بلوچستان کے کٹھ پتلی وزیراعلیٰ بلوچستان سرفراز بگٹی کی زیر صدارت اجلاس میں بلوچستان حکومت نے گوادر میں واٹر ایمرجنسی نافذ کردی۔
پانی کی فراہمی پر تمام ٹیکس معطل، ہنگامی اقدامات تیز کردئیے گئے۔
وزیر اعلیٰ بلوچستان کا پانی بحران سے نمٹنے کے لیے ابتک اٹھائے گئے اقدامات میں سست روی پر اظہارِ برہمی کرکے مقامی افسران اور ذمہ داران کو تنبیہ کی اور پانی بحران سے متعلق اقدامات کو نتیجہ خیز بنانے کا حکم دیتے ہوئے حالات بہتر نہ ہونے پر چیف سیکرٹری کے ہمراہ گوادر میں کیمپ لگا کر فراہمی آب کے امور کی ذاتی طور پر نگرانی کا عندیہ دیا ہے۔
وزیر اعلیٰ بلوچستان سرفراز بگٹی نے کہا کہ جن افسران میں بحران سے نمٹنے اور فیصلہ سازی کی صلاحیت نہیں، وہ رضاکارانہ طور پر عہدہ چھوڑ دیں۔ قلت آب سے نمٹنے کے لیے برج فنانسنگ کے تحت تمام دستیاب وسائل بروئے کار لائے جائیں۔ قلت آب کے باعث عام آدمی کو تڑپتا نہیں دیکھ سکتے، بحرانی صورتحال میں بلیک میلنگ پر ٹینکر مافیا کے خلاف سخت کارروائی کی جائے۔
انہوں نے کہا کہ گیارہ غیر فعال ڈی سیلینیشن پلانٹس کی دوبارہ فعالیت کے لیے فزیبلٹی رپورٹ ہنگامی بنیادوں پر مکمل کی جائے، گوادر میں پانی کا بحران انسانی بقاءکا مسئلہ، تمام سیاسی جماعتوں کو اعتماد میں لے کر قابل عمل اقدامات اٹھائے جائیں۔
