Tag: ڈاکٹرمنان بلوچ

شہدائے مستونگ کو خراج تحسین پیش کرتے ہیں، بی این ایم

بلوچ نیشنل موومنٹ کے مرکزی ترجمان نے ڈاکٹر منان بلوچ اور شہدائے مستونگ کو خراج تحسین پیش کرتے ہوئے کہا کہ چھ سال پہلے تیس جنوری کو پاکستانی فورسز نے مستونگ کلی دتوئی میں بی این ایم کے سیکریٹری جنرل ڈاکٹر منان بلوچ اور اس کے ساتھیوں اشرف بلوچ، حنیف بلوچ، بابو نوروز بلوچ اور ساجد بلوچ کو گولیوں سے بھون کر شہید کردیا۔ ان کی شہادت کے بعد اس وقت کے کٹھ پتلی حکومت کے وزیر داخلہ سرفراز بگٹی نے انہیں بلوچ نیشنل موومنٹ کے بجائے بی ایل ایف کا کمانڈر قرار دیا۔ یہ پاکستان کی ڈاکٹر منان بلوچ کی سیاسی اور جمہوری جدوجہد سے خوف کی نشانی تھی۔ ریاست پاکستان میں یہ جرات نہ تھی کہ انہیں ایک سیاسی جماعت کا رہنما کہے۔ ترجمان نے کہا کہ ڈاکٹر قابض ریاست نے ڈاکٹر منان بلوچ کو شہید کرکے بلوچ قومی تحریک کو ختم یا کمزور کرنے کے دعوے کئے۔ ڈاکٹر منان کی زندگی، فہم، طریقہ کار، جدوجہد، واقعات اور کارکردگی کی ایک لمبی فہرست ہے، جس پر کئی باب لکھے اور بیان کئے جاسکتے ہیں۔ دشمن اس ادراک سے محروم تھا کہ ڈاکٹر منان بلوچ ایک سوچ اور قربانی کے فلسفے کی آبیاری کرکے اپنا کام نسلوں میں منتقل کرچکے ہیں۔ ان کی شہادت کے چھ سال بعد بھی بی این ایم کا کاروان اور بلوچ قومی تحریک روان دوان ہے۔ پاکستان سے نجات اور آزادی بلوچ قوم کا منزل و مقصد ہے۔ ہماری بقا قومی آزادی ہی میں ہے۔ انہوں نے کہا کہ ڈاکٹر منان بلوچ کا قتل اور شہادت بلوچستان میں جاری سیاسی کارکنوں و رہنماؤں اور صاحب علم بلوچوں کو نشانہ بنانے کا تسلسل تھا۔ ڈاکٹر منان بلوچ کے ساتھ شہید ہونے والوں میں بابو نوروز ایک مدبر دانشور، ادیب اور سیاسی بصیرت سے سرشار رہنما تھے۔ شہید اشرف بلوچ زمانہ طالب علمی سے بلوچ سیاست سے وابستہ تھے اور بی این ایم کے اہم کارکنوں میں شمار تھے۔ شہید حنیف بلوچ بھی قومی تحریک سے وابستہ ایک سینئر ساتھی تھے۔ نوجوان ساجد بلوچ قومی تحریک میں نہایت متحرک تھے اور عظیم رہبر ڈاکٹر منان بلوچ کے ساتھ شہید ہوکر ہمیشہ کیلئے امر ہوگئے۔ ہمیں ڈاکٹر منان اور واجہ غلام محمد کا پیروکار کی حیثیت سے ان کے نقش قدم پر چلنا چاہیئے اور عملا متحرک کردار ادا کرکے اس تحریک میں اپنا حصہ ادا کرناچاہیئے۔ پاکستان کی کوشش ہے کہ وہ اس طرح کے رہنماؤں کو کسی طریقے سے قتل کرکے راستے سے ہٹائے تاکہ وہ عوامی آگاہی اور موبلائزیشن کے عمل کو سست کرسکے۔ ہم اس دشمن کے سامنے بحیثیت قوم آج بھی کھڑے ہیں اور قومی طاقت کا مظاہرہ کر رہے ہیں۔ ان جیسے رہنماؤں نے ہمیں طاقت اور ایندھن دی ہے کہ ہم منزل کے قریب تر جا سکیں۔ ہمیں عملی طور پر میدان میں حاضر ہونا چاہیئے۔ شہدائے مستونگ کی چھٹی برسی کے سلسلے میں سوشل میڈیا میں مہم اور مرکزی سطح پر ایک آن لائن پروگرام کا انعقاد کیا گیا۔ اس میں پارٹی کے مرکزی انفارمیشن سیکریٹری دل مراد بلوچ ، ڈائسپورہ کمیٹی کے آرگنائزر ڈاکٹرنسیم بلوچ ، بلوچ دانشور، افسانہ و ناول نگار ڈاکٹرحنیف شریف، ماہرلسانیت و دانشور ڈاکٹر ناگمان بلوچ، اور بی این ایم کے مرکزی کمیٹی کے ممبر کمال بلوچ نے شرکت کی، جبکہ بلوچستان کے مختلف علاقوں میں شہید ڈاکٹر منان بلوچ اور ساتھیوں کی یاد میں پروگرام منعقد کیے۔