بلوچستان کے علاقے واشک اور جھاؤ میں پاکستانی فورسز پر حملوں میں مسلح افراد پولیس تھانہ اور موبائل ٹاورز نذر آتش کردیئے جبکہ فورسز اہلکاروں کو حراست میں لیکر ان کے اسلحات بھی ضبط کرلئے ۔
واشک سے اطلاعات ہیں کہ گزشتہ رات دالی میں بڑی تعدادمیں نامعلوم مسلح افراد نے حملہ کر کے ایک تھانے پر قبضہ کر لیا۔
عینی شاہدین کے مطابق حملہ آوروں نے پولیس اہلکاروں کو حراست میں لے لیا اور سرکاری اسلحہ و موٹر سائیکلیں اپنے ساتھ لے گئے۔
حملے کے بعد مسلح افراد نے علاقے میں موجود یو فون کے ٹاورز کو بھی نشانہ بنایا اور انہیں تباہ کر دیا۔
دوسری جانب ضلع آواران کے علاقے جھاؤ بگاڑی زیلگ کے علاقے میں بھی گزشتہ روز مسلح افراد نے یو فون کے ٹاورز پر حملہ کیا۔
مقامی ذرائع کے مطابق، حملہ آوروں نے مشینری سمیت ٹاورز کو نذرِ آتش کر دیا۔
واقعے کے بعد قریبی فوجی کیمپ سے تقریباً ایک گھنٹے تک مارٹر فائر اور فائرنگ کی گئی، تاہم فوجی اہلکار موقعے کے قریب جانے سے گریزاں رہے۔
حملوں کی ذمہ داری تاحال کسی تنظیم نے قبول نہیں کی ہے۔
