تربت میں سی ٹی ڈی کے جعلی مقابلے میں لاپتہ بلوچ نوجوانوں کے ماورائے عدالت قتل کیخلاف بلوچ مسنگ پرسنز کے لواحقین کی جانب سے کوئٹہ ریڈ زون میں احتجاجی مظاہرہ اور ریلی نکالی گئی۔
احتجاجی مظاہرے کا اہتمام بلوچ یکجہتی کمیٹی کی جانب سے کی گئی۔
اس موقع پر مظاہرین نے لاپتا بلوچ نوجوانوں کے ماورائے عدالت قتل کیخلاف زبردست احتجاج کرتے ہوئے بلوچ نسل کش پالیسی کی مذمت کی۔
مظاہرین سے خطاب کرتے ہوئے ڈاکٹر ماہ رنگ بلوچ نے کہا کہ بلوچ قوم اور نوجوانوں کی زندگیاں محفوظ نہیں تو ہمیں اس سرزمین کے وسائل کی بھی ضرورت نہیں، ہمارے لیے بڑی دولت ہمارے لوگوں کی زندگیاں ہیں۔
ڈاکٹر ماہ رنگ بلوچ نے کہاکہ ہماری ایک نسل تباہ ہوگئی تو پھر ہم کیوں اس غلط فہمی میں ہیں کہ ریاست ہمیں نہیں مارے گی، ر یاست ہمیں مارتی رہی ہے اور آئندہ بھی مارتی رہے گی اور ہم اسی طرح لاشیں اٹھاتے رہیں گے۔
ان کا کہنا تھا کہ ہم اگر لاپتا افراد کو نہیں بچا پائے تو اپنے ساحل اور وسائل کو بھی نہیں بچا سکیں گے۔
انہوں نے کہا کہ اپنی لاشیں نہ دفنائی جائیں، یہ وہ تحفے ہیں جو ریاست نے ہمیں دیے ہیں، ہمیں اپنے لیے یکجا ہوکر خود انصاف تلاش کرنا ہوگا۔
