بلوچستان کے مرکزی شہر کوئٹہ سریاب میں نامعلوم موٹرسائیکل سواروں کی فائرنگ سے ایک اہلکار ہلاک ہوگیا جبکہ چاغی میں نامعلوم شخص کی گولی لگی لاش برآمدہوئی ہے جسے ضروری کارروائی کے لئے ہسپتال منتقل کر دیا گیا ہے۔
کوئٹہ کے سریاب کے علاقے خلجی کالونی علی زئی اسٹریٹ میں نامعلوم موٹرسائیکل سواروں کی فائرنگ سے پولیس اہلکار محمد عباس ولد نامدار خان ہلاک ہوگئے۔
پولیس کے مطابق واقعے کے بعد ملزمان کی تلاش اور مزید تحقیقات کا عمل جاری ہے۔
ہلاک پولیس اہلکار کا تعلق قوم قبیلے سے اور رہائش خلجی کالونی میں تھی۔
واقعے کے بعد پولیس حکام نے علاقے میں سکیورٹی اقدامات مزید موثر بنانے اور ملزمان کی گرفتاری کے لیے کارروائی شروع کردی۔
دوسری جانب چاغی میں نامعلوم شخص کی گولی لگی لاش برآمد ہوئی ہے۔
ذرائع کے جاری کردہ بیان کے مطابق تھانہ چاغی کی حدود میں نامعلوم شخص کی گولی لگی لاش برآمد ہوئی ہے۔
مقتول کی جیب سے شناختی کارڈ ملا ہے، جس پر نام محمد یونس ولد محمد قاسم تحصیل منگچر ضلع قلات درج ہے۔
پولیس نے لاش کو ضروری قانونی کارروائی کے لیے اسپتال منتقل کیا، جبکہ مزید تحقیقات جاری ہیں۔
