بلوچ راجی جُنز ءُ ھوناکیں سال | بابل لطیف

0
66

چوناھا ءَ پہ بلوچ راجی جُنز ءِ واستا ھر ساھت ءُ دمان، روچ ءُ ھپتگ، ماہ ءُ سال، بے تاوان نہ بوتگ اَنت، بلے اے سال ءِ اندر ءَ ھما تاوانانی کہ بلوچ راجی جُنز دیمپان بوتگ، آ تاوان بلوچ راجدپتر ءِ اندر ءَ ھوناکیں داستانے ءِ رنگ ءَ نبیسّگ ءُ گیر آرگ بیت۔۔۔۔۔۔۔۔۔
اے بارو ءَ مارا جیڑگی اِنت کہ اے تاوانانی پُژدر ءَ زیات مئے وتی نِزوری ھمگْرنچ اَنت یا دُژمِن ءِ رِپک ءُ ھُنر۔۔۔۔۔۔
ھو! دُژمِن مُدام مارا وتی رِپک ءُ پندلانی دام ءَ گِرگ لوٹ اِیت دانکہ اے راجی جُنز تاوانبار بِہ بیت ءُ من وتی بے سوبیں کارپدانی پیلو کنگ ءُ بلوچ ءِ دائمی ایردست ءُ گُلام دارگ ءَ سوبین بِہ باں۔
چی ءَ کہ مئے اے راجی جُنز ءِ مُھکمی ءُ دیمروئی گُلامیں سرڈگار ءِ آجوئی ءُ وشھالیں آکبت ءِ مانزمان اِنت، بلے مارا دائم ءَ سما گْور کنگی اِنت کہ ما گوں یک دُژمِنے ءَ دیم پہ دیم اِیں، پمشکا مارا پہ وتی پھازگ ءُ راجی جُنز ءِ دیمروئی ءَ چاڑکّہ بُوَگی اِنت، اگاں ما وتی نِزوریانی سر ءَ چمشانک دات ءُ دیم ءَ جُنز اِت اِیں، گُڑا دُژمِن ستر رِپک ءُ پندلاں کار بِہ گیت سوب نہ کنت۔

ھمے رنگ ءَ دُژمِن پہ مئے راجی جُنز ءِ پُروش دَیَگ ءُ اِیرموش کنگ ءِ واستا روچ پہ روچ گوں نوکیں گامگیجاں دیم ءَ پیداک اِنت، چوش کہ آوار جَنَگ ءُ شھید کنگ ءَ ابید پہ زُورانسری لجّ ءُ ننگ ءِ سر ءَ دست ءِ دْراج کنگ، ورناھاناں چہ وانگ ءِ بدل ءَ نِشہ ءِ آماچ کنگ، وتی کُشندہ ٹولیانی تہ ءَ گیشی اے گپّ ءِ مستریں منّانک اِنت کہ آ پہ وتی گُڈّی دم ءِ رکّگ ءَ ھر پاند ءَ دست ءُ پاد جَنَگ ءَ اِنت۔۔۔۔۔۔۔۔۔
پمشکا مارا ھم لوٹ اِیت کہ ما ھم چیرجنگی ءِ ھر ھما رِپکاں گوں جنگ ءِ پِڑ ءَ اِیر بہ کپ اِیں کہ آ دُژمِن ءِ تاوان ءُ راجی جُنز ءِ سیت ءُ نپّ ءَ بِہ بَہ اَنت۔

