آئرش وزیرِ خارجہ نے بلوچستان میں انسانی حقوق کی صورتحال پر تشویش کا اظہار کرتے ہوئے انکشاف کیا ہے کہ یہ معاملہ سفارتی سطح پر پاکستان کے سامنے اٹھایا گیا ہے، جسے بی این ایم نے اپنی عالمی سفارتی کوششوں کا نتیجہ قرار دیا ہے۔
آئرلینڈ کی وزیرِ خارجہ و تجارت، ہیلن مک اینٹی نے اعلان کیا ہے کہ ان کی حکومت بلوچستان کی صورتحال پر گہری نظر رکھے ہوئے ہے اور دوطرفہ و بین الاقوامی سفارتی ذرائع کے ذریعے پاکستانی حکام کے سامنے انسانی حقوق سے متعلق شدید خدشات مسلسل اٹھائے جا رہے ہیں۔
دوسری جانب بلوچ نیشنل موومنٹ (BNM) کے محکمۂ خارجہ نے اس بیان کا خیرمقدم کرتے ہوئے اسے خطے کی صورتحال پر بڑھتی ہوئی عالمی توجہ کا واضح ثبوت قرار دیا ہے۔
یہ پیش رفت آئرش رکنِ پارلیمان روتھ کوپنگر کی جانب سے بلوچستان کے علاقے سوراب میں ہونے والے فضائی حملوں اور شہریوں کی ہلاکتوں کی رپورٹس پر پارلیمنٹ میں تشویش ظاہر کرنے کے بعد سامنے آئی۔
روتھ کوپنگر کے سوال کا جواب دیتے ہوئے آئرش وزیرِ خارجہ ہیلن مک اینٹی نے کہاکہ آزادیِ اظہار، پُرامن اجتماع اور سیاسی عمل میں شرکت کے حق کا تحفظ آئرش خارجہ پالیسی کا بنیادی ستون ہے۔
آئرلینڈ سیاسی و انسانی حقوق کے معاملے پر اقوامِ متحدہ کی انسانی حقوق کونسل (UPR) کے عمل، یورپی یونین کے ‘جی ایس پی پلس’ (GSP+) مانیٹرنگ مشن اور برسلز و اسلام آباد میں ہونے والے اسٹریٹیجک ڈائیلاگ کے ذریعے پاکستان کے ساتھ مسلسل رابطہ قائم کیے ہوئے ہے۔
اسلام آباد میں آئرلینڈ کا سفارتخانہ یورپی یونین کے وفد کے ساتھ مل کر صورتحال کی نگرانی کر رہا ہے اور آئرش حکام نے پاکستانی حکام سے براہِ راست ملاقاتوں میں اپنے خدشات کا اظہار کیا ہے۔
بلوچ نیشنل موومنٹ کے محکمۂ خارجہ نے آئرش وزیرِ خارجہ کے بیان پر تبصرہ کرتے ہوئے کہا کہ آئرش پارلیمنٹ میں یہ معاملہ اٹھوانا ان کی بین الاقوامی سفارتی کوششوں کا نتیجہ تھا، جس پر وہ روتھ کوپنگر کے مشکور ہیں۔
بی این ایم کے ترجمان کے مطابق، آئرش حکومت کا یہ باضابطہ جواب اس بات کا ثبوت ہے کہ اگرچہ بلوچستان میں بین الاقوامی میڈیا اور اداروں کی رسائی محدود کی گئی ہے، لیکن اس کے باوجود خطے میں ہونے والے جبر اور انسانی حقوق کی خلاف ورزیوں پر بین الاقوامی برادری، پارلیمانوں اور مختلف حکومتوں کی سطح پر نگرانی میں مسلسل اضافہ ہو رہا ہے۔
