وڈھ میں فائرنگ سے ایک شخص ہلاک،قلات سے لاش برآمد

بلوچستان کے ضلع خضدار کے علاقے وڈھ میں فائرنگ سے ایک شخص ہلاک ہوگیا جبکہ قلات کے علاقے نرمک سے ایک تشدد زدہ لاش برآمدہوئی ہے جس کو سر میں گولیاں مار کر قتل کیا گیا ہے۔

وڈھ بازار میں موٹرسائیکل سوار مسلح افراد کی فائرنگ ہلاک ہونے والے شخص کی شناخت نعمت اللہ ولد مولوی پسند خان محمد حسنی کے نام سے ہوگئی ہے۔

علاقائی ذرائع کا کہنا ہے کہ سر میںگولی لگنے سے وہ موقع پر ہلاک ہوگیا۔

دوسری جانب قلات کے علاقے نرمک میں چیل سے ایک شخص کی نعش برآمد ہوئی ہے۔

مقتول کو سر میں فائرنگ کرکے قتل کیا گیا ہے۔

لیویز ذرائع کے مطابق قلات کی سب تحصیل جوہان کے علاقے نرمک چیل سے ایک 50 سالہ شخص کی نعش برآمد ہوئی ہے جسے سر میں گولیاں مارکر قتل کیا گیا ہے۔

مقتول کی شناخت نصرالدین ولد واحد بخش سکنہ جلال آباد مچھ ضلع کچھی کے نام سے کی گئی ہے۔

مقتول کی نعش کو آر ایچ سی منگچر منتقل کیا گیا ہے۔