” دانکہ جل ماں تئی دریاھیں دِل ءَ آچ نہ بیت
پہ تئی بانوراں گُلیں تنگّھیں پرداچ نہ بیت "
بیگاہ ءِ سارتیں کَوش سُبکّ سُبکّ ءَ کشّگ ءَ اَت من ءُ تو، سنگت کمالان زیارت ءِ ایرگْور ءَ کلانٹگے ءِ سر ءَ نشتگ اِت اِیں ءُ کمالان گوں ترا گل ءِ کارانی بابت ءَ سوڑگ کنگ ءَ اَت کہ اے دْراجیں پند ءَ مارا گوں سبر ءُ تھمبل ءَ دیم ءَ جُنزگی اِنت، ءُ من ءُ تو گوں ھاموشی ءَ سنگت کمالان ءِ ھبرانی گوشدارگ ءَ مُلمہ اِت اِیں۔۔۔۔۔۔۔۔۔۔۔۔۔
وھدے سنگت کمالان ءَ وتی ھبر ھلاس کُرت اَنت، انچو چہ پُشتی نیمگ ءَ چِڑکّھے بوت، ما شُما کہ ھواری ءَ چکّ ترّینت گُڑا تو کندت اِت ءُ گْوشت اے گنوک اِنت ( گنوکیں پِیرزال نام رموشتگ ) جبڑگ ءَ اِنت۔۔۔۔۔۔۔۔۔۔۔۔۔۔۔
گل ءِ کارانی رِد ءَ اے منی ءُ تئی اولی رند اَت کہ یکّے دومی ءَ گوں دُرستی ءُ راستی بوت اِیں، ھمے رنگ ءَ وھد دیم ءَ جُنزان اَت ما شُما گوں یکّے دومی ءَ گیش نزّیک بوت اِیں ءُ راجکاری ءِ کارانی گوں وتی نِزوریں کُوپگاں دیم ءَ برّگ ءِ جُھد کُت۔ تو ھما سوگِند گوں سرڈگار ءِ مِسکیں ھاک ءَ وارتگ اَت، ھما سوگِند ءِ پاسداری ءَ تو وتی سالونکیں سر کُربان کُت۔۔۔۔۔۔
تاھِیر جان! اے گپّ ءَ مارا گْوستانک ءُ کواسیں سر گْوش اَنت کہ نمیران ھما سر بَہ اَنت آ گوں راجدوستی ءِ دِیدانک ءَ پہ راج ءَ زندگی کن اَنت، ءُ شُما گوں وتی راجدوستی ءِ بودِشت ءَ اے ھبر بلوچ راج ءِ ھر زھگ ءَ را باور کنائینت کہ پہ راج ءَ زندگی کنگ چی یے۔۔۔۔۔۔۔۔۔۔۔۔۔
ءُ شُمئے اے دیمونی بلوچ راجدپتر ءِ ھُسن ءُ زیبائی کہ آ گُلامی ءِ روتگاں چہ ماتیں گُلزمین ءِ سر ءَ ولگوج کنت ءُ آتارگ ء مِستاگ ءَ گیت ءُ شُما راجدپتر ءِ تاکانی جلواناک ءُ زیبائیں کارِست مان اِت۔۔۔۔۔۔۔۔۔۔۔۔
اے درگت ءَ ندکار کرامہ جاھے نبشتہ کنت: اگاں! تو ھمے مار اِت کہ تو وتی دْراھیں چیزّاں ببا دَیَگ ءَ ئے، گُڑا ھما درچکاں یات بِہ کن کہ آ ھمُک سال وتی دْراھیں تاکاں ببا دے اَنت اِیں۔
بلے! آ انگت اُوشتاتگ اَنت ءُ ودارِیگ پہ وژدِلیں روچانی واستا۔۔۔۔۔۔۔۔۔
تاھِیر جان! شُمئے گوں سنگتاں اے بے مُلّیں دیمونی مارا ھمے ڈسّ اِیت کہ ندکاریں کرامہ ءَ اے گوھریں دانک پہ جْوانیں مکسدے ءَ نبشتہ کُرتگ اَنت۔۔۔۔۔۔۔۔۔۔۔، ءُ شُما وتی آیوکیں پدریچ سوھو کُت کہ ما راجے ءِ بِستار ءَ ھما روچ ءَ سرجم ءُ برجم بَہ اِیں ندْر ءُ کُربان بُوَگ ءِ دگ ءَ پہ پند بُرّگ ءَ جاڑی ءُ دیمونی ءِ دَیَگ ءَ چک ءُ پد نہ بَہ اِیں۔۔۔۔۔، ءُ اے پِڑ ءَ ھما راج پش کپ اَنت کہ آ چہ وت ءَ راجی ھستمان ءِ راہ ءَ دُور ءُ ادارُکی زِندے ءِ واھُند سرپد بَہ اَنت۔۔۔۔۔۔۔۔۔
بلکیں! نوں مارا ھرنسٹ ھمنگوئے ءِ اے دانک دلگوش گْور کنگی اَنت کہ آ مارا ءُ اے دِگہ ایردست ءُ گُلامیں راجاں چے گْوش اِیت: نوں پہ جیڑگ ءَ اے گپ پشت نہ کپت ءَ کہ چے ھست ءُ چے نیست، بلکیں نوں اے بِہ جیڑ کہ تو چے کُت کن ئے۔۔۔۔۔۔۔۔۔۔۔
پہ گُلام ءُ ایردستیں راج ءَ، پہ بے بُندر ءُ بے ساھِگیں راج ءَ، پہ گُنگ ءُ بے زُبانیں راج ءَ۔۔۔۔۔۔۔۔۔۔بِہ جیڑ کہ تو چے کُت کن ئے۔۔۔۔۔۔۔
اگاں تو نہ جیڑ اِت ءُ گوں جِند ءِ ساھگ ءِ سمبرینگ ءَ مُلمہ بوت ئے، گُڑا باندا پہ تو ھِچّ رنگیں گِلگے پش نہ کپ اِیت کہ تو ” گار کُتگ ماں ھاکاں ءُ پُراں دزمُوش ئے "۔۔۔۔۔۔۔
تاھِیر جان! تو گوں وتی ملّ مِڑوکیں سنگتاں پہ راج ءِ ورناھاں اے داستان نوشتہ کُت کہ سرانی رون ءُ جونانی جوھان الم بیت، بلے چرے لاب ءَ پد کہ جوھان زاگ بیت آ پہ ما آجوئی اِنت۔ ءُ آجوئی ءِ سارتیں سمین کہ گُلزمین ءِ دِلبند ءَ شیکّان بیت گُڑا گْواڑگیں پُلّانی سْرپتگیں وشبو ترا اے مِستاگی ءَ گِر اَنت کہ داتگیں دیمونیانی مُزّ ءُ برورد چی اِنت۔۔۔۔۔۔۔۔۔۔
تاھِیر جان! من جزماں کہ شُمئے اے داتگیں ھونانی ھر تْرمپ ءِ ھِساب گوں آجوئی ءَ بیت، بس منی کلوہ پہ بلوچ راج ءِ ورناھاں ھمیش اِنت کہ آ شُمئے اے رُپتگیں دگ ءَ پہ پند بُرّگ ءَ ساجو ءُ چاڑِکّہ بِہ بَہ اَنت۔۔۔۔۔۔۔۔۔۔۔۔۔۔۔
” شپ اگاں ستر تھار اِنت بام الم ءَ آسیت”۔۔۔۔۔۔۔۔۔۔۔۔۔
***
