بلوچ وتی جہدءَ کدی دزکشّ نہ بیت | ڈاکٹر اللہ نذر بلوچ

0
704

بلوچستان لبریشن فرنٹ (بی ایل ایف ) ءِ رھشُون واجہ ڈاکٹر اللہ نذر بلوچ ءَ وتی یک ویڈیو کلوھے ءِ تہ ءَ میان اُستمانی برادری گْوشتگ کہ آ پاکستانی کْوزہ ءُ زُور گِپتیں بلوچستان ءَ سرمایہ کاری مکن اَنت ، چی ءَ کہ کْوزہ جتگیں بلوچستان ءَ آیانی سرمایہ زوال بَہ اَنت ، بلکیں آ بلوچ کوم ءِ کُمک ءَ بکن اَنت ءُ آزاد بلوچستان ءَ بلوچ کَوم ءِ ھواری ءَ شرتِریں تجارتی موکہ ءَ سیت مند بَہ اَنت ۔

18 مِلٹ ءِ وتی اے ویڈیو کلوہ ءِ تہ ءَ آئی ءَ ماں بلوچستان ءَ پاکستانی زُوراکی ءُ زُورانسری ءِ درگت ءَ شرّیں وڑے ءَ گپ جتگ ، ءُ راجانی ھوریں گل بزاں چہ اقوام متحدہ ءَ بلوچستان ءَ متنازعہ دمگ یا جنگی دمگے کرار دَیَگ ءِ لوٹ کُرتگ ءُ گْوشتگ کہ بلوچستان نو فلائی زونے کرار دَیَگ بِہ بیت۔

آئی گوں بلوچ لیڈرشپ ءَ اتحاد ءُ یکمُشتی ءِ اپیل کُتگ ءُ ھمے گْوشتگ کہ مئے سوب مندی گوں یکجاھی ءَ اِنت۔

چہ آئی ءِ اے ویڈیو کلوہ ءَ میان اُستمانی برداری ھاس ھمساھِگیں مُلکاں ھوار اے دمگ ءِ ارزش داریں مُلک ’چین‘ ءِ ھاتِر ءَ ھم سھرائیں کلوھے ۔

آئی ءَ چین ءَ را ھم اے درگت ءَ زُور داتگ ءُ گْوشتگ کہ آ بلوچستان ءِ جاورھالانی رد ءَ چہ بلوچستان ءَ وتی دست ءَ بِہ کشّ اِیت ، ءُ آزاد بلوچستان ءَ گوں بلوچ کَوم ءِ ھواری ءَ شرتِریں تجارتی موکہ ءَ چہ نپّ ءُ پائدگ چِست بِہ کنت ، چی ءَ کہ بلوچ کَوم وتی گْواجن ، مال ءُ مڈّیانی لُٹّ ءُ پُل ءِ موکل ءُ اِجازت ءَ کسے ءَ نہ دنت ۔

آئی ءَ وتی کلوہ ءِ تہ ءَ اے ھم پدّر کُتگ کہ آھگی جُھد ’ روٹِکّی بلوچستان‘ ءِ درگت ءَ اِنت۔

آئی گْوشتگ کہ ما روٹِکّی بلوچستان ءِ واستا جُھد کنگ ءَ اِیں ، چریشی ءَ گوں ھمساھِگیں راج ءُ کَوماں مئے ھزاراں سال ءِ دُود ءُ ربیدگی سْیادی ھست یا گوں ھما مُلکاں دو سد سال پیش مئے نزّیکی ءُ سْیادی ، تعلقات برجاہ اِنت۔ ھمے ھمساھِگیں مُلکاناں لوٹ اِیت کہ آ مئے کُمک ءَ بکن اَنت۔ آئی ءَ اے گپّانی ھمراھی ءَ ’چین‘ ءَ ھوار میان اُستمانی تاکت ءُ اے دمگ ءِ ارب مُلکاں چِہ ھم کُمک ءِ اپیل کُرتگ ۔

