بلوچستان کے مرکزی شہر کوئٹہ اور ضلع خضدار کے علاقے وڈھ سے 2 نعشیں بر آمد ہوئی ہیں جنہیں تیز دار آلے اور فائرنگ کرکے قتل کیا گیا ہے۔
کوئٹہ کے علاقے قمبرانی روڈ سے ایک شخص کی بوری بند لاش برآمد ہوئی ہے، جسے تیز دھار آلے سے قتل کیا گیا۔
لاش کو شناخت کے لیے چھیپا ایمبولینس کے ذریعے سول ہسپتال منتقل کر دیا گیا ہے۔
واقعے سے متعلق پولیس مزید تفتیش کررہی ہے۔
دوسری جانب خضدار کے تحصیل وڈھ کے علاقے وہیر میں مدرسے کے قریب ایک نوجوان کی گولیوں سے چھلنی لاش برآمد ہوئی ہے۔
واقعے کی اطلاع ملتے ہی پولیس موقع پر پہنچ گئی اور لاش کو تحویل میں لے کر ضروری قانونی کارروائی کے لیے اسپتال منتقل کردیا۔
پولیس ذرائع کے مطابق مقتول کی شناخت شکیل احمد ولد بشیر احمد ملازئی کے نام سے ہوئی ہے۔
ابتدائی معائنے میں انکشاف ہوا ہے کہ مقتول کو قریب سے متعدد گولیاں ماری گئیں، جس کے باعث اس کی موقع پر ہی موت واقع ہوگئی۔
لاش مدرسے کے قریب ایک ویران جگہ سے برآمد ہوئی، جہاں خون کے نشانات بھی پائے گئے۔ تاہم واقعہ کے محرکات تاحال معلوم نہیں ہوسکے۔
