بلوچستان کے ضلع کیچ کے مرکزی شہر تربت میں تربت یونیورسٹی کے انتظامیہ کی جانب سے ایک بار پھر بک اسٹال لگانے کی اجازت نہ دینے پر اور مین گیٹ پر دھکم پیل اور سینئر پروفیسر کی سخت مزاحمت کے بعد انتظامیہ کو فیصلے سے پسپا ہونا پڑا۔
اطلاع کے مطابق پیر کو تربت یونیورسٹی میں شعبہ بلوچی کے زیر اہتمام سید ظہور شاہ ہاشمی کی یاد میں منعقد ہونے والے پروگرام کے دوران دو مختلف پبلشرز کو بک اسٹال لگانے کی اجازت دی گئی تھی، تاہم جب صبح پبلشرز کتابوں کے ہمراہ یونیورسٹی کے گیٹ پر پہنچے تو انہیں یونیورسٹی انتظامیہ کے حکم پر روک دیا گیا اور کتابیں اندر لے جانے کی اجازت نہیں دی گئی۔
اس دوران اطلاع ملنے پر بلوچی ڈیپارٹمنٹ کے دو سینئر پروفیسر گیٹ پر آئے اور یونیورسٹی انتظامیہ کے اس رویے کی سخت مذمت کرتے ہوئے دونوں پبلشرز کو کتابوں کے ساتھ زبردستی اندر لے گئے، پروفیسرز کی مزاحمت کے باعث یونیورسٹی انتظامیہ کو پسپا ہونا پڑا۔
تربت یونیورسٹی کے طلبہ نے کتابوں کے اسٹال کی ممانعت پر افسوس کا اظہار کیا اور یونیورسٹی کی موجودہ انتظامیہ کے اس رویے کو غیر علمی اور علم دشمن کہتے ہوئے گورنر بلوچستان سے ایکشن لینے کا مطالبہ کیا۔
یاد رہے کہ تربت یونیورسٹی اس سے قبل بھی کئی مرتبہ یونیورسٹی کے اندر بک اسٹال لگانے پر اسی طرح کی رویے کا مظاہرہ کرچکی ہے جس کی مخالفت میں طلبہ نے آواز بلند کی ہے۔ یونیورسٹی انتظامیہ کے آج ہونے والے اس غیر علمی رویے کی ہر سطح پر مخالفت کی جارہی ہے۔