آئی ماں بلوچستان ءَ پوجی لشکرکشّی ءِ سَوَب ءَ مردُمانی درانڈیھی ءِ درگت ءَ ھم گپ جتگ کہ چہ جنگ آماچیں ھند ءُ دمگاں بلوچانی مزنیں تعداد ءُ لڑے ایران ءُ اوگانستان (افغاستان) ءَ لڈّ ءُ بار اِش کُرتگ کہ اُود ءَ بے یار ءُ مددگار اَنت۔ اے بابت ءَ ھمساھِگیں مُلکاناں لوٹ اِیت کہ آیانی کُمک ءَ بکن اَنت ، ءُ اکوام متھدہ ءِ ادارہ ء پناہ گزین بلوچ درانڈیھ ءُ مھاجریناں پناہ گزین کبول بِہ کنت ۔

آئی اے ھم منّ اِتگ کہ تھریک ءِ تھنا روشنیں دْروشم نا ، بلکیں یک تھاریں تک ءُ تھناتے ھم ھست ۔ ءُ مئے ردی ھم ھست اَنت کہ مارا منّگ ءُ چہ آیاں ھیل کنگ ءُ دربرگی اِنت۔

آئی گْوشت کہ دو ھزار ھشت 2008 ءَ سَے ماہ ءَ یک نیمگی جنگ بندی یک ردی یے کہ آھگی مارشت مارا رند ءَ بوتگ ۔

آئی ءِ رِد ءَ اِیشگی پُژدر ءِ سَوَب ھمیش اِنت کہ یک بروسہ ءُ بھیسے ءِ بُنیاد ءَ دو ھزار ھشت 2008 ءَ آیاں سَے ماہ ءِ مُدّت ءَ جنگ بندی ءِ جار جتگ، آ یک انچیں ردی یے کہ آھگی سَوَب ءَ مارا تاوان بوتگ۔ بِہ گِندئے/شاھد راجدپتر (تاریخ) مارا اے ردی ءَ ماپ مہ کنت ، بلے تھریک ءِ سنگتاناں لوٹ اِیت کہ آ اے ردی ءَ دو وار مکن اَنت ءُ پہ ساھتے ءِ واستا ھم چہ وتی جُھد ءَ دزکشّ مہ بَہ اَنت۔

𝐁𝐚𝐥𝐨𝐜𝐡 𝐰𝐢𝐥𝐥 𝐍𝐞𝐯𝐞𝐫 𝐆𝐢𝐯𝐞 𝐔𝐩
بلوچ کدی دزکشّ نہ بَہ اَنت

منی بلوچ راج ءُ راجی آجوئی ءِ ھمراھاں!

من وتی راج ءِ سرمچاراں سُھریں سلام پیش کن آں ۔

ھر کُجا کہ آجوئی ءِ پِڑ ءَ جنگ اِش کُرتگ ، من آیاں سُھریں سلام پیش کن آں ۔
ما کومی لِیاز ءَ یک انچیں جُھدے بِندات کُرتگ کہ آئی تہ ءَ مئے کیمتی ئیں جان شُتگ اَنت ، بلے یک کارے ھمے بوتگ کہ اے بیست ءُ دو سال ، بیست سَے سال ءِ تہ ءَ ما وتی جُھد ءِ رپتن ( تسلسل ءُ سلسلہ ) داشتگ۔ مئے ھما روانک برجم بوتگ ۔
بلے! منی کم اِلمّی ءِ مُتابِک ءَ اَچ ما ردی ( غلطی ) ھم بوتگ ۔ مئے یک ردی ( غلطی ) یے دو ھزار ھشت 2008 ءَ بوتگ کہ آئی تہ ءَ ما سَے ماہ ءِ جنگ بندی ( سیز فائر ) کُرتگ یک نیمگی ، آھگی پُشت ءَ چے اَت ، بلے مئے یک بلاھیں بروسہ ءُ بھیسے سنگتانی سر ءَ اَت۔
بلے نوں من پوہ بُوَگ ءَ اُوں کہ آ یک سکیں تاوان باریں چیزے مئے واستا بوتگ ، ءُ بِہ گِندئے/شاھد بلوچ راجدپتر ( تاریخ ) مارا ماپ مہ کنت۔ بلے مئے جُھد ءِ کہ ھما رپتن ( تسلسل ءُ سلسلہ ) بوتگ ، روانک بوتگ ، برے کم برے باز ، ھر جاگہ زھر درشانی بوتگ۔
بلے بلوچ راج گوں مستقل مزاجی ءَ بلوچ راجی جُھدکارانی ھمراہ ءُ ھمسپر بوتگ ۔ آ شوانگے بوتگ ، بزگرے بوتگ ، دُکاندارے بوتگ ، وانِندہ ءُ نودربرے بوتگ ، یا کہ دری ڈیھاں نِشتگ بلوچ راج ءِ آیوکیں آکبت ءِ واستا کِردارے ادا کُرتگ ، آئی تہ ءَ مستقل مزاجی ءُ دیمروئی بوتگ ۔

