پاکستانی فوج نے ضلع گوادر کی تحصیل جیمڑی کے علاقے پانوان میں فوج کشی کے دوران 60 سے زائد افراد کو حراست میں لینے کے بعد جبری طور پر لاپتہ کر دیا ہے، جبکہ متعدد مکانات کو بھی مسمار کر دیا گیا ہے۔
سنگر نیوز کے ذرائع نے اب تک 9 جبری لاپتہ افراد کی شناخت کی تصدیق کی ہے، جن میں پیرگل ولد احمد، سمیر ولد پیرگل، سراج ولد ابراہیم، رحیم جان ولد حاصل خان، گمان ولد مراد جان، نوید ولد داد محمد، سید محمد ولد لال بخش، شاہ زیب ولد سید محمد اور قاضی عبدالصمد ولد قاضی عبدالحئی شامل ہیں۔ ان تمام افراد کو 4 جولائی کو فوجی کارروائی کے دوران حراست میں لیا گیا تھا، جس کے بعد سے وہ پاکستانی فوج کی تحویل میں جبری لاپتہ ہیں۔
ذرائع کے مطابق فورسز کی جانب سے مسمار کیے گئے گھروں میں نور محمد ولد یوسف اور غلام نبی ولد جعفر کے مکانات شامل ہیں۔
علاقے سے ملنے والی اطلاعات کے مطابق، پانوان اور اس کے گردونواح میں فوجی دھاووں کا سلسلہ مسلسل جاری ہے، جس میں پانوان کو خاص طور پر نشانہ بنایا جا رہا ہے۔ ان پے در پے حملوں اور خوف و ہراس کے باعث گاؤں کی اکثریت نقل مکانی کرنے پر مجبور ہو گئی ہے۔
