بلوچستان کے اضلاع مستونگ اور آواران سے دھماکوں اور سیکیورٹی فورسز کو نشانہ بنائے جانے کی اطلاعات موصول ہوئی ہیں، جن میں 2 فوجی اہلکار ہلاک ہو گئے ہیں۔
تفصیلات کے مطابق ضلع آواران کے علاقے پیراندار میں قائم پاکستانی فوج کے ایک پہاڑی مورچے کو اندر نصب دھماکہ خیز مواد کے ذریعے نشانہ بنایا گیا ہے۔
علاقائی ذرائع کے مطابق اس بم دھماکے کے نتیجے میں مورچے میں موجود 2 فوجی اہلکار موقع پر ہی ہلاک ہو گئے۔
واقعے کے فوراً بعد مقامی لوگوں نے فوج کو پہاڑی مورچے سے اپنے دو ہلاک اہلکاروں کی لاشیں نیچے اتارتے ہوئے دیکھا۔
دوسری جانب ضلع مستونگ کے علاقے کھڈ کوچہ میں ایک شدید اور زوردار دھماکے کی آواز سنی گئی ہے۔ دھماکے کی شدت سے علاقے میں خوف و ہراس پھیل گیا۔ تاہم، دھماکے کی دقیق نوعیت، ہدف اور ممکنہ جانی و مالی نقصان کے حوالے سے تاحال حتمی تفصیلات سامنے نہیں آ سکی ہیں۔
دونوں واقعات کے بعد متعلقہ علاقوں میں سیکیورٹی صورتحال کشیدہ ہو گئی ہے، جبکہ مزید تفصیلات کا انتظار کیا جا رہا ہے۔