من بلوچ راج ءَ ، گوں وتی راج ءَ ھمگرنچیں آ دِگہ راجاں ھمے گْوش آں کہ جُھد ءِ تہ ءَ تاکہ رپتن نہ بوتگ ، آ جُھد ھِچّ بَر نیار اِیت۔ مرچی مُلکی ءُ درمُلکی ، ھما کہ مئے مُلک ءِ دُژمِن اَنت ، یا ھما راج ءُ مُلک کہ غیرجانبدار اَنت، بلے آیانی سیت ءُ نپّ ( مفادات ) اِد ءَ وابستہ ءُ ھمگرنچ اَنت۔ آیاں ھم مرچی اے چیز مار اِتگ کہ بلوچ راج یک زِندگیں کَومے۔

من اِیشی ءِ اِیوک ءَ روشنیں نیمگ ءَ شُمارا پیش نہ داراں ، بلکیں اِیشگی تھاری ءِ نیمگ ھم ھست اِنت۔ آ اِیش اِنت کہ ما باز جاگہ ءَ اناپرستی ءِ شکار باں ، وتی اَنا ءَ کہ اے مئے اِزّت نپس (عزت نفس) ءِ مسئلہ اِنت۔ ھر کُجام وھد ءَ کہ راجانی گپ کَیت ، اُود ءَ فرد ءُ ھاندان دوئیں کُربان بَہ اَنت اُود ءَ کہ وتن ءِ گپ کَیت ، اُود ءَ کَوم کُربان بَہ اَنت۔ اگاں کسے وتی زاتی اَنا ءَ ھتم نہ کنت ، آ منی ھیال ءَ انقلابی ، یا آشوبی سِنچ آئرا نیست ۔

من چیزے سال پیسر ءَ گْوشتگ کہ مئے کَومی جُھد دومی مرحلہ ءَ داکِل بوتگ، آ تنیگا ھست اِنت، تنیگا ھست اِنت۔بلے نوں من یک چیزے ءَ چِہ دِلجم ( مطمئن ) آں کہ مرچی مئے جُھد ، ھمراھانی کُربانیاں دنیا ءَ را مجبور کُرتگ کہ آ چیزے مار اِت بکن اَنت ۔

من وتی اے کسانُکیں ( مختصریں ) پیگام ءِ تہ ءَ ، بلوچ راج، بلوچ جھدکار کہ آیاں ھمے رپتن ( تسلسل ) داشتگ ، آ الم ھمیشی برجم ءُ برکرار بدار اَنت، گوں مستقل مزاجی ءَ ۔ اچ ما چِہ نالائِک تِریں ، پھم ءُ زانگ ءَ (فہم و فراست ) نِزور تریں راج ھم بوتگ اَنت ، بلے آیاں چہ وتی تجرباتاں ، چہ وتی آزمودگاں ، چہ ردیاں باز چیز ھیل کُرتگ ءُ دربُرتگ ، ما پرچا چہ وتی نِزوری ءُ ردیاں چِہ ھیل مکن اِیں ، اے مئے واستا المّی اِنت ۔۔

