بلوچستان کے دو مختلف علاقوں آواران اور چاغی (دالبندین) میں مسلح کارروائیوں کے واقعات سامنے آئے ہیں، جن میں ایک جگہ مبینہ ڈیتھ اسکواڈ کے ارکان کو نشانہ بنایا گیا جبکہ دوسرے واقعے میں بلوچستان افغان سرحدی علاقے جانے والے ٹرک کو آگ لگا دی گئی۔
ضلع آواران کے علاقے مالار میں مسلح افراد نے ایک پیش قدمی کے دوران مبینہ طور پر ریاستی حمایت یافتہ ملیشیا (جسے مقامی سطح پر ڈیتھ اسکواڈ کہا جاتا ہے) کے ارکان کو حملے کا نشانہ بنایا ہے۔
مقامی ذرائع نے واقعے میں بعض افراد کے جانی نقصان کے خدشے کی اطلاعات دی ہیں، تاہم ہلاکتوں یا زخمیوں کی حتمی تعداد اور نشانہ بننے والے افراد کی شناخت کے حوالے سے آزادانہ تصدیق ہونا باقی ہے۔
دوسری جانب ضلع چاغی کے اہم تجارتی شہر دالبندین سے بلوچستان افغان سرحدی علاقے ‘برابچہ’ جانے والے ایک ٹرک کو مسلح افراد نے روک کر آگ لگا دی۔
پولیس ذرائع کے مطابق مذکورہ ٹرک سرحدی شہر برابچہ کے لیے روزمرہ استعمال کی اشیائے ضروریہ لے جا رہا تھا، جو آتشزدگی کے باعث مکمل طور پر جل کر خاکستر ہو گیا ہے۔
واقعے کی اطلاع ملتے ہی سیکیورٹی فورسز نے علاقے کو گھیراؤ میں لے کر تحقیقات شروع کر دی ہیں۔
