بلوچ یکجہتی کمیٹی نے سوشل میڈیا پلیٹ فارم ایکس پر بلوچستان کے دارلحکومت کوئٹہ میں پاکستانی فورسز کے ہاتھوں 2 وکلا کی جبری گمشدگی پر اپنے ایک پوسٹ میں کہا ہے کہ ایڈووکیٹ صلاح الدین مینگل اور ایڈووکیٹ فدا دشتی کی جبری گمشدگی انتہائی تشویشناک ہے۔ دونوں وکلاء کو گزشتہ رات کوئٹہ میں ریاستی فوج اور انٹیلی جنس ایجنسیوں نے جبری گمشدگی کا نشانہ بنایا۔
ان کاکہنا تھا کہ بلوچستان میں جبری گمشدگیوں کے واقعات میں نمایاں اضافہ ہوا ہے اور وکلاء سمیت کسی بھی شعبے سے تعلق رکھنے والے بلوچ نوجوان محفوظ نہیں ہیں۔ ریاستی فوج تعلیم یافتہ بلوچ نوجوانوں کو بغیر کسی ایف آئی آر اور قانونی کارروائی کے زبردستی غائب کر رہی ہے۔
انہوںنے کہا کہ ہم انسانی حقوق کی تنظیموں سے اپیل کرتے ہیں کہ وہ بلوچستان میں جبری گمشدگیوں کے خلاف فوری طور پر آواز بلند کریں۔
