گوادر ماں ٹٹ ءَ
ٹٹ ماں گْوالگ ءَ
گْوالگ ماں ھر ءَ
ھَر ماں بیدہ ءَ ۔۔۔۔ چاچ
گْوادر بندیگ اِنت گنجانی
تابِیر ھمّل ءِ وابانی
باتیل کسّواں اھدیگاں
چیدگ تنگویں راجانی
دُرّیں سیّد ءِ گالانی
٭٭٭٭٭٭٭٭٭٭٭
پُلّیں شھیدانی وتن
انگِر کُتگ دھر ءِ بداں
باتیل ھَکِیر ءُ بے وس اِنت
کارواٹ شِلِنگ ءِ کَھچر اَت
گُرّانی ءِ سبزیں کھِیر
تئئ تْرانگ ءُ زَپتیں زھیر
دیر اِنت کہ گوروَنڈ نہ بہ ئے
کیّا ءِ سارتیں منزل ئے
دیم پہ سدو ءِ گندگ ءَ
مھر ءِ نشانی مکّھیں
شال ھم شُتگ گْوادر شُتگ
باروٹی ءُ شُومّیں بداں
نِیلّیں زِر اِش کُرتگ ٹَٹ ءَ
کپتگ منی ڈیھ ءَ مدگ
ھَجگیں کِشار اِش مئے رُتَگ
جی مِیدی ءِ بُرزیں چُدَگ
ڈُنگاں وتی ھَنکین کُتگ
ماتیں زمین چہ ما زِتَگ
پِریَون ءِ لشکر گار بہ بات
گَنجیں زِر ءَ زیراپ بہ بات
جی راجپھازیں ھمبلاں
پْروش اِت اے زمزیل ءُ ٹَٹاں
آجو کن اِت ڈیھ ءَ وتی
بیار اِت نوکیں ھمّلے
سینگار اِت گْرانیں لشکرے
گوں زھم ءُ تُپنگ ءُ اِسپراں
گنجیں زِر ءِ پانک ءَ بہ جنت
انچوش کہ اسپیتیں پَرَنگ
پْروش دات بلوچ ءِ لشکر ءَ
سیاھیں پرنگاں پْروش دے اِت
راجی تِلاھیں کُنگراں
بوشیر بگر تاں سونمیانی
آجو کتگ شیر ءِ نر ءَ
اوھے لگوریں رھبر ءَ
نشتگ ماں گنجیں گْوادر ءَ
گْوشتگ ھبیسّییں نر ھر ءَ
گْوادر کہ بیت وھدے ٹَٹ ءَ
کنت دیمروی بے زھمت ءَ
آلَم شُتگ ماہ ءِ سر ءَ
بید ءِ چہ زمزیل ءُ ٹٹ ءَ
اوھے تئی اگل ءَ بہ بات
بد سورتیں شِکل ءَ بہ بات
نوش ئے تو تْرنداپ روچ ءُ شپ
نیست اِنت ترا سُدّ ءُ سما
راج ءَ ترا اوٹے نہ دات!
راجی توار ءَ تو زِبَھر
شیتانیں مھلوک ءِ نَپَر
ناھُودگیں دْروگاں کَکَر
بے دستگ ءَ کُنٹیں تَپَر
ایمان بھا کُت پہ گَبَر
پنجاپ ءِ سیاھیں سومری
گازے نہ کَرز ئے گْوادری
شِیر اِت ھرام بات مادری
پَنگے گْوپ ءُ دابے بہ مَل
مَردے بہ شوھاز چودَری
توسیپ کرز اِیت شائری
سیّد گوں گالاں موھری
استاد مجید مئے گْوادری
شاباش ھسین واڈیلو ءَ
گْوادر بگر داں بیلو ءَ
راج ءِ منی منڈیلو ءَ
جی گوادر ءِ مَلّیں بلوچ
دُزّ ءُ لگوریں رَھبَراں
گُمسار کن ءُ آس ءَ بہ سوچ
پْروش اِت اے شیتانی ٹٹ ءَ
آجو کن اِت گنجیں زِر ءَ
ھمراہ بہ بہ اِت جْوانیں سراں
راجدوست ءُ راجی کنگراں
دیمپان بنت سیاھیں شپاں
دیمپان بنت سیاھیں شپاں