اقوام متحدہ کے انسانی حقوق کےادارے کےسربراہ وولکر ترک نے منگل کے روز کہا ہے کہ اسرائیل کی جانب سے غزہ کی پٹی کا مکمل محاصرہ وہاں کے رہائشیوں کو ان تمام ضروریات زندگی سے محروم کر رہا ہے جو بقا کے لیے ضروری ہیں اور جس کی بین الاقوامی قانون ممانعت کرتا ہے۔
وولکر نے تمام فریقوں پر زور دیا کہ وہ ’’ خطرناک حد تک بحرانی صورت حال کو ‘‘ معمول پر لانے کی کوشش کریں جب کہ اسرائیل نے خبردار کیا ہے کہ وہ فلسطینی عسکریت پسند گروپ کو تباہ کرنے تک جنگ جاری رکھے گا۔
وولکر ترک کہتے ہیں کہ ’’ ہم اپنے تلخ تجربات کے نتیجے میں یہ جانتے ہیں کہ انتقام کوئی جواب نہیں ہوتا اور بالآخر بے گناہ شہریوں کو اس کی قیمت چکانا پڑتی ہے۔‘‘
ترک نے ایک بیان میں کہا ہے کہ "ایسے محاصرے کا نفاذ بین الاقوامی انسانی قانون کے تحت ممنوع ہے جو شہریوں کو اپنی بقا کے لیے درکار سامان سے محروم کر کے ان کی زندگیوں کو خطرے میں ڈالتا ہے۔‘‘
بیان میں کہا گیا ہے کہ محاصرے کے نتیجے میں غزہ کو سنگین خطرات لاحق ہیں جہاں پہلے سے ہی انسانی حقوق اور فلاحی صورت حال دگرگوں ہے۔
بیان میں مزید کہا گیا ہے کہ محاصرے کے اطلاق کے لیے لوگوں اور سامان کی نقل و حرکت پر کسی بھی قسم کی پابندی کو فوجی ضرورت کے تحت جائز قرار دیا جانا چاہیئے وگرنہ اسے اجتماعی سزا کے طور پر لیا جائے گا۔
انہوں نے کہا کہ ’’ہم جانتے ہیں کہ صورت حال وقتا فوقتا اس نہج پر کیسے پہنچتی ہے۔ اسرائیلی اور فلسطینی جانوں کا نقصان دونوں برادریوں کے لیے ناقابلِ یقین حد تک تکلیف کا باعث ہے۔‘‘
اقوام متحدہ کے انسانی حقوق کے لیے ہائی کمشنر نے کہا کہ انہیں "شہریوں کو پھانسی دینے کے الزامات اور بعض صورتوں میں فلسطینی مسلح گروپوں کے ارکان کی طرف سے ہولناک قتل عام کے الزامات پر شدید صدمہ اور مایوسی ہوتی ہے۔‘‘
انہوں نے مزید کہا کہ ’’ فلسطینی مسلح گروپوں کی طرف سے تحویل میں لیے گئے لوگوں کے ساتھ ناروا سلوک کی تصاویر اوران کے قتل اور لاشوں کی بے حرمتی کی اطلاعات ہولناک اور انتہائی تکلیف دہ ہیں۔
انسانی حقوق کے ہائی کمشنر وولکر ترک نے فلسطینی مسلح گروپوں پر زور دیا کہ وہ اغوا کیے گئے شہریوں کو فوری اور غیر مشروط طور پر رہا کریں ۔ ان کا کہنا ہے کہ یرغمال بنانا بین الاقوامی قانون کے تحت ممنوع ہے۔
جنیوا میں اسرائیل کے مشن نے اس کے جواب میں کہا کہ ترک نے "یہ ذکر نہیں کیا کہ سنگین صورت حال پیدا کس نے کی ‘‘ اور مشن نے حماس کو دہشت گرد قرار نہ دینے پر تنقیدبھی کی۔
مشن کا کہنا ہے کہ ’’یہ ایسی صورت حال نہیں ہے جو ’بار بار سامنے آتی ہے‘۔ یہ بے گناہ اسرائیلیوں کے قتل کی ایسی واردات ہے جس کی مثال نہیں ملتی اور اسرائیل کو اس بربریت کے خلاف اپنے دفاع کا پورا حق حاصل ہے۔‘‘
مشن کے بیان میں مزید کہا گیا ہے کہ ’’اسرائیل غزہ میں صرف دہشت گردانہ تنصیبات کو نشانہ بناتا ہے جب کہ حماس غزہ میں مقامی آبادی اور یرغمالیوں کو انسانی ڈھال کے طور پر استعمال کر رہی ہے۔‘‘
