بلوچستان کے مرکزی شہر کوئٹہ میں منگلی روڈ پر نامعلوم افراد کی فائرنگ سے جیکب آباد کا رہائشی ہلاک ہوگیا جبکہ بلیدہ کے رہائشی پولیس کانسٹیبل کو اغواکرلیا گیا ہے۔
کوئٹہ میں تھانہ صدر کے علاقے سمنگلی روڈ پر دارو خان اسکیم کے قریب نامعلوم افراد نے فائرنگ کرکے ایک شخص کو قتل کردیا۔
پولیس کے مطابق فائرنگ کے نتیجے میں گل زمان ولد خادم حسین کھوسہ، سکنہ جیکب آباد، موقع پر ہلاک ہوگیا۔
واقعے کے بعد پولیس نے موقع پر پہنچ کر شواہد اکٹھے کیے اور ملزمان کی تلاش شروع کردی۔
دوسری جانب بلیدہ کے رہائشی پولیس کانسٹیبل کو اغوا کرلیا گیا ہے ۔
بلیدہ کے رہائشی ذاکر ولد غلام قادر جو ہوشاب تھانے میں کانسٹیبل کے فرائض انجام دے رہے تھے، ڈیوٹی ختم کرنے کے بعد اپنی ذاتی گاڑی میں تربت سٹی کی جانب روانہ تھے۔
ذرائع کے مطابق ہیرونک کراس کے مقام پر نامعلوم موٹر سائیکل سوار مسلح افراد نے انہیں اسلحے کے زور پر روک لیا اور گاڑی سمیت مبینہ طور پر اغوا کرکے نامعلوم مقام کی جانب لے گئے۔
ذرائع کا کہنا ہے کہ واقعے کے بعد سے ذاکر تاحال لاپتہ ہیں۔
