وہدے کہ بلوچ جہدءِ ہستیں نوبت بنا بوت، گڑاں گیشتر کار پہ سماءُ سسا روگایت انت۔ ہمک کنڈ شہمءُ سلہ ات۔ بلئے وہدے کہ جنز زور زوراں بوت، سیاسی تکءَ سنگتانی شپءُ روچءِ تگءُ تاچءُ جہدءِ پرچارءَ چہ قومءِ توکا آگاہی گیش بوان بوت۔ پیر، ورنا، زہگ ءُ زالبول درستان وتی مہر درشان کت انت۔ شائران شئیر گشت۔ نبشتہ کاراں نبشتہ کت۔
جنگولانی کسہ ہمک دیوانءِ براہ اتنت۔ نیست ہست اتءُ ہست ٓازمانءَ سر اَت۔ ہمک لوگ، ہمک دمک، ہمک در سرمچار اَت۔ دوچ گراں دوچانی نام سرمچار کتگ اتنت۔ سرمچاری وشیں نامے ات۔ بلوچ مڑاہ ات۔ سرمچاری قومی جنزءَ سرءُ چمءَ داشتگت۔ شادہانی دیوان پہ سرمچاران اتنت۔ سورانی محفلاں بامرد سرمچار اتنت۔ واجہ گلام محمدءِ گشتانکاں مردگ چہ قبراں پاد کت انت ءُ ”انقلاب زندگ بات“ ءِ نعرہ جنائینت انت۔ شہید گلام محمدءَ بگر داں واجہ سبا، ڈاکٹر منان جانءَ بگر داں ڈاکٹر دین جان، زاہد جان ءُ ذاکر مجید، بلوچ سیاست بلوچ گلزمین ءَ روک ات۔ ایشاں پد بلوچ سرفیس سیاست سنگتاں زیر زمین کت کہ وہدءِ زرورت ات۔
دشمنءَ لیک اِت کہ بلوچ سردارءُ پارلیمانی پارٹیانی زر ہریدیں گلام انت۔ اے چٹ چَپ بوت انت۔ دشمنءَ وتی پشتیگیں سپاہیگ ہکلاں بست انت کہ جام، خان، نواب، مڈل کلاس، ملا، دروگیں کرایہءِ دانشوراں بوشت ات ایشانی دیما۔ بلئے ہچ پہ ہچ۔ پدا ہکل اش دات انت دُز، ڈُنگ، منشیات فروش، کرایہءِ جہادی کہ کسے کہ بلوچءِ نامءَ گیپت، آئرا بجنے بکشے دور بدیئت۔ شمے کلئں گناہ معاپ بنت، بلئے بلوچ چاگردءِ تہا کس بلوچی مڑاہءَ گوں سر مہ کشّیت۔
ہمک روچ ژانگولیں لاش ماں چارراہاں کپتگ اتنت۔ بلوچءَ پہ بلوچستانءِ کسہ گراناں کپان ات۔ چاگر د انسران ات۔ شاعرءُ سوت گشوک پد کنزاں بوت انت۔ کسے کہ پد نہ کنزاِت، آ نصیر کمالان بوت، آ انور صاحب خان بوت، آ قازی بوت، علی جان ثاقب بوت، رفیق اومان بوت، حاجی رزاق بوت۔ بازین چہ ملکءَ درملک بوت انت۔ بازیں بلوچ جنگولاں گوں ہوار بوت انت۔ ہرکس سلے ولئے۔
دشمنءِ زوراکیءَ بس یک چیزے داشت کت نہ کت۔ ٓا تہنا مزاہمت ات، جنگولانی سرمچاری ات۔
جنگ ات۔ دشمنءَ وتی دیم گوں لس مہلوکءَ داشتگ ات۔ بسوچ لوگاں، بجن دور دئے۔ بس بیم، زوراکی، ترس دگہ ہچ۔
اے نیامءَ بازیں رہشوناں خود تنقیدیءِ نامءَ سوشل میڈیا ہا یک محاذے پچ کت۔ ناسرپدیں دوستانی ناپوہیءَ چہ دشمنارا ہم موقع رست کہ وتی سیاہیں پرپگنڈہءَ دیما ببارت۔ بلوچ گلزمینءِ توار گُٹ گیر ات۔ داں بلوچ جہدءِ حقیں وارثاں سما کرت دژمنا وتی کار کتگ ات۔
