من نشتگ ءُ رسانکدر ءَ پولگ ءَ ات آں کہ چم جاوید ایم بی ءِ نوک شنگ بوتگیں کتاب ”دریا کسہ کنت“ ءِ یک پوسٹے ءِ سر ءَ کپت انت۔ دل ءَ جیڑگ ءَ ات آں کہ اے جاوید ھم کمال کنت، چُنیں جوانیں سَرنام جیڑیت، ”دریا کسہ کنت!“ جاوید وتی پوسٹ ءِ تہ ءَ گُشگ ءَ ات ”دریا ھما ھوالکار اِنت کہ ھچبر ھاموش نہ بیت۔ ھر وڑیں مولماں وتی کسّہاں ”سینسر“ بوھگ ءَ نئیلیت۔ برے بچار تیاب ءَ میڑہ اِنت ءُ برے دپ دوچیں جاک۔“ بہ گندئے آئی اے چاریں لَوز منی نوِشتانک ءَ گوں سیادی مہ دار اَنت بلے آئی ءِ گچین کُرتگیں سرنام ”دریا کسہ کنت“ الم منی نوشتانک ءَ گوں سیادی داریت، یا کہ من پہ زور سیادی کشگ ءَ آں۔ پرچا کہ من دریا جاک ءُ چڑّکاہ کنگ ءَ دیستگ۔ ھما آچشیں پگر دیستگ ات کہ تیاب ءَ لیپگ ات۔ ھما انگریں ھیال دیستگ ات کہ گوں گْورمانی روانی ءَ زِر ءَ ترپل اَت۔
ھؤ، دریا کسّہ کنت! بلوچ ءِ دریا کسہ کنت! وتی سینگ ءِ اندر ءَ بدتگیں ناوشّیاں کشّیت، کُوکار کنت ءُ ھمے توانگریں توار ءَ گوں سرجمیں کرن ءَ جسکینیت۔ جنگی جاوراں گیشتر ھاموش نہ بیت ھکّل ءُ چڑّکاہ کنت۔ ءُ پد ءَ، وھدے دریا وت گُلام بہ بیت گُڑاں وتی سانکلانی چنڈینگ ءَ بس نہ کنت۔ آسن ءُ آھن ءِ میڑ کنت۔ اے دریا ءَ کرنانی کچ ءَ ودار کُتگ، باز سگتگ۔ نوں چہ وتی جبین ءَ آچش ءُ انگر شانگ ءَ اِنت۔
ھمے داب ءَ بلوچ لبریشن آرمی ءَ ھم دوھانزدہ اپریل ءَ جیونی ءَ گلامی چہ اُنڈالاں سِندیت ءُ بیہار دنت، ءُ آسن ءُ آھن میڑین ایت۔ پنجاپی کوزاگیریں پوج ءِ سئے پوجی جنت۔ اے ھمّلی کاروان ءِ اولی ءُ سرسوبیں جلہو ات، ”ھمل میری ٹائم ڈیفینس فورس“ گل وتی نوکیں زری یونٹ (میری ٹائم یونٹ) ءِ پجار ءَ کنت ءُ کَوزاگیریں پنجاپی لشکر ءَ ھبردار کنت کہ آ نوں بہ جزمیت کہ بلوچستان ءِ سرڈگار ءَ ھوار آئی ءِ زِر ھم پہ آھاں یک جنگجاھے، ءُ بلوچ ھردُھیں جاھاں پنجاپی لشکر ءَ پروش دنت۔
جئیند ءِ جار ءَ من ءَ ”لیبریشن ٹائیگرز آف تامل ایلام LTTE“ ءِ ترانگاں بُرت۔ تامل ٹائیگرز اولی سلاہ بندیں گلے بوتگ کہ آئی کرا مھکم ءُ توانگریں ریگولر ائیر فورس ءُ میری ٹائم فورسے بوتگ. بہ گندئے اے گپ ءَ کس رد کُرت نہ کنت کہ تامل ٹائیگرز دنیا ءِ تاگتوَرتریں سلاہ بندیں گلے بوتگ۔ تامل ٹائیگرز ءِ جنگولانی کساس لکانی کچ ءَ بوتگ۔ ھمُک یونٹ ءِ تہ ءَ ھزارانی کچ ءَ جنگول بوتگ انت۔ اگاں ما گل ءِ یونٹ ءُ وِنگ آنی گپ ءَ بہ کن ایں گڑا مردم ھیران بیت۔ تامل ٹائیگرز ءِ یونٹ ڈویژنانی تہ ءَ بھر بوتگ انت۔ بزاں کہ جتا جتائیں ونگ (Wing) بوتگ انت ءُ ھمُک ونگ ءِ تہ ءَ جتا جتائیں یونٹ بوتگ انت۔ ھنچوش کہ پوجی وِنگ (Military Wing)، زالبولانی وِنگ(Women’s Wing)، انٹیلیجنس وِنگ (Intelligence Wing) ءُ ایدگہ۔
