زمین جُمباں زمین جُمبینت
گُڑینتگ آزمان لُنجیں
سُرینتگ اَرش پُرگنجیں
ماں اَرش ءَ پْریشتگاں زار اِنت
جھان زُلمانی بازار اِنت
تِلاھیں ننگ ءِ باپار اِنت
بلوچ ءِ شیریں پَرزنداں
شھیدانی پد ءُ رنداں
میریں گْوھرام ءِ دلبنداں
گوں تلاہ ءُ تلملیں ھوناں
زمین شُشتگ کُتگ پلگار
سلام اِنت سد سلام سُھریں
پد ءَ مئے اِزت ءِ پنجگور
گوں ڈھل ءُ چاپ ءُ چوگاناں
شھید لالا منیر ءِ سُور
منی راجی شھیدانی
تلاھیں راہ ءُ رھبنداں
رُمب اَنت چو دورسریں کَور ءَ
اے راج ءِ تنگویں پدریچ
تاں کاھان ءُ زبادیں کیچ
تاں بولان مسکیں دُزّاپ ءَ
کُتگ بیرک وتی دست ءَ
بلیدہ ، زمران ، دشت ءَ
تلاھیں نوشکی ءِ دلبند
گوں ھوناں سُھر کُتگ دِنگاں
مئے پیریں لونگ ھان ءِ
دُبر ارواہ کُتگ زندگ
نسیر ءِ ھمبویں مانش
گل ءُ گلزار ءُ بوستان اِنت
پد ءَ ماں نوشکی ءِ ریکاں
بلان اَنت گال گل ھان ءِ
نسیر ءِ بْرتکگیں گالبند
پِدا بیت اَنت پِدائی شیر
وتی ماتیں زمین ءَ پہ
نمیران اَنت جھان ھست اِنت
تاں بلوچ ءِ دودمان ھست اِنت
تاں زند ءُ زندمان ھست اِنت
تاں گُلامی ءِ شگان ھست اِنت
تاں ایردستی نشان ھست اِنت
دُوا گون اَنت ماتانی
گْوھار ءُ پِسّ ءُ بْراتانی
تئی آریپیں پِسّانی
راج ءِ سَولیں بچّانی
کہ پسّ اِش گار ءُ بیگْواہ اَنت
ماں زنداناں تھاریناں
سُچ اَنت بالو ھمے رنگ ءَ
پِدائی بنت پِدا جنگ ءَ
سچ اَنت پہ رژن ءِ شوھاز ءَ
جن اَنت آجوئی ءِ ساز ءَ
ھدوک اَنت مرگ ءِ امباز ءَ
پہ وت تِیرے گچین کُرتگ
ماں ھَمّیل ءَ وتی زُرتگ
نگیگیں جاوراں جنگ ءِ
چہ دزگیری ءِ زِشت ءَ
وت ءَ را وت شھید کُرتگ
سلام اِنت سد سلام سُھریں
سلام اِنت سد سلام سُھریں