ڈنک ویلءَ چہ بلوچ چاگردءِ گٹ گیریں توار تْرک ات۔ ملکنازءِ ہونانی ترمپ بلوچستانءِ چارکنڈءَ شنگ اتنت۔ یک برے پدا بلوچستانءِ توار توانا بوت۔ بلئے بیا کہ اے اناگتیں توار بلوچ ءِ بازیں دوزاہاناں ہم گرانءَ کپت۔ ایشی پشدرءَ چے یی ہست، ہدا بزانت۔ بلئے گوشنت کہ ہداہا کہ انسانءَ را عقلءُ ہوش داتگ گڑاں جیڑگی انت کہ ما بندیکءِ سر کجا گار کتگ۔
من وتی ہبّرگیں ہمراہاں گوشگ لوٹاں، حق ناحق، دوستءُ دشمن، راستءُ دروگءَ چوں بگیشین انت۔
جنگ۔۔ چوناہا ہرکس زانت کہ جنگ دو فریقءِ نیامءَ بیتءُ دوئیں فریق راستیءِ دعویدار بنت۔ بلئے دنیا ہا لہتیں گِیش اتگیں راہبند ہست۔ آ فریقانی نیامءَ حقءُناحقءَ گیشین انت۔ ہمے وڑا مرچیگیں بلوچ جنگ ہم دنیاءِ گچینیں رہبنداں گیش اتگ۔ بلوچ گشیت بلوچستان منیگ انت، من اے سرزمینءِ واہندوںءُ چہ قرناں من اے سرڈگارءَ نشتگاں۔۔۔۔ پاکستانءَ را ہچ وڑیں حقے نیست کہ منی ڈیہہءِ تہا وتی دروگیں ہستیءَ بہ منّا رینیت۔ پاکستان گشیت کہ منی پت برتانیہءَ منا بلوچستان داتگ۔ نوں بلوچانءَ ہچ حق نیست کہ بلوچستانءِ داوا بکن انت۔
دوئیں فریکانی نیمگا سیاستءُ مزاہمتءِ دراہیں تک ءُ پہنات کار مرز کنگ بوت انت۔ بلوچاں پاکستانءَ را قبزہ گیر گوشتءُ پاکستانی اختیار داراں بلوچانءَ دہشتگرد۔۔ ۔ بلئے دنیاءِ گچینیں رہبنداں اے ہبر پدر انت کہ بلوچ جہد کارانی موقف حقءِ سرا انت۔
باید وا ھمیش ات کہ بلوچ راجءِ ھقیگیں دل سہتگاں ہر تکءُ پہناتاں جنزءِ پلہ مرزی بکرتیں۔ بلئے ما گندگا ایں کہ بازیں
آجوئی لوٹوکیں سیاسی سنگت تنقیدءِ نامءَ وتا بیلنس کنگءِ بے سوبیں جہدے کنگا ینت۔ ٓائیءِ چیزے سبب ہم ہست انت۔ وہدے کہ ہمے سنگتانی ہاترا ڈیہہءِ جاور نگیگ بوت انت گڑاں ہرکسءَ کہ کسانیں دگے دیست، ٓا دراں ڈیہہ بوت۔ ہرکسءَ پچار کہ پہ یورپءُ آدگہ مگربءَ دور جنان ات۔ ہراب نہ ات۔ شریں کارے ات۔ مپت ئےِ ہدا دست ہالیءَ مرگءِ بدلءَ شرتر ات کہ ڈنی ملکاں برؤت۔ ”جان بچی تو لاکھوں پائے“۔
اے مردُم کہ دراں ڈیہہ بوت انت گڑاں موہ رست اش کہ ڈیہہءِ جاور ہالاں دنیاءِ دیما بیار انتءُ پاکستانءِ زوراکیاں جہانءَ بگش انت۔ ایشانی ہمے کارا چہ بلوچ راجی جنزءَ ہم بازیں سیتے رست۔۔ انسانی اگبالانی گلاں بازیں ہنداں پاکستان کڈن کت کہ ھرچی کنگا انت شر نہ انت، پاکستان وتی ریاستی زمہ واریاں پہک بیہال انت۔ پاکستان بیوار بوت، وتی دری کچک ئےِ یلہ دات انت کہ ہنچیں کارے بکن ات کہ ہمے ترسءَ کہ بلوچستان ءِ توار انسرینتہ، درا ہم ہمے توار بدار اِت۔ گڑاں ٓائی ایس آئیءِ نشانگ ساجد حسین بوت۔
ساجدءِ شہادت پہ دراں ڈیہہیں جہدکاران نپتے بوت کپت۔ ہرکس ہبرگ بوت۔ ہرکس کہ پاکستانی زوراکیانی سرا برانز گپتگ ات اناگتہ چک اش پدا کتءُ کوکار بندات کرت اش کہ پاکستان فوجءُ بلوچ جہدکارانی تہا ہچ فرق نیست۔ پاکستان مردم کشیت جہدکار ہم مردم کش انت۔