ءُ وھدے مئے تھریک ءِ سیمی ءُ آکِری مرحلہ کَیت ، گُڑا اللہ زانت کہ آ کُجام وکت ءَ کَیت ، بلے نوں من زان آں کہ آ روچ دُور نہ اِنت ۔ پرچا کہ اے جُھد ءِ مُسلسل ءَ دُژمِن ءَ را سک پریشان کُرتگ ۔

مرچی آ مزن بند بِہ بیت ، سائجی بِہ بیت ، شیراز بِہ بیت ،سے سدی بِہ بیت ، آ ھر کُجام کوہ ءَ بگر داں کلبر ءَ کائے ، پیدراک ءِ نیمگ بِہ بیت یا زامران ءَ کائے ۔ بالگتر ءُ کیلکور ءَ کائے ، گچک ءُ رکشان ءَ کائے ، آواران ءُ مشکے ءَ کائے ، دومی اے نیمگ زِربار ءِ ھند اِنت ، چہ آ نیمگ اُورماڑہ ءَ کائے ،لکّ ءِ کوھاں ، سورگر ءِ کوھاں بگر دانکہ بولان ءَ دُژمِن ءَ مارا کوھانی تہ ءَ چُکچین کُرتگ ، شھرانی تہ چُکچین کُرتگ ۔

مرچی آ ھمینچو زُوراک اِنت کہ آاُود ءَ یک زِیارتے ءِ سر ءَ بلوچ کاینت، ھمود ءَ کہ آ وتی سِتک ( عقیدہ ) ءِ بُنیاد ءَ زِیارت کن اَنت۔ آ میر مُرادبکش بازار ھاجی زیارت ءَ دُژمِن بے کِساس شیلنگ کنت ، اُود ءَ ھپت ءُ ھشت مردُم مِر اِیت ءُ شھید بیت ، سک مزنیں مھلوکے، زھگ ءُ زالبُول ٹپّی بَہ اَنت ءُ آ ھند تنیگا پوج ءِ کنٹرول ءُ زیردست ءَ اِنت۔

دومی نیمگ ءَ ھمے زُوراکی ءِ دومی سیمی روچ ءَ کولواہ ءِ جاھے ھست ڈنڈار ءَ کہ آئرا ’ھپت کنڈ‘ گْوش اَنت۔ دُژمِن ءَ اُود ءَ مزنیں مھلوکے ءِ لوگانی سر ءَ شیلنگ کُرتگ ءُ سَے مردُم شھید کُرتگ ءُ پیش داشتگ، بلے آ دِگرانی گوم ءَ ھال اھوال نیست۔

بلوچ راج مرچی وتی ھمے بے گناھیں مھلوک ءِ کوش ءِ سر ءَ پُرسیگ اِنت۔ چریشی ءَ ساری زامُران ءَ بگر ، سائجی ءَ بگر ، مزن بند ءَ بگر ، شیراز ءَ بگر ، دانکہ بیا گچک ءُ رکشان ءَ اے دْرائیں ھندانی دوئیں نمیگ ءَ ، پیتاپ ءُ ساھگ ءَ آپانی تہ ءَ زھر مان گیتگ۔ ھزارانی ھِساب ءَ مئے مال ءُ دلوت ، مئے بازیں جاھاں گْوندو بیمار بوتگ اَنت ۔

من پد ءَ گوں کیلکور ءِ مھلوک ءَ ھمے ھبر ءَ کن آں کہ مئے دُژمِن ھمینچو بے رھم (سفاک) اِنت کہ آئی مئے ھپت سالی گْونڈو نہ بکش اِتگ۔ آ یک اُمر (عمر) نامیں واجکارے ءِ چُک اِنت شھیدے کُرتگ۔ آئرا کل کُت دانکہ کس ، دُگنیا مہ گِند اِیت ئِے، چی ءَ کہ آ چہ میڈیا ءَ بلیک آؤٹ اِنت ۔ بلے پد ءَ ھم مردُماں آھگی کبر ءَ را پٹ اِت ءُ دیست ۔ وارس ءَ دیست کہ مئے چُک ءِ کبر اِنت ، ھپت سالی گْونڈوے۔

