بلوچستان اور خیبرپختونخوا بار کونسلز نے پاکستان میں آئین کے مطابق عام انتخابات کا مطالبہ کردیا۔اور ساتھ ہی انتخابات میں تاخیر پر ملک گیر احتجاج کی دھمکی دیدی ہے۔
اس سلسلے میں بلوچستان بار کونسل کے ممبر راحب بلیدی نے اپنے ایک بیان میں کہا ہے کہ بلوچستان بار کونسل پاکستان بھر میں نگراں سیٹ اپ کے قیام کا خیر مقدم اور ساتھ ہی الیکشن کمیشن آف سے پاکستان میں عام انتخابات کی تاریخ کا اعلان کرنے کا مطالبہ کرتی ہے۔
راحب بلیدی کا کہنا ہے کہ الیکشن کمیشن کی جانب سے انتخابی شیڈول جاری نہ کرنا خلاف قانون ہے، کسی بھی آئین شکن اقدام پر وکلا ملک گیر تحریک شروع کریں گے،عام انتخابات میں تاخیر ناقابل قبول ہے۔
اسی طرح خیبرپختونخوا بار کونسل نے بھی عام انتخابات میں تاخیر پر تحفظات کا اظہار کرتے ہوئے کہا ہے کہ حلقہ بندیوں کی ازسر نو ترتیب کا شیڈول انتخابات میں تاخیر کا حربہ ہے۔
بار کونسل کا کہنا ہے کہ تاخیری حربوں کے خلاف وکلا احتجاج تحریک سے دریغ نہیں کریں گے۔ آئین 90 دن میں الیکشن کرانے کا پابند کرتا ہے، الیکشن کمیشن کی آئینی ذمہ داری ہے کہ مقررہ مدت میں شفاف انتخابات کرائے۔
واضح رہے کہ الیکشن کمیشن آف نے عام انتخابات کے بجائے پاکستان بھر میں ساتویں مردم شماری کے مطابق نئی حلقہ بندیوں کا شیڈول جاری کیا ہے۔
