اَئید – نوتک آشکان دشتی

وتارا کمو مَھتلین
اے اَھد ءُ جنگی نوبتاں
اے ھُون ءُ جون ءِ ساھتاں
نہ مَنتگ پہ بلوچ ءَ ھِچّ
گِسے، نہ مِھری میتگے
نہ شادِھے، نہ زینتے
نہ وشّی یے، نہ لِزّتے
موتک ءُ زار ءُ رنجی اِنت
ھمُک گِس ءَ چہ یکّے گار
ھمُک گِدان پُرسی اِنت
منی وپا ءِ سرڈگار
نوں جنگجاھے سرجم ءَ
بُگش ائید تو اَتک بَہ ئے؟
آ ماسی گنجُل ءِ گِس ءَ؟
پہ بچّ ءِ راھچاری ءَ،
داں ھوش کنت گِریوگ اِنت
بُگش ائید تو اَتک بَہ ئے؟
ھما زگالیں میتگ ءَ
کہ دُژمِن ءَ مئے مانداشت
توامیں میتگ ءِ گدان،
سُتکگ اَنت نہ گواھی کَس
بُگش ائید تو اَتک بَہ ئے؟
ھما پہ چورھیں سراں
کہ پاد شپاد ءُ سر دراَنت
پِت گوں براتاں ھردوئیں
پہ سرڈگار ءِ موکگ ءَ،
شھید بوتاں اِمبری
بُگش ائید تو اَتک بَہ ئے؟
ھما ھساری سنگراں،
پہ نِشتگیں آ بیلی آں
کہ روچ ءُ شپ وداری اَنت
پہ ڈیھ ءِ دُژمناں بدّیں
بُگش ائید تو اَتک بَہ ئے؟
بلوچ ءِ ڈیھ ءُ بُندراں
پہ نوک رُودیں مانِشاں
پہ سُتکگیں آ میتگاں
پہ چورھاں ءُ سر دَراں
پہ راھچاریں میّتاں
پہ ھون شَنزیں سنگراں
پہ شورہ بوہیں مَلپداں
بُگش ائید تو اَتک بَہ ئے؟؟؟
بُگش ائید تو اَتک بَہ ئے؟؟؟