بلوچستان کے علاقے چاغی اور نوشکی میں پیش آنے والے دو مختلف واقعات میں نامعلوم مسلح افراد کی فائرنگ سے ایک قبائلی شخص ہلاک ہو گیا ہے ، جبکہ دوسرے واقعے میں ایک سرکاری اہلکار سمیت 2 افراد کو گاڑی سمیت اغوا کر لیا گیا ہے۔
مقامی ذرائع کے مطابق ضلع چاغی کے اہم تجارتی مرکز چاغی بازار میں نامعلوم مسلح افراد نے حملہ کر کے معروف قبائلی شخص ملک کریم داد محمد حسنی کو گولی مار کر قتل کر دیا۔
واقعے کے بعد حملہ آور موقع سے فرار ہونے میں کامیاب ہو گئے۔
قتل کی وجوہات اور پس پردہ محرکات تاحال سامنے نہیں آ سکے ہیں، جبکہ مقامی پولیس نے واقعے کی تحقیقات شروع کر دی ہیں۔
دوسری جانب ضلع نوشکی کے علاقے احمد وال سے نامعلوم مسلح افراد نے ایک کارروائی کے دوران پٹواری عبدالحکیم جمالدینی اور ہنزالا نامی شخص کو ان کی گاڑی سمیت تحویل میں لے کر نامعلوم مقام پر منتقل کر دیا۔
