ضلع گوادر کے نومنتخب رکن بلوچستان اسمبلی اور حق دو تحریک کے سربراہ مولانا ہدایت الرحمان نے کہا ہے کہ نگراں دور حکومت میں سندھ کے ٹرالرز مکمل بے لگام ہو کر نہ صرف سمندری حیاتیات کی نسل کشی کر رہے ہیں بلکہ وہ مقامی ماہی گیروں کو لاکھوں روپے کے قیمتی جال کاٹ کر ماہیگیروں پر حملہ آوار ہو کر غنڈہ گردی اور تخریب کاری پر اتر آئے ہیں۔
انہوں نے کہا کہ ہم انہیں پیغام دینا چاہتے ہیں ضلع گوادر کے ماہیگیر لاوارث نہیں ہم اپنے سمندر کا دفاع کرنا اچھی طرح جانتے ہیں ۔
سوشل میڈیا پر ایک آڈیو پیغام میں انہوں نے کہا کہ میں ضلع گوادر کے تمام ماہی گیروں اور عوام کا شکریہ ادا کرتا ہوں جنہوں نے مجھے اپنا نمائندہ منتخب کرکے خدمت کا موقع دیا ۔
انہوں نے کہا کہ 8 فروری 2024 کے الیکشن میں میری کامیابی یہاں کے عوام اور غریب ماہی گیروں کی کامیابی ، ٹرالر مافیا کی شکست ہے ۔
انہوں نے کہا کہ نگراں دور حکومت میں ٹرالر مافیا نے مکران بالخصوص گوادر کے سمندر میں یلغار کیا ہے جن کی تعداد روز بروز بڑھتی جا رہی ہے جو سمندر کو تاراج کرنے کے ساتھ ماہیگیروں پر حملہ آور ہو کر غنڈہ گردی اور تخریب کاری پر اتر آئے ہیں ہم انھیں واضح پیغام دینا چاہتے ہیں کہ جن کی مرضی جتنا غنڈہ گردی کریں لیکن شکست ان کا مقدر ہے ہم اسمبلی کے اندر اور باہر اپنے حقوق اور ماہیگیروں کی دفاع ہر صورت میں کریں گے۔
انہوں نے کہا کہ ہم متعلقہ تمام اداروں کو پیغام دینا چاہتے ہیں کہ ہم ٹرالر مافیا کی اس طرح کی غنڈہ گردی اور تخریب کاری کسی بھی صورت برداشت نہیں کریں گے۔
