جرمنی کے شہر ہینوور میں بلوچ نیشنل موومنٹ ( بی این ایم ) کے زیر اہتمام بلوچ شہداء کے عالمی دن کی مناسبت سے منعقدہ کانفرنس سے خطاب کرتے ہوئے سیاسی تجزیہ کار اور مصنفہ عائشہ صدیقہ نے کہا ہے کہ اب انھیں پاکستانی ریاست پر یہ اعتماد نہیں رہا کہ وہ اپنے شہریوں کا تحفظ کر سکتی ہے یا ان کی شکایات اور مسائل کا ازالہ کرنے کی صلاحیت رکھتی ہے۔
عائشہ صدیقہ نے یہ اظہارِ خیال بلوچ نیشنل موومنٹ (بی این ایم) کے زیرِ اہتمام ہینوور، جرمنی میں منعقدہ بلوچ شہداء کے عالمی دن کی کانفرنس سے خطاب کرتے ہوئے کیا۔ انھوں نے کہا کہ وہ کئی برسوں سے اس سالانہ اجتماع میں بلوچوں سے اظہارِ یکجہتی کے لیے شریک ہوتی رہی ہیں، لیکن اس مرتبہ وہ اپنی ذاتی محرومی اور المیے کے احساس کو بھی اس اجتماع میں بیان کرنا چاہتی ہیں۔
انھوں نے کہا کہ کسی کے پیاروں کو جبری طور پر لاپتہ کر دینا ایسا عمل ہے جس کا کوئی جواز پیش نہیں کیا جا سکتا۔
عائشہ صدیقہ نے ماضی کا حوالہ دیتے ہوئے بتایا کہ تقریباً 2012 سے 2014 کے درمیان وہ اسلام آباد میں جبری لاپتہ افراد کے لواحقین کے ایک احتجاج میں شریک ہوئی تھیں۔ اس وقت ماما قدیر بلوچ کی قیادت میں جبری لاپتہ افراد کے لواحقین شال سے اسلام آباد تک پیدل مارچ کرکے پہنچے تھے۔ ان کا کہنا تھا کہ اس وقت احتجاج میں شرکت کا مقصد پاکستان کے دفاع میں آواز اٹھانا بھی تھا، کیونکہ اگر وہ اس مارچ میں شریک لوگوں کے ساتھ کھڑی نہ ہوتیں تو انھیں بلوچوں سے یہ کہنے کا کوئی اخلاقی جواز حاصل نہیں رہتا کہ وہ پاکستان کا حصہ بن کر رہیں۔
تاہم، ایک دہائی سے زائد عرصہ گزرنے کے بعد ان کے اس احساس میں بنیادی تبدیلی آ چکی ہے۔ انھوں نے سوال اٹھایا: ’’میں آخر کس چیز کا دفاع کر رہی ہوں؟‘‘ ان کے مطابق ریاستی تشدد اور آمرانہ طرزِ حکمرانی میں مسلسل اضافہ ہوا ہے اور اب ریاست پر ان کا اعتماد باقی نہیں رہا۔
پاکستانی ریاستی ڈھانچے پر تنقید کرتے ہوئے عائشہ صدیقہ نے اسے ایک نوآبادیاتی اور وسائل سے ناجائز فائدہ اٹھانے والی ریاست قرار دیا۔ ان کا کہنا تھا کہ پاکستان ابتدا ہی سے ایک حقیقی سیاسی ریاست کے بجائے بیوروکریٹک ڈھانچے کے طور پر تشکیل پایا۔ انھوں نے کہا کہ فوج کا سیاست میں کردار محض اتفاقی مداخلت نہیں بلکہ موجودہ نظام دراصل ’’آئینی فوجی بالادستی‘‘ کی صورت اختیار کر چکا ہے۔
انھوں نے سیاسی جماعتوں اور پارلیمان کو بھی شدید تنقید کا نشانہ بناتے ہوئے کہا کہ انھوں نے عملاً اپنی خودمختاری سے دستبرداری اختیار کر لی ہے۔ ان کے مطابق پارلیمان نے فوج کے مطالبات کے تحت ذرائع ابلاغ پر پابندیاں عائد کرنے سمیت مختلف اقدامات کی منظوری دی ہے۔ انھوں نے کہا کہ عدلیہ اور سول بیوروکریسی سمیت ریاستی ادارے کمزور ہو چکے ہیں، جبکہ فوجی اور سول اشرافیہ کے مفادات پر مبنی اتحاد ملک کے وسائل کی تقسیم پر غالب آ چکا ہے۔
عائشہ صدیقہ نے جبری گمشدگیوں، خوف اور ریاستی جبر کو وسائل پر قبضے اور ان سے فائدہ اٹھانے کے نظام سے جوڑتے ہوئے کہا کہ ریاست بلوچستان اور پختونخوا سمیت مختلف علاقوں کے معدنی وسائل کو مؤثر عوامی مشاورت اور جواب دہی کے بغیر فروخت کرنے کے لیے تیار ہے۔ ان کے مطابق اس عمل کو جاری رکھنے کے لیے خوف، خاموشی اور جبر کو بطور ہتھیار استعمال کیا جاتا ہے تاکہ وسائل پر قابض قوتوں کے مفادات کو تحفظ فراہم کیا جا سکے۔
انھوں نے فیلڈ مارشل عاصم منیر کی شرکت میں اسلام آباد میں ہونے والی ایک حالیہ کانفرنس کا حوالہ دیتے ہوئے کہا کہ وہاں معدنی وسائل سے متعلق فیصلوں اور پیشکشوں میں نہ پارلیمان کو اعتماد میں لیا گیا اور نہ ہی ان علاقوں کے عوام سے مشاورت کی گئی جن کے وسائل کے بارے میں فیصلے کیے جا رہے ہیں۔
عائشہ صدیقہ نے جبری گمشدگیوں کے خلاف جدوجہد کرنے والی بلوچ ماؤں کا موازنہ ارجنٹائن کی معروف ’’ پلازا دے مایوں کی ماں‘‘ سے کیا۔ انھوں نے کہا کہ دونوں خطوں کی ماؤں کو اپنے جبری لاپتہ پیاروں کے بارے میں معلومات سے محروم رکھا گیا، انھیں الزام تراشی کا نشانہ بنایا گیا اور ان کی فریاد کو نظرانداز کیا گیا۔
انھوں نے ارجنٹائن کی ان ماؤں کی جدوجہد پر لکھی گئی ایک کتاب کا حوالہ بھی دیا اور اپنے خطاب کے اختتام پر بلوچ خواتین کو خراجِ تحسین پیش کیا، جنھوں نے ریاستی دباؤ اور خطرات کے باوجود اپنے لاپتہ پیاروں کی بازیابی اور انصاف کے لیے جدوجہد جاری رکھی۔