دومی نیمگ ءَ ما چرئے ھبر ءَ ھم شمشکار مہ بَہ اِیں کہ ریاست پاکستان مالی زوال ءِ آماچ اِنت، بلے آ پہ وتی وامانی دیم ءِ دارگ ءَ بلوچ راج ءِ گْواجنانی لُٹّ ءُ پُل ءَ ھوار توامیں واکداری گوں بُتیں سروزیر ءِ کولبند ءِ سر ءَ دزنِشان ءَ وتی نام ءَ کُرتگ۔ اے توامیں مڈّیانی ھُدابُند بلوچ راج ءِ پاداں سواس نیست ءُ شپاں ھمشام ءَ وپس اِیت، گُڑا پہ ایردستیں بلوچ راج ءَ الم اِنت کہ آ پہ وتی رُوژنائیں باندات ءَ ھما کاروان ءِ ھمراہ بِہ بیت کہ آ چو پارلیمنٹ پرستانی وڑ ءَ دُروگیں تسلّا ءُ تھنا جاک ءُ کوکار نہ کنت، بلکیں آ پہ وتی ھستمان ءِ رکّینگ ءَ سر ءُ ارواھاں کولیگ کنگ ءَ اَنت۔
اے کہ پارلیمنٹ ءَ نِشتگ اَنت، اے تھنا باری بدل کن اَنت ءُ واجہ ءِ پنتانی پیلو کنوک اَنت، اگاں کُجام گپّ واجہ ءِ تب ءَ نہ کپت پہ آیاں آ روچ شومیں روچ زانگ بیت، پمشکا اے توامیں واجہ ءِ در ءَ چو وپاداریں سگ ءَ میلانک ءُ دُمب سُرینگ ءَ اَنت۔
اِیشی ءِ یک درورے اِیش اِنت کہ سی ٹی ڈی بلوچ راج ءِ چُکچینی ءَ پدّریں رنگے ءَ ھوار اِنت، بلے بُتیں سروزیر ءُ آئی ھمراھیں کاسگ چٹّ یکیں توار ءِ ھُدابُند ءُ سی ٹی ڈی ءِ سِپت ءُ توسیپ ءَ وتی نُکّ ءِ تل اِش بُرتگ، چی ءَ کہ واجہ ءِ پرمان اِنت۔۔۔۔۔۔۔۔۔۔۔۔۔
بلے بژن پہ ھمایاں کہ آ پارلیمنٹ ءِ بھر ءُ وت ءَ راجدوست گْوش اَنت ءُ آیوکیں گچینکاری ءِ واستا اِد ءُ اُود ءَ دُمب سُرینگ ءَ مُلمہ اَنت۔ آ ھمے سرپد باں کہ ما بلوچ راج ءَ یکبرے پد ءَ وتی دُروگانی باپُشت ءَ ریپنیں ءُ واجہ ءِ وشان کنگ ءَ پارلیمنٹ ءِ در ءَ سر بَہ اِیں ءُ وتی کچکول ءَ پُر کن ایں، بلے بلوچ راج سرپد ءُ شیوار بِہ بیت کہ چہ اے پارلیمنٹ پرستاں مئے آچشیں درد ءِ درمان نیست۔ چی ءَ کہ اے درد ءِ درمان آجوئی اِنت، ءُ ابید ء آجوئی ءَ بلوچ راج دلجم بِہ بیت کہ منی تھاردیمگیں آکبت کدی رُوژناہ نہ بیت۔ ھمے کہ مرچی بُتیں سر وزیر کُدوس ءُ آئی ٹولی ءِ بگیر ءَ زھرشانی کنگ ءَ اَنت کہ آئی ریکوڈک ءِ کولبند چیراندری کُرتگ، بلے ھمیشاں ھم شپ ءِ تھاری ءَ واجھانی دیوان ءَ پد کُدوس ءِ ھمراھداری کُرتگ ءُ جام چرئے سر وزیری یے کُرشی ءَ جھل اِیر گِپتگ، ءُ انگت گْوش اَنت کہ ما سھیگ ءُ سرپد نہ اِیں، گُڑا بلوچ راج سوگہ بِہ بیت گوں آئی ءَ اے دوتل دوپوستی کنگ ءَ اَنت دانکہ مئے کسانیں دپار چرپ ءُ مستِر بِہ بیت۔۔۔۔۔۔۔۔۔۔
بلے! سردار اکتر مینگل ءُ آئی گل چرئے ھبر ءَ چوں وت ءَ شمشکار کنت کہ ھُزدار ءَ گیس درکپتگ ءُ آئی سلاہ چے بوتگ۔۔۔۔۔۔۔۔۔، چی ءَ کہ دری کمپنی ءُ سرکار سرپد اِنت کہ اے دمگ ءَ ما کہ وتی سرمایہ کاری ءَ کن اِیں، گُڑا آئی دیم ءَ بلوچ راجی آجوئی ءِ جنگول الم میلانک بیت ءُ پہ ارزانی ءَ مارا لُٹّ ءُ پُل ءَ نیل اِیت، پمشکا واجہ اکتر مینگل ھمے سلاہ ءَ دنت کہ ھندی لشکرے ٹھینگ بہ بیت دانکہ آ گیس ءِ پانپائی ءَ بِہ کنت ءُ لُٹّ ءُ پُل ءِ دیم ءَ کسے میلانک مہ بیت ءُ منی کچکول ھم ھورک ءُ ھالیگی ءِ بدل ءَ سرّیچ بِہ بیت۔