ھمے داب ءَ 1984 ءَ LTTE ءِ زری لشکر Sea Tigers ءِ بُنشت ایر کنگ بیت، ءُ اے میری ٹائم یونٹ پوجی وِنگ ءِ یونٹے بیت کہ سری لنکا ءِ نیوی ءِ سر ءَ پِدائی اُرش ءُ بمباری اُرش، ءُ کوآرڈینیٹڈ اُرش ءُ سری لنکا نیوی ءِ مزنیں کساس ءَ تاوان بار کنگ ءَ زانگ بیت۔ سری لنکا ءِ گس جنگی ءِ وھد ءَ سی ٹائیگرز ءَ سری لنکا نیوی ءِ کساس 29 کسانیں کوسٹل گشتی بوجیگ، 20 ڈوورا-کلاس ءِ گشتی بوجیگ، 3 گن بوٹ، 2 مزنیں سرویلنس کمانڈ میل ءُ یک کارگو میلے ھم مانداشتگ ءُ تبا کُتگ۔ مارا آئی لہتیں سوبمندیں جلہوانی درور ھم دزکپنت۔ 1994 ءَ سی ٹائیگرزاں سری لنکا نیوی ءِ آف شور گشتی میل SLNS Sagarawardena ایربُڈّینت ءُ آئی ءِ کپتان دزگیر کُرت ءُ کنکیسنتھورائی ءَ سرویلنس کمانڈ میل A 516 ہم مانداشت۔ سی ٹائگرزاں سری لنکہ ءِ کوزاگیریں لشکر ببا داتگ، ءُ مزنیں کچ ءُکساسے ءَ تاوان بار کُتگ۔
زِر ءِ آشوب انگت ایمن نہ اِنت، زِر ءِ آشوب ھما وھد ءَ ایمن بیت کہ پنجاپی کَوزاگیریں لَشکر ءُ دری دُز ءُ ڈُنگ آنی میل آچش زدگ ءُ ماندارگ بہ بنت۔ ڈُنگیں لشکر بہ جزمیت کہ زِر نوں شورہ شانیت، نوں ھما پلیتیں جوناں لیپگ کنت۔ نوں آ دور ءُ باری شُتنت کہ زِر نیل ءُ سبز بوتگ نوں زَرد ءُ سُہر اِنت انگر ءُ اشکر ریچگ ءَ اِنت۔ ءُ داں آئی انگریں بالاد ءِ سر ءَ دُز ءُ ڈُنگ است ماننت، آ سوچان کنت۔ زِر ءِ پھازوک کہ ھَمے زِر ءِ انگریں بالاد ءَ چہ رُستگ ءُ آجوئی، ایمنی ءُ مہرانی پیگمبر جوڑ بوتگ اَنت، شالا کہ آجوئی ءُ ایمنی ءِ مستاگر بنت۔
ھنچوش کہ سی ٹائیگرز سری لنکا ءِ نیوی ءِ پروش دئیگ ءَ سرسوب بوتگ، ءُ سری لنکا ءِ لشکر ءَ مزنیں کچے ءَ تاوان بار کنگ ءَ سوبمند بوتگ، ءُ زِر پد ءَ وتی دستاں کتگ اِش، آ روچ دُور نہ انت کہ بلوچ ءِ پد ءَ بلوچ ءِ بیت ءُ بہ گندئے بلوچ پہ ایمان ءُ سِتک گُشیت کہ اے جُہد ءِ شم داں آجوئی ءِ سُہب ءَ بلیت۔ کُنگریں ھمل ءِ کسہاں زندگ داریت۔
عہدی شئیرے کہ؛
ھمل ءَ گوانکے دریائی مُرگان ءَ جتگ
او زری ملیاراں منی اھوالاں بر اِت
کُنگریں پیرداد ءُ گلامُو ءَ سر کن اِت
پُشپدی کار ءُ کسواں گیگ ءُ گوم کن اِت
پُربہیں بور ءِ تردگ ءُ دوراں نرم کن اِت
زِر زندگ اِنت، ھمل زندگ اِنت ءُ داں اے زمین، آزمان، کلکشان، ءُ ابرم است اَنت، زندگ ماننت۔
بلوچ لبریشن آرمی ءُ ھملی کاروان ءُ بلوچستان است مانیت۔
***
