گذشتہ روز وائٹ ہاؤس میں امریکی اور یوکرینی صدور کے درمیان ہونے والی تکرار کے بعد نیٹو کے سیکریٹری جنرل مارک روٹے نے کہا ہے کہ ولادیمیر زیلنسکی کو ڈونلڈ ٹرمپ کے ساتھ تعلقات بحال کرنے کا ’راستہ ڈھونڈنا ہوگا۔‘
نیٹو کے سیکریٹری جنرل کا کہنا تھا کہ وائٹ ہاؤس میں دونوں ممالک کے صدور کے درمیان ہونے والی بحث کے بعد وہ زیلنسکی سے دو مرتبہ بات کر چکے ہیں۔
صدر زیلنسکی سے ہونے والی بات چیت کا ذکر کرتے ہوئے ان کا کہنا تھا کہ ’ہمارے درمیان جو بات ہوئی وہ میں بتا نہیں سکتا۔‘
مارک روٹے کا کہنا تھا کہ انھوں نے صدر زیلنسکی کو بتایا کہ صدر ٹرمپ نے جو یوکرین کے لیے کی ہے اس پر انھیں ’عزت دینی چاہیے۔‘
نیٹو کے سیکریٹری جنرل کا مزید کہنا تھا کہ صدر ٹرمپ کے پہلے دورِ حکومت میں امریکہ نے یوکرین کو جیولن اینٹی ٹینک میزائل سسٹم کی فروخت کی منظوری دی تھی جس کے سبب یوکرین کو روس کے خلاف لڑنے کا موقع ملا۔
’ہمیں ٹرمپ کو کریڈٹ دینا پڑے گا۔‘