چوش کہ بلوچ راج سرپد بِہ بیت کہ اے لشکر ءِ واستا واجہ اکتر مینگل ءَ کئے گچین کُرتگ اَنت، بلکیں واجہ ءَ ھما مردُم گچین کُرتگ اَنت کہ آ پیسر ءَ کُشندہ ٹولی ءِ رنگ ءَ مزنیں واجہ ءِ گْوشگ ءُ پرمان ءِ رِد ءَ نوشکی ءُ کلات ءَ ھوار ھُزدار ءِ اے دِگہ ھند ءُ دمگاں بلوچ راج ءِ کُشت ءُ کوش ءَ گُلائیش اَنت۔۔۔۔۔۔۔۔۔
دومی نیمگ ءَ ڈاکٹر مالک جاک ءُ جلل کنگ ءَ انت کہ ما اے کولبند ءَ نہ منّ اِیں ءُ ریکوڈک مئے زھگانی باندات اِنت، واجہ ءِ اے گپّ راست اَنت کہ ریکوڈک مئے تانسریں بلوچ راج ءِ وشھالی ءِ مانزمان اِنت، بلے راستی اِیش اِنت کہ چہ ریکوڈک ءَ زیات اِیردستیں بلوچستان مئے آیوکیں پدریچ ءِ رُوژنائیں آکبت ءِ مانزمان اِنت، تو داں وتی گُلامیں سرڈگار آجو نہ کُتگ پہ اے جاک ءُ کُوکاراں واجہ کدی تئی ھبر ءَ دلگوش نہ دنت ءُ داں تو دم بِہ برے یا ترا چم سُھر ءُ جنڈّیں کچلول ءَ لاکوٹے مان بِہ کنت۔۔۔۔۔۔۔گُڑا تو چو آبستگ ءَ تبد ءِ اِیرگْوات ءَ انچو آپ بَہ ئے کہ تئی رندپدانی نِشانے نہ مان اِیت، چی ءَ کہ بلوچ راج ءَ ھوار بلوچ ءُ گْوستانک اے گپّ ءِ گواہ اِنت کہ شُما وتی نوبت ءَ گوں بلوچ ءَ چے کُتگ۔۔۔۔۔۔۔۔۔۔
چی ءَ کہ سی پیک چو اژدھاہ ءَ تانسریں بلوچ راج ءِ دیم ءَ سھرا اِنت، آئی ءِ تاواناں پنجگور ءُ کیچ ءِ کوچگی ھند ءُ دمگ بباں یا شھر، بلکیں گْوادر ءِ پوریاگِر ءُ دریا ورد ھم ھمے آس ءَ سُچگ ءَ اَنت ءُ سیتانی ھُدابُند درآمدیں واجہ اَنت۔۔۔۔۔۔۔۔۔
اگاں انگت ڈاکٹر مالک ٹاپار جنت ءُ گْوش اِیت کہ من نہ کُشتگ ھِلار نہ اِنت، بلکیں واجہ اے ھبر ءَ آشنا بِہ بیت کہ منی کُشتگیں پیسر ءَ ھرام کُوش اِنت۔۔۔۔۔۔۔۔۔۔۔
چی ءَ کہ مرچی چین ءِ اِد ءَ آھگ ءُ آئی کارپد توامیں جھان ءِ دیم ءَ سھرا اَنت کہ آ بلوچ ءِ مال ءُ مڈّیانی لُٹّ ءُ پُل ءَ ھوار بلوچ سرڈگار ءُ آئی زِر ءِ ارزِشت ءَ وتی ھاکمی ءِ برجاہ دارگ ءِ ھاتِر ءَ کار گِرگ ءَ اِنت دانکہ یورپ ءُ مزن ھور ءِ مُلکانی سر ءَ منی بیھار ءِ تْرندیں سان برجاہ بِہ مان اِیت، پمشکا پاکستان ءِ ھر وڑیں کُمک ءَ ساڑی اِنت۔۔۔۔۔۔۔ابید بلوچ راجی جُنز ءِ زانگ ءَ۔۔۔۔۔۔۔۔۔، اگاں انگت ڈاکٹر مالک ءُ آئی ٹولی وت ءَ بلوچ راج ءِ دردوار گْوش اَنت ءُ ڈیھ ءِ پانکجن، گُڑا بلوچ راج بِہ زانت کہ واجہ دُروگ بندگ ءَ اِنت ءُ وتی آیوکیں گچینکاری ءِ واستا تگ ءُ تاچ ءَ اِنت، اگاں باندا واجہ پارلیمنٹ ءِ در ءَ سر بِہ بیت گُڑا ھما گپّ ءَ جنت کہ واجہ ھمائی دپ ءَ دنت ئے۔۔۔۔۔۔۔۔۔، چی ءَ کہ اِیشانی بستگیں ریک ءِ کلات پہ لُمبگ ءَ واجہ دانکانی مُھتاج اِنت۔۔۔۔
اگاں انگت بلوچ راج ءَ سما نہ کُت ءُ وتی تچکیں دگ ءَ رھادگ نہ بوت، گُڑا اے گپّ ءَ ھرکس زانت کہ میارِیگ کئے اِنت، بلکیں ساز جنوک وتی ساز ءَ جن اَنت ءُ واتر بَہ اَنت، جمبوریں آس ءَ سُچ اِیت بلوچ راج۔۔۔۔۔۔۔۔۔۔۔۔

