پاکستان کے صوبہ خیبر پختونخواکے علاقے باجوڑ میں عوامی نیشنل پارٹی کے مرکزی سکریٹری برائے امورِ علما مولانا خانزیب کو فائرنگ کر کے قتل کر دیا گیا ہے۔
باجوڑ کے ڈی پی او وقاص رفیق کے مطابق مولانا خانزیب اپنی گاڑی پر جا رہے تھے کہ اچانک دو موٹر سائیکلوں پر سوار چار مسلح افراد نے ان پر فائرنگ کر دی۔
عینی شاہدین کے مطابق انھیں جسم پر متعدد گولیاں لگیں۔
مقامی صحافی بلال یاسر کے مطابق خانزیب اہم شخصیت تھے جنھوں نے سیاسی، قبائلی اور علمی سطح پر خدمات سرانجام دی تھیں۔ ان کے مطابق خانزیب کے گھر پر پہلے بھی حملہ ہو چکا تھا۔
کہا جارہا ہے کہ مولانا خان زیب 13 جولائی کو ہونے والے امن مارچ کے سلسلے میں مہم پر تھے۔
مولانا خان زیب اے این پی کی علماء کونسل کے سربراہ اور قومی اسمبلی کے سابق امیدوار تھے۔
عوامی نیشنل پارٹی نے مولانا خانزیب کی ہلاکت پر تین روزہ سوگ کا اعلان کیا ہے۔
