پاکستانی فوج کے شعبہ تعلقات عامہ آئی ایس پی آر نے دعویٰ کیا ہے کہ بلوچستان کے ضلع کیچ کے علاقے ہوشاب میں سیکورٹی فورسز کیساتھ جھڑپ میں 6 مشتبہ افراد ہلاک ہوگئے۔
جبکہ دوسری جانب ضلع پنجگور سے یہ اطلاعات ہیں کہ پنجگور کے علاقے پروم میں مسلح افراد و پاکستانی فورسز کے مابین جھڑپ میں 6 افراد سمیت فورسز کے کئی اہلکارمارے گئے ہیں۔
آئی ایس پی آرنے دعویٰ کیا ہے کہ سیکورٹی فورسز کی جانب سے مشتبہ افراد کے گرد گھیرا تنگ کرتے ہوئے علاقے کی ناکہ بندی کرکے مشتبہ افراد کیخلاف سرچ آپریشن شروع کیا، جس کے باعث مشتبہ افراد اور سیکورٹی فورسز کے درمیان فائرنگ کا تبادلہ ہوا۔
فائرنگ کے تبادلے میں ایک فوجی اہلکارحوالدار ہدایت اللہ ہلاک جبکہ نائیک میر زحمد زخمی ہوگیا۔
آئی ایس پی آر کے جاری بیان میں کہا گیا کہ پاکستان ایران بارڈر کے نزدیک کیچ کے علاقے ہوشاب میں سیکورٹی فورسز کیساتھ جھڑپ میں 6 افراد ہلاک جبکہ ایک سیکورٹی اہلکار ہلاک اور ایک زخمی ہوگیا۔
آئی ایس پی آر نے دعویٰ کیا کہ ہلاک مشتبہ افراد کے قبضے سے بھاری مقدار میں اسلحہ و گولہ بارود برآمد کرلیا گیاہے۔
آئی ایس پی آر کے مطابق ہلاک حوالدار کا تعلق کے پی کے علاقے لکی مروت سے ہے۔
پنجگور سے علاقائی ذرائع کے مطابق اس جھڑپ میں زمینی فورسز کے علاوہ گن شپ ہیلی کاپٹروں نے بھی حصہ لیا ہے جبکہ دوران جھڑپ علاقے میں گولیوں کی آوازیں بھی سنی گئیں ہیں۔
ذرائع کے مطابق ہلاک ہونے والوں کا تعلق بلوچ آزادی پسند مسلح تنظیم سے ہیں تاہم آزادی پسند تنظیموں کا موقف اس حوالے سے باضابطہ طور پر سامنے نہیں آیا ہے۔
اب تک اس واقعہ کی جائے وقوعہ متنازع بناہوا ہے کہ آیا فورسز و مسلح افراد کے مابین جھڑپ کا یہ واقعہ ضلع کیچ میں ہوا ہے یا ضلع پنجگور میں۔