ھمے رنگ ءَ مولانا ھِدایت ءَ ھم دُھل ءُ چاپ اِنت، بلے راج چرئے کُلیں دوتل دوپوستاں آشنا اِنت کہ کَے منی دوست ءُ کَے منی دُژِمن ءِ ھمبل، پمشکا پہ بلوچ راج ءَ ھژدری اِنت کہ آ چہ گُلامی ءِ تنداں در بئیت ءُ آجوئی ءِ ھاتِر ءَ گھگیری ءِ جُھد ءَ وتی باسکاں بِہ زُور اِیت، اگاں نا اے دُژمِن گوں وتی ھمروچیگیں پندلاں بلوچ راج ءَ مُجّتی گُلام ءُ چہ آگُنڈاں ولگوج کنگ لوٹ اِیت، چی ءَ کہ آئی ءِ مھر گوں بلوچ راج ءَ نہ بلکیں گوں بلوچ سرڈگار ءِ مال ءُ مڈّیان انت۔۔۔۔۔۔۔۔۔۔
گھ ھمیش اِنت کہ بلوچ راج مرچی چہ گْراں وابی ءَ بُست بِہ کنت ءُ راجی آجوئی ءِ جُنز ءَ ھوار ءُ ھمگْرنچ بِہ بیت دانکہ باندا سر جھل مہ بیت، چی ءَ کہ رندے پشومانی مارا سوبین نہ کنت، بلکیں سوب گوں شکّلیں جنگان اِنت۔۔۔۔۔۔۔۔۔

***

LEAVE A REPLY

Please enter your comment!
Please enter your name here