پاکستان کے صوبہ سندھ کے علاقے پنو عاقل میں ایک سڑک حادثے میں خواتین اور بچوں سمیت 11 افراد جاں بحق ہوگئے۔
میڈیا رپورٹوں کے مطابق ذرائع نے بتایا کہ ایک اینٹوں سے بھرا ہوا کھلا ٹرک جس میں 12 سے زائد افراد بھی سوار تھے وہ سانگھی کے علاقے کے قریب الٹ گیا۔
ٹرک الٹنے سے اس میں سوار مسافر سڑک پر گر پڑے اور اینٹیں ان کے سروںپرآکرگریں جس کے باعث 11 افراد موقع پر ہی دم توڑ گئے، ان میں 4 خواتین اور 7 بچے شامل تھے۔
واقعے میں ٹرک ڈرائیور اور اس کا مکینک زخمی ہوا۔
بعد ازاں قریبی واقع ایدھی سینٹر کی ایمبولینسز جائے وقوع پر پہنچ گئیں اور لاشوں اور زخمیوں کو پنو عاقل کے ہسپتال پہنچایا گیا۔
ذرائع کے مطابق ٹرک میں سوار مسافر شادی میں شرکت کے لیے صادق آباد سے کراچی جارہے تھے۔
ان میں سے کچھ کا کہنا تھا کہ حادثہ اس وقت پیش آیا جب ٹرک ڈرائیور نے گنے لیجانے والی ٹریکٹر ٹرالی کو اووٹیک کرنے کی کوشش کی اور گاڑی کا کنٹرول کھو دیا اور کھائی میں جاگرا۔
حادثے میں جاں بحق ہونے والوں کی شناخت رضوان، طاہرہ، نور، فاطمہ، عبدالحنان، ارم، رحمٰن، لائبہ، روبینہ، طوبیٰ اور فرزانہ شامل ہیں جبکہ ثاقب، یعقوب اور آصف شدید زخمی ہیں۔
واضح رہے کہ رواں ماہ کے اوائل میں صوبہ پنجاب کے ضلع حافظ آباد میں مسافر وین اور ٹرالر کے تصادم کے نتیجے میں 8 افراد جاں بحق ہوگئے تھے۔
حادثہ پنڈی بھٹیاں روڑ پر پیش آیا تھا جس میں 30 سے زائد افراد زخمی بھی ہوئے تھے۔
یاد رہے کہ گزشتہ دنوں وفاقی حکومت کی جانب سے ٹریفک حادثات کے حوالے سے ایک رپورٹ جاری کی گئی تھی جس کے مطابق ہر پانچ منٹ کے دوران ٹریفک حادثات میں ایک شخص جاں بحق ہوتا ہے یا پھر شدید زخمی ہوکر زندگی بھر کے لیے معذور ہوجاتا ہے۔
وزارت مواصلات کی رپورٹ میں کہا گیا تھا کہ پاکستان کا شمار دنیا کے ان ممالک میں ہوتا ہے جہاں روڈ حادثے کے شکار افراد موقع پر ہی جاں بحق ہوجاتے ہیں، جب کہ روڈ سیفٹی کے حوالے سے بہترین ممالک وہ ہیں جہاں حادثے کے شکار افراد 30 دن کے اندر انتقال کرجاتے ہیں۔