تو نوں اندازہ جت کن ئے کہ اے دنیا چے کنگ ءَ اِنت ۔ منی گوں دنیا ءَ ھمے اپیل اِنت کہ بلوچستان ءَ را یک کنفلکٹ زون (متنازعہ خطہ) یا جنگی دمگے کرار بِہ دنت۔

شور پارود ، بولان ءَ بگر دانکہ برو تو مزن بند ءُ مگربی بلوچستان ءِ سیمسراں دْرائیں جنگل سُتکگ اَنت ۔ اے تیوگیں ھند ءَ پاکستانی پوج ءَ گن شپ ہیلی کاپٹرانی ذریعہ ءَ فاسفورس ءِ شیلنگ ءُ بمبارمنٹ کنگ ءَ اِنت ۔ منی دنیا ءَ گوں اپیل ھمیش اِنت کہ بلوچستان ءَ را نو فلائی زون کرار بِہ دے اَنت، پرچا کہ مئے جُھد ھما میان اُستمانی گل بزاں اقوام متحدہ ءِ چارٹر ءِ مُتابِک ءَ ، ءُ ما وتی کومی آزادی ءِ جنگ ءَ کنگ ءَ اِیں ۔

اے بابت ءَ من دنیا ءِ کُلیں تاکتاں ، امریکا، فرانس ، برطانیہ ءُ ہندوستان ءَ ھوار کہ آ سیکورٹی کونسل ءِ غیرمستقل ممبر اَنت ، چہ آیاں اپیل اِنت ، اقوام متحدہ ءِ سیکریٹری جنرل ءَ چہ گزارش اِنت کہ بلوچستان ءَ را نو فلائی زون کرار بِہ دنت ءُ اِد ءَ میان اُستمانی( بین الاقوامی ) مبصریناں راہ بِہ دنت۔

اگاں آ باور نہ کن اَنت ءُ آیاناں رسائی نیست ، آ دِگہ جاگھاں بِل کہ دُور اَنت ، آیاں یلہ دے ، منی وتی بُنِکّی میتگ ’میھی‘ چہ شال ءَ شش کلاک ( گھنٹہ ) ءِ پند ( فاصلہ ) اِنت ۔بین الاقوامی مبصریناں ءَ میھی ءَ راہ بِہ دنت۔ اُود ءَ 80 ءُ 90 ءِ کِساس ءَ لوگ بوتگ اَنت ، ھمے لوگ تیوگ ءَ بمبارمنٹ بوتگ اَنت ۔ اولی رند ءَ سال دو ھزار دوزدہ ءَ اے زُورانسری بِنداتے کُتگ ءُ پد ءَ سال دو ھزار شانزدہ ءَ ، مرچی اُود ءَ یک بنی آدمے نیست ۔ تیوگیں آئی ڈی پیز کُرتگ اَنت ، اُود ءَ آیاناں شریں رنگے ءَ حقائق ءُ راستی مالوم بَہ اَنت ۔

ءُ دومی منی گوں چین ءُ دنیا ءِ کُلیں سرمایہ داراں اپیل اِنت کہ آ بلوچستان ءَ وتی سرمایہ ءَ زوال مکن اَنت۔ پرچا کہ بلوچ ءَ سرین بستہ ، پرچا کہ بلوچ کدی وتی کُدرتی مال ءُ مڈّی (فطری وسائل) ، آ اگاں سُھر بنت یا دلبند ءِ آسن ءُ آئرن بنت ، تیل بیت یا بلوچ ءِ تیاب بیت ، یا کہ بلوچ راج ءِ ھرچی کہ وسائل ھست اَنت ، آ چریشاں کدی دزکشّ نہ بیت ، ءُ بلوچ راج کسے ءَ اِیشانی لُٹّ ءُ پُل ءِ موکل ءُ اجازت ءَ نہ دنت ۔ درمُلکی سرمایہ دار وتی نُکس ءُ نپّ ءِ زِمہ دار وت اَنت۔

