بلوچستان کے ضلع موسیٰ خیل کے علاقے درگ میں مسلح افراد نے ایک تعمیراتی سائٹ پر حملہ کر کے بھاری مشینری کو آگ لگا دی اور وہاں کام کرنے والے چارافراد کو اغوا کر کے نامعلوم مقام پر منتقل کر دیا ہے۔
ذرائع کے مطابق مسلح افراد نے درگ کے مقام پر جاری تعمیراتی منصوبے پر اچانک حملہ کیا۔ حملے کے دوران مسلح افراد نے سائٹ پر موجود بلڈوزرز، ٹریکٹرز اور دیگر قیمتی مشینری و گاڑیوں کو نذرِ آتش کر دیا، جس سے تمام تر سامان مکمل طور پر خاکستر ہو گیا۔
مشینری کو تباہ کرنے کے بعد مسلح افراد وہاں پر قائم کیمپ میں موجود چار افراد کو اپنے ساتھ اغوا کر کے لے گئے۔
واقعے کے فوراً بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے، تاہم آخری اطلاعات تک نہ تو مشینری کے نقصان کا حتمی تخمینہ سامنے آ سکا ہے اور نہ ہی اغوا کیے گئے افراد کے بارے میں کوئی سراغ ملا ہے۔
واقعے کی ذمہ داری کے حوالے سے تاحال کسی فریق یا تنظیم کی جانب سے باضابطہ بیان سامنے نہیں آیا ہے۔
