بلوچستان لبریشن فرنٹ کے ترجمان میجر گھرام بلوچ نے میڈیا کو جاری کردہ اپنے ایک پریس ریلیز میں قلات میں موبائل فون ٹاور کو نذر آتش کرنے کی ذمہ داری قبول کرلی۔
ترجمان کا کہنا تھا کہ سرمچاروں نے قلات کے علاقے میں ٹیلی نار ٹاور کو فائرنگ کرکے ناکارہ بنادیا اور تمام مشینریز کو نذر آتش کردیا۔
انہوںنے کہا کہ بروز پیر سولہ ستمبر رات آٹھ بجے قلات کے علاقے ہربوئی مرجان میں بی ایل ایف کے سرمچاروں نے یہ کامیاب کاروائی سر انجام دی اور بحفاظت اپنے خفیہ مقام منتقل ہوگئے۔
بیان میں کہا گیا کہ بی ایل ایف بحیثیت مسلح تنظیم ایک منظم و مربوط ڈھانچہ رکھتی ہے جو جدید دور کے تقاضوں کو اچھی طرح سمجھتی ہے اور اپنی قومی جنگ کو جدید تقاضوں کے مطابق ہم آہنگ کرنے کی لئے کوشاں ہے۔
میجر گھرام بلوچ نے مزید کہا کہ آج کا جدید دور ٹیکنالوجی کا دور ہے اور بی ایل ایف کی ٹیکنیکل ٹیم جدید ٹیکنالوجی کو استعمال کرنے کے فوائد اور نقصان کے متعلق مکمل آگاہی رکھتی ہے۔
ان کا کہنا تھا کہ بلوچستان لبریشن فرنٹ اس حملے کی ذمہ داری قبول کرتی ہے اور جاری جدوجہد کو منطقی انجام تک پہنچانے کا عہد کرتی ہے۔