بلوچستان ءُ بلوچ راج ءِ کہ ھمساھِگیں راجاں گوں ھزاراں سال ءِ دُود ءُ ربیدگی (ثقافتی) سْیادی یے ھست یا دو سد سال پیسر گوں آیاں نزّیکی ءُ تعلقات بوتگ آ مئے نزّیکیں ھمساھِگ بوتگ اَنت ۔ مئے جُھد ءِ بُنجل ءُ مرکز ’ روٹِکّی بلوچستان‘ اِنت ، ما ھمیشگی آزادی ءِ واستا جُھد کنگ ءَ اِیں ، مئے مکسد ھما اِنت ، مئے جُھد ھما اِنت۔ ما وتی ھمساھِگیں راجاں اے گْوشگ لوٹ آں کہ مارا کُمک بکن اَنت ۔

مرچی مئے آبادی ءِ یک مزنیں بھرے ایران ءَ نشتگ ، دومی آ افغانستان ءَ بے یار ءُ مددگار اَنت۔ ءُ دِگہ لکّانی ھِساب ءَ آئی ڈی پیز اَنت، آیانی کُمک ءَ بکن اِت ءُ اقوام متحدہ ءِ مھاجرین ءِ درگت ءَ ادارہ مئے مھلوک ءُ مردُماں پناہ گزین تسلیم بِہ کنت۔

من پد ءَ چین ءَ را گْوش آں کہ تو بلوچستان ءِ زِر ءَ وتی مالی پائدگ ءَ گوں ھوار ھوار تو اِیشرا یک جنگی زونے ءِ واستا وتی ھمساھِگاں ءُ میان اُستمانی ( بین الاقوامی ) مھلوکاں تھریٹ کنگ لو ٹ ئِے۔ اچ بلوچستان ءِ زِر ءِ گرمیں آپاں ، بلے بلوچ کَوم اِیشی ءَ کدی نہ منّ اِیت ۔ بائِدیں توئے چین اے وھد ءَ وتی دست ءَ بدار ، وھدے بلوچ کَوم وتی آجوئی ءَ گیت گُڑا تو گوں بلوچ کَوم ءِ ھمراھی ءَ شرّیں تجارتے کُرت کن ئِے ، وتی سرمایہ کاری ءَ کُرت کن ئِے ۔

بلے یک گپّے من الم گْوش آں کہ بلوچ ءِ تُوپّک تنیگا بند نہ اِنت ، آئی ءِ لاک پچ اِنت۔ آ کُجام ھم پِڑ ءَ بیت ، ما یک سیاسی جُھدے کنگ ءَ اِیں ، مئے تُوپّک یک سیاسی لیکہ ءُ نظریے ءِ پابند اِنت ۔ ءُ مارا ھکّ ھست ، اگاں کشمیر ءِ بارو ءَ پاکستان ءِ سفارت کار گْوشگ ءَ اَنت ، یا مارا ھم اے ھکّ ھست کہ ما جنگی ساز ءُ سامان ھم بِہ لوٹ آں ، آ اے اقوام متحدہ ءِ چارٹر ءِ تہ ءَ ھست اِنت ۔

اگاں آ گِپت کُرت کن اَنت ، گُڑا من انڈیا ءِ تلبگار اُوں ، ھمے گپ ءَ چہ من چین ءِ ھم تلبگار اُوں ، ھمیشی ءَ چہ برطانیہ ءُ ھمیشی ءَ چِہ مڈل اِیسٹ ءِ وتی ارب دوستاں ، کُلیں لشکر ءَ چِہ ، تاکہ یو ایس US اِنت ، آ دِگہ اِنسانی تہذیب ءِ علمبردار اَنت، چہ آیاں ھمے اُمیت کن آں کہ آ بلوچ راج ءَ را دوئیں سپورٹ ءَ کن اَنت۔ اخلاقی ھم سپورٹ کن اَنت ءُ مالی ھم سپورٹ کن اَنت۔

