بلوچستان کے ضلع کیچ کے علاقے کولواہ بلور میں گذشتہ شب پاکستانی سیکورٹی فورسز نے ایک فوجی جارحیت کے دوران ایک شخص کو حراست میں لینے کے بعد نامعلوم مقام منتقل کردیا ہے۔
لاپتہ ہونے والے نوجوان کی شناخت الطاف ولد دلمراد کے نام سے ہوئی ہے۔
ذرائع کے مطابق فوجی جارحیت کے دوران فورسز کے مرد اہلکاروں کے علاوہ خواتین اہلکار بھی شامل تھے جنہوں نے خواتین و بچوں کو شدید تشدد کا نشانہ بنایا اور گھروں سے قیمتی سامان کا صفایا کردیا ہے۔
دوسری جانب پنجگور کے علاقے چتکان میں گاڑی کی ٹکر سے ایک شخص ہلاک ہوگیا۔
ذرائع کے مطابق پنجگور کے علاقے چتکان میں گاڑی کی ٹکر سے محسن ولد عبد الحکیم سکنہ سندے سر ہلاک ہوگیا۔
گاڑی ریوس میں جارہا تھا کہ یہ شخص زد میں آگیا۔
اسی طرح گنداخہ تھانہ کی حدود باغٹیل کے رہائشی 15سالہ سلیم احمد جمالی ولد شاہن جمالی نے پسٹل سے خود کو سر میں گولی مار کر خودکشی کرلی ہے۔
واقعہ گھریلو رنجش بتایا جارہا ہے۔
پولیس کو اطلاع ملتے ہی ایس ایچ او گنداخہ سعداللہ جمالی جائے واردات پر پہنچ کر پسٹل قبضے میں لے کر تفتیش شروع کر دی اور نعش پوسٹ مارٹم کے لئے اوستہ محمد ہسپتال روانہ کردی گئی۔
واقعی کے بعد علاقے میں سوگ جیسی صورتحال ہے۔
خودکشی کرنے والا سلیم جمالی جماعت ششم کا طالب علم تھا۔
