَ دیم پہ مِنزل ءِ پاند ءَ تیلانک دنت، اگاں نا ابید ء اے رُژن ءَ اے زندگی زندے کدی گْوشگ نہ بیت، ناکہ اِیمنیں آکبتے بیت۔
پمشکا منی زِند ءِ اولی ءُ گُڈّی ارمان ھمیش اِنت کہ من وت ءَ رُژن ءِ مِنزل ءَ سر بِہ کن آں، ءُ باندا اے تانسریں زِند تھار ماھی ءِ آماچ مہ بیت، بلکیں رُژن ءِ سِیمسراں رُژنائیں بانداتے ءِ ھُدابُند بِہ بیت۔۔۔۔۔۔۔۔۔۔۔
