پاکستان میں نئے قائد ایوان کے انتخاب کے لیے ووٹنگ آج ہو گی جس کے لیے قومی اسمبلی کے آج ہونے والے اجلاس کا ایجنڈا بھی جاری کر دیا گیا ہے۔
آج ہونے والے قومی اسمبلی کے اجلاس کا دو نکاتی ایجنڈا جاری کیا گیا ہے۔
ذرائع کا بتانا ہے کہ تلاوت، نعت اور قومی ترانے کے بعد قائد ایوان کا انتخاب کیا جائے گا، اجلاس شروع ہوتے ہی اسپیکر چیئر سے قائد ایوان کے انتخاب کا شیڈول سنایا جائے گا۔
یاد رہے کہ نئے قائد ایوان کے لیے شہباز شریف متحدہ اپوزیشن کی جانب سے وزارت عظمیٰ کے امیدوار ہیں جب کہ پاکستان تحریک انصاف (پی ٹی آئی) نے شاہ محمود قریشی کو نامزد کیا تھا تاہم اب پی ٹی آئی نے وزیر اعظم کے انتخاب کے بائیکاٹ کا اعلان کردیا ہے۔
پی ٹی آئی رہنما فواد چوہدری نے تصدیق کی ہے کہ تحریک انصاف نے وزیراعظم کے انتخاب کے عمل کے بائیکاٹ کا اعلان کیا ہے اور پی ٹی آئی قائد ایوان کے انتخابی عمل میں حصہ نہیں لیگی۔
پاکستان تحریک انصاف نے قومی اسمبلی سے استعفے دینے کا بھی فیصلہ کیا ہے اور ذرائع کے مطابق پی ٹی آئی کے چیف وہپ عامر ڈوگر نے تمام اراکین سے استعفوں پر دستخط کرالیے ہیں۔
دوسری جانب ذرائع کا بتانا ہے کہ قائد ایوان منتخب ہونے کے لیے 172 ارکان کی حمایت ضروری ہے، قومی اسمبلی کی آج کی کارروائی آرٹیکل 91، رول نمبر 32 کے تحت چلائی جائے گی۔
ذرائع کے مطابق قومی اسمبلی اجلاس کے دوران اسپیکر دونوں امیدواروں کے ناموں کا اعلان کریں گے، ایوان میں 5 منٹ گھنٹیاں بجانے کے بعد ہال اور لابی کے دروازے بند کر دیے جائیں گے اور ارکان کو اے اور بی لابی میں جانے کے لیے کہا جائے گا۔
ذرائع کا مزید بتانا ہے کہ جس امیدوار کو 172 کی حمایت حاصل ہوئی وہ قائد ایوان منتخب کر لیا جائے گا جبکہ اپوزیشن کے پاس 176 کی گنتی ہے۔
منتخب ہونے والا قائد ایوان پاکستان کا 23 واں وزیراعظم ہو گا۔