من پد ءَ بلوچ راج ءَ گوں ھمے دزبندی کن آں کہ بلوچ وتی جُھد ءَ را یک ساھتے ءِ واستا ھم مدار اَنت۔ دو ھزار ھشت 2008 ءَ ما اے ردی ( غلطی ) کُرتگ سَے ماہ ءِ واستا ، بلے مارا پد ءَ وتی ردی ءِ مارِشت ( اِھساس ) بوتگ ۔ بلوچ ورناہ تو جذبات ءَ گوں زانت ءُ سما ( شعور ) ءَ کار گِر ۔

بلوچ مات ءُ گْوھار من زان آں کہ شُما سیاہ پوش (ماتمی لباس میں) اِت ، بلے شُما گیش ءَ چِہ گیش ھمے چُکّاناں توکل (حوصلہ ) بِہ دے اِت۔ من اُمیت کن آں کہ اے بیست ءُ سَے 23 سال ءِ تہ ءَ بلوچ راج ءَ کہ اِنچو سکّی برداش ( برداشت ) کُرتگ، من زان آں کہ بلوچ سنٹ نہ اِنت ، بلوچستان ءِ وتن سنٹ نہ انت ، بلوچ کَوم سنٹ نہ انت ، وتی واستا ورناہ پیداک کُرتگ۔
ءُ دومی گپ اِیش اِنت ، من اے ھم مبارکبادی دے آں بلوچستان ءَ را ، بلوچ راج ءَ را کہ ھما چُک منی لوگ ءَ جنگ ءِ توک ءَ ودی بوتگ اَنت ، چہ آیاں باز شھید بوتگ ، چہ آیاں بازیں ھمراہ دار اِنت سنگتانی ۔
اِیشگی متلب ھمیش اِنت کہ ما وتی جُھد ءَ را وتی دومی پدریچ ( نسل ) ءَ سر کنگ ءَ سوبین ( کامیاب ) بوتگ آں ، ءُ جُھد انگت دیم ءَ جاری اِنت ۔ من اُمیت کن آں کہ ما انقلاب در انقلاب منّوگِر ( حامی ) آں ، ما آجوئی ءِ سر ءَ ، ءُ اِنسانی ھکّانی بنیاد ءِ سر ءَ ما وتی جنگ ءَ دیم ءَ برّگ ءَ آں ۔

آکِری ( آخری ) ءَ بلوچ راج ءِ ھِمّت ءَ سلام ، بلوچ شھیداں سُھریں سلام ، مئے ھمراھاں سلام۔

گوں بلوچ راج ءَ منی اپیل اِنت، آیانی لیڈرشپ ءَ گوں اپیل اِنت کہ آ اتحاد بکن اَنت۔ اتحاد ءِ تہ ءَ مئے سوب مندی ( کامیابی ) اِنت ۔

بلوچ راج ، سلامت بات ئے

٭٭٭

دلگوش: بلوچی راجی راہشون واجہ ڈاکٹر اللہ نذربلوچءَ یک روچے پیسر وتی یک ویڈیو کلوہ یے شنگ کرتگ ۔ اے ہما ویڈیو کلوہ ءِ نبشتگیں سیاھگ اِنت۔اے ویڈیو کلوہ ءَ را نبشتگیں سیاھگ ءِ تہا آرگ ءِ مول ءُ مراد ہمیش اںت کہ پہ ریکارڈ ایر بہ بیت ءُ چریشیءَ چہ مہلوک گیش ءَ چہ گیش سرپدی زرت بہ بکنت ءُ یک گپءُ باوستے دیما بروت ۔ اداہ سنگر

LEAVE A REPLY

Please enter your comment!
Please enter your name here