بلوچستان کے علاقے مستونگ، جھاؤ اور واشک سے سیکورٹی اقدامات، چیک پوسٹ پر قبضے، فائرنگ اور لیویز اہلکاروں کو تحویل میں لیے جانے کی اطلاعات سامنے آئی ہیں۔
مقامی ذرائع کے مطابق انتظامیہ نے ممکنہ سیکورٹی آپریشن کے خدشات کے پیش نظر ضلع مستونگ کی تحصیل کھڈکوچہ کے رہائشیوں کو کل دوپہر 3 بجے تک علاقہ خالی کرنے کی ہدایت جاری کر دی ہے۔ سیکورٹی خدشات بڑھنے کے باعث علاقے میں سیکورٹی اقدامات کو انتہائی سخت کرتے ہوئے دوسری بار کرفیو بھی نافذ کر دیا گیا ہے۔
ذرائع کے مطابق گزشتہ روز جھاؤ کے علاقے "شیریں اور فرہاد” میں مسلح افراد کی ایک بڑی تعداد نے پولیس چیک پوسٹ کا کنٹرول سنبھال لیا۔
حملہ آوروں نے چیک پوسٹ پر موجود اسلحہ اور دیگر سامان قبضے میں لے لیا جبکہ ایک گاڑی اور کئی موٹر سائیکلوں کو آگ لگا دی۔
اس واقعے کے بعد مسلح افراد نے ناکہ بندی کے دوران فائرنگ کر کے ڈیتھ اسکواڈ کے دو ارکان، جن کی شناخت ظفر اور فیض کے نام سے ہوئی ہے، کو ہلاک کر دیا اور ان کے پاس موجود اسلحہ بھی ساتھ لے گئے۔
ادھر واشک سے اطلاعات سامنے آئی ہیں کہ مسلح افراد نے لیویز فورس کے اہلکاروں کو تحویل میں لے لیا ہے۔
ذرائع کے مطابق لیویز اہلکار ٹیکس وصولی کی کارروائی میں مصروف تھے کہ اس دوران مسلح افراد نے انہیں تحویل میں لے لیا۔
ذرائع نے مزید بتایا کہ مسلح افراد نے لیویز اہلکاروں کے زیرِ استعمال اسلحہ اور گاڑیاں بھی اپنے قبضے میں لے لیں۔
