،،،ابیتکیانی زُرمبِش،،،
بام ھیسکارگانی
بامساراں مانجنت دَروازگاں
نیمروچ نیادانی
کورگاناں چی بہ دنت پسّہ؟؟
چاڑیں بیگاھانی لیلّواں
کئے بہ چنڈّینیت پدا
شپ جتّیں لنُجّمیاں روک کندلے بہ کنت
گُنگدّامیں دلوتّاں پہ شِپانکیءِ نیمون بہ بیت
بالوّانی کاروان ءَ
چِراگانی زُرمبشت ئے بہ بیت بیرک
ھاک مرزبوم ءِ
شھیدانی ھوناں بہ بیت بانور
شِلسریں سنگری دَرنگّاں
کریمہ ایں گُھارے ءِ زھرگ گون بیت کستّاں
توپگاں گرْندوکیں
مِھرانی بازارے بہ بیت باسکّاں
کربلاھیں جنگجاھاں
ھمکوپگّی ءِ چوگان بہ بنت زیمر
چیرجنگی ءِ آستونک مار
رمیزی کینگاں بہ بنت گُٹگیر
بچندگاں آشوبی کرکین ئے بہ کنت کِسّہ
لبواریں بلوچ زادگ ئے
کہ کِردارے چُشیں مہ کنت ھچبر
کندیل دَرپشیں چِراگ ئے
ایرموش مہ بیت راجءِ
زُم زُمیں شندّانی شھکوری لھڑّ
مہ بنت تاوان
اسِتال سُھیل ساچیں
بے رُژن مہ بنت دِریگت
راھبندے بہ بیت گُگّ
گوں مُھکمیں تیل بنداں
اے کاروان ءَکوھگولءُ ھونگیریں مزارانی
چُنت پند جتگ گوں کوپگاں ژندّیں
چُنت باسک بَباہ داتگ آجوئی جنگ ءَ
چُنت سر یلاں گاڑینتگ پہ گیرتءُ ننگ ءَ
چُنت ورناہ شُتگ راجءِ چہ مکھیں ماساں
چُنت پِگرِ جتگ تَندّاں زوراکیں یزیدانی
پہ کئے ما ودارانی
نوں ماسگّاں پرریچیں
پہ کئے ما بہ نِندیں کہ نوبتے ترینیت
سیامار دَجّ انَت بِلے مئے پِگر ءِ کریمہ آں
زانگول بنت ساجِد بِلے سویڈنءِ بازارءَ
کہ یورپ آ بھاری اَرزُناں مَرزیت
ھندونستان مِھرانی زاپِران دَرنزیت
اپگانِستان ھوری موسمے کاریت
کینیڈہ ءُ سویڈن گواڑگاں جائیت
جِند ءِ پَلگّاری ءِ لھتے کِسّھ بہ بیت
ھور ءُ یکجاھی ءِ سِپت ءُ چوگانے بہ بیت
کینگ ءُ کستّاں بہ چنڈیں دیوانے بہ بیت
پاھوئی جیڑگے پر بہ ریچاں کَلّم
مجّولیانی کوشارجاھے سگّاراں بہ بیت
ساچ بیت کیلگانی چمن بانور
بام ھیسکارگانی بامساراں
مانجنت دَروازگاں
نیمروچ نیادانی کورگاناں چی بہ دَنت پَسّہ؟
ترانگے روزرد بہ بیت دیگرانی وژدلیءَ
کوش زیمریں نازینکاں ھاکوٹ رجّیت چنکّاں
کہ ھاک ءِ ھانی رپتگ چہ مرزبوم ءَ
کپوتی کوکواں تھلیں تریاک مینتگ الوّتاں
ابیتکیانی زُرمبِشاں گِلھے کوارھاں جَتگ
ھلک ءِ چوریاں آشوبی موتکے مِگراز کُتگ
کور ءُ کیلگ ءُ دشتاں دَزگوْپتگ پتو بیرکے
راجدپتّراں شھیدیءَ تئی کِردگارے بَلّینت
تو زِندگ ئے
تاں بلوچ اوبادگے مانیت زِند
تاں بُلبُلی شیزارگے جنگلاں گیگان بیت
تاں آھوگ ءُ سیدّے لانٹیگ ءُ پیراں چَرّیت
تاں شائرے گالے گوپیت تو زِندگے
منی راج ءِ تَمرّدیں شیرزال
ھون میزرانَت تئی بلوچ ءِ ھاک ءِ دامُن ءَ
تو زندگ ئے کریمہ شیرزال
تو زِندگ ئے کریمہ شیرزال