ساجد جانءِ شہادتءِ سرا ہنگہ پولیس رپورٹءِ ودار اِنت۔ منی ہیال گوشیت کہ اے مردم دعا کنگءَ بنت کہ اے وت کُشی یا دگہ حادثہے بہ بیت دانکہ ما ادا ایمن بباں۔ بلئے ”رپورٹرز وِد آؤٹ بارڈرز“ ءِ پاکستانءِ لِیک بوتگیں ڈاکومنٹءِ درگت نوکیں رپورٹءَ کار گندتر کت انت۔ ایشی مطابقءَ اے گپ راست انت کہ پاکستان ڈنءَ مردماں نشانگ کنت۔
https://rsf.org/en/news/rsf-warns-pakistani-authorities-not-threaten-journalists-living-abroad
ہمے مردم کہ واجہ گلام محمدءِ نامءِ کلمہ وانوک بوتگ انت۔ اے مردمانءَ یانزدہ سالءَ پد نوں ہوش اتکہ کہ گلام محمد رد بوتگ۔۔ سبا دشتیاری جزباتی بوتگ۔۔۔ ہیربکش مری وتی قبیلہءَ گوں بندوک بوتگ، آ وژنری نبوتگ۔۔۔ اللہ نذر ءُ آئی ہمراہ گمراہ ءُ مہم جو بوتگ انت۔۔۔ گلام محمد سیاست ءُ مزاہمت یکجاہ کتگ۔۔ بی ایس او ءُ بی این ایم زمینءِ سرا نہ گواہ انت۔
نوں اے ہبرگان کئے سرپد بکنت کہ گلام محمد بلوچ سیاستءِ آسءَ گرستگیں انسانے بوتگ۔ گلام محمد زانتگ کہ قوم چون یکجاہ کنگی انت۔ گلام محمدءَ اے زانت ءُ ہنر بوتگ کہ بلوچ راج چون پارلیمانی پارٹی ءُ سیاسی سوداگرانی رِپک ءُ پندلانی گپچلءَ چہ کشگءُ گستا کنگ بیت۔ گلام محمد بلو چ سیاسی کارکنانی تبءَ ہبر کنگ زانتگ۔ منا یاد انت قلاتءَ شہید گلبہار گو ن سنگتاں شہید کنگ بیت گڑاں پاکستانی میڈیا گوشیت کہ من راءِ ایجنٹ جتگاں۔ درستیں بلوچ سیاست کار تک ءُ نک بنت، کسءَ ہچ نہ گوشنت، کسے نہ گْوشیت کہ ”را“ پاکستانءِ کلیں شہرءُ دمگاں یلو کنت قلاتءَ چے پولیت۔ ایش واجہ گلام محمد ءُ اللہ نذرءِ سیاسی سنچ ات کہ بلوچ راج اِش باور کنائینت کہ گلبہاربلو چ راج ءِ کمانڈر انت، را ءِ ایجنٹ نہ انت۔
گلام محمد زانتگ کہ آئی راہ چہ کنٹگءَ پرانت۔ اے راہءَ ہون ہوج ءَ بید وشی آسراتی نیست انت۔ آئی وتی گوشتن بوتگ کہ من داں سرءُ ساہءَ نہ گوزاں منی ہمراہ نزور ترانت۔ واجہ سبا دشتیاری زانتگ کہ گلام محمدءِ جہدءِ آسر چے بیت انت۔ منان کدی نہ گشتگ کہ وتی زندگی رکینگ المی انت، پرچہ کہ زندگیں منان چہ شہیدیں منانءَ گیش کار دنت۔
من نوں ہبرگان گوشاں کہ سسا کن ات۔ شمے بندیکءِ سر دور گار نہ انت۔ نزیکءَ مان اڑ اِتگ۔ سعادت مریءِ فکرءَ بہ پول ات، گلام محمدءِ وژنءَ چم شانک بدئیت۔ سباہءِ کردارءَ بہ چار اِت۔ منانءَ بزان اِت۔۔ ہمے پہ شما راہے کش انت۔ اگن ہنگہ شمئے دیدانک نزور تر اِت، اللہ نزر ہست ءُ سلامت انت۔ شمارا شریں سوج دات کنت۔
اگان منی گمان راست انت کہ شما چیزاں بیلنس کنگ لوٹ اِت کہ جہدکاری نام پشت بہ کپیتءُ آئی ایس آئیءِ قہرءَ وترا ءُ وتی کہولءَ رکینگ لوٹ اِت گڑاں منی برزءِ سوج داتگیں درمان شئمے کارءَ نیا ینت۔۔
سلامت باتے۔
