بلوچستان کے کٹھ پتلی وزیر ضیا لانگو اور زمرک خان نے وفاقی حکومت سے اپنے وعدے پورے کرنے اور ٹڈی دل کے حملے سے متاثرہ اضلاع کے لیے خصوصی پیکیج کا اعلان کرنے کا مطالبہ کردیا۔
مشترکہ پریس کانفرنس سے خطاب کرتے ہوئے انہوں نے کہا کہ بلوچستان کے 31 اضلاع ٹڈی دل سے بری طرح متاثر ہوئے ہیں کیونکہ انہوں نے کھڑی فصلوں اور پھلوں کے باغات کو تباہ کردیا ہے جس سے کاشتکاروں کو اربوں روپے کا نقصان ہوا ہے۔
انہوں نے کہا کہ فصلوں اور پھلوں کے باغات کے بڑے نقصان کی وجہ سے صوبائی حکومت بلوچستان کے 31 متاثرہ اضلاع کو آفات سے متاثرہ علاقوں کے طور پر قرار دینے پر سنجیدگی سے غور کررہی ہے۔
ان کا کہنا تھا کہ بلوچستان کے 80 فیصد لوگ زراعت کے شعبے پر انحصار کرتے ہیں اور ٹڈی دل نے ان کی معاشی حالت کو بری طرح متاثر کیا ہے۔
ٹڈیوں کے حملوں سے فصلوں کو ہونے والے نقصان پر حکومت بلوچستان ایک سروے بھی کر رہی ہے۔
وزیر داخلہ ضیا لانگو نے بلوچستان کی محکمہ زراعت کو ہدایت کی کہ وہ ٹڈی دل سے نمٹنے کے لیے صوبائی ڈیزاسٹر مینجمنٹ اتھارٹی (پی ڈی ایم اے) کے ساتھ کام کریں۔
اس موقع پر ضیا لانگو نے 10 ٹریکٹروں کی چابیاں بلوچستان کے وزیر زراعت زمرک خان کے حوالے کیں۔
انہوں نے بتایا کہ محکمہ زراعت کو کھیتوں میں سپرے لگانے کے لیے ٹریکٹر فراہم کیے گئے ہیں۔
دونوں وزراءنے کہا کہ پی ڈی ایم اے ٹڈیوں دل سے متاثرہ لوگوں کے لیے اپنی مکمل مدد فراہم کرے گی۔